¹ Zhəda pyɔ̌ Zhɔzafaatɛ kwɛ̃̀ n vò ń sõ Zhərəzalɛm nɛ́ ǹdə́ yə̀-zùlə́. ² Anəni byǐ Yəwu, ń nɛ̃́ mɔ́, tú n bə̀ n jəl mo n zɛ̃̀ n bwə̀rh mo, n wɔ̀: «Rə̀ kùrə̀, ǹ mə́ ǹ sɛ̃ wu-bárhɛ́ cə́bal mɔ́ nɛ, ń súlí ǹ só Cinu zwə̀ bé? Rə̀myɛ́ mɔ́ ce, Cinu Yi lyi-shùùrí m'a ló ǹ yó wə. ³ Sə ǹdə́ rə̀myɛ́ ga, ǹ wɛ̀rhɛ́ kɔn dɛ̀bɛ́ rə̀ càn myɛ. Ǹ ju Ashəra pálá nɛ́ myǐn, rə jé tɛ̃́ ń tənà y wa, ń zɛ̃̀ ń pyà Yi ǹdə́ ǹ wu gakó.» ⁴ Zhɔzafaatɛ jòm Zhərəzalɛm nɛ́. N zɛ̃̀ n zɛ̃̀ n kə́ n byɛ́lɛ́ dwí rí púlə́púlə́ ne, kɔn zhì Bɛɛr-Shəba e m'e yí Efərəyim pyàr rɛ́, n kə́ n ce dwí rí kwɛ̃̀ rə k'ê bə̀ rə tó Cinu, rə̀ nàmbala bɛ́ Yi rí ni. ⁵ N cír bù-kárna n cĩ́ tənà y wẽ́, Zhəda cɛmɛ nɛ́ nyɛ̀bɛ́ gakó nə̀ lù nə kə́kɛ́lɛ́ ǹdə́ byílsi mú, cɔ gakó wẽ́. ⁶ N wɔ̀ bù-kárnabá nɛ: «Zə-na nyɔ̀mɔ̀ ǹdə́ kɔn rɛ́ tɛ̀bɛ́ á la wɔ̀rhɔ́ mɔ́, bə̀ bùrsí shɛ̀bɛ́ á la kɔ́ mɔ́ bə mə̌ sə sə tó numbyíní pùbùlə̀ ne yé, è wɔ́ Cinu pùbùlə̀ né ne sə̀ kɔ́ mɔ́ mə̌ sə mə tó. Cinu cìcì mà n yə̀ nɛ ǹd'ába á bù-kárna tum rí rə̀myɛ́ mɔ́ wẽ́. ⁷ Rə̀myɛ́ ce, nyám-na Cinu Yi dɛ̃́dɛ̃́, zwẽ-nə ń nyí rí á wɛ̀rhɛ́ ǹdə rə̀ gə́ n'ê byili ní, bə̀ Cinu nə́ Yi rí bə kɔn rɛ́ tɛ̀bɛ́ rə̀ də̀ cángá só yé, ń bə tũ̀twĩ̀ĩ̀ rí tɛ̀bɛ́ bə̀ y'a cír lò mó bə zɛ̃̀ bə ce nyí ǹ kwã nɛ́ mɔ́ só yé, ń bə lyì bí yǒ ǹdə́ pansɛ́ tũ̀twĩ̀ĩ̀ rí só yé.» ⁸ Zhərəzalɛm nɛ́ cìcì myɛ, Zhɔzafaatɛ cír Levyi dwí rí lyì bí ǹdə́ vwĩ̀-zwə́lnə bé jàlà e súlí Esərayɛl lyì byǎ bɛ́ dwə́ né yó-cìnə́ bé jàlà bə̀ la kə́ bùrsí sə tó ǹdə Cinu gə́ nə́ ń yǎl nɛ́, sə bə súlí bə pɔr Zhərəzalɛm lyì bí búlə́ né ǹdə́ dwã mɔ́. ⁹ N súlí n pə bɛ nyí n wɔ̀: «Á m'ǎ twĩ̀ èta, Cinu nyɔ̀mɔ̀ wẽ́, wu-bɔ̀nɔ̀ wẽ́ e súlí ǹdə́ wu-põ̀ wẽ́. ¹⁰ Á da-byǎ bɛ́, bə̀ wɔ bə̀ cɛmɛ nɛ́ w mɔ́, gə zə bùrsi yò bə m'e bə̀ á sõ, è wɔ́ lò bə̀ gu yò ráá nyí tɛ̀bɛ́ bə̀ kɛ̃ yò ráá nyí bə̀ pɔ yò ráá nyí bə̀ vùr yò ráá lùl-e-púrí tũ̀twĩ̀ĩ̀ yò, sə á sɛ̃ bɛ bə sú rə̀ kùr mùnì ga dóó bə̀k'a jòm bə̀ yó w Cinu yé né yé, sə Cinu mə́ ń bə̀ ń lyi-shùúrí ámyɛ̌ ǹdə́ á da-byǎ bɛ́ yó w lwé yé. Wɛ̀rhɛ́-na èta, mùnì ga dóó bə̀k'a jòm á yó w gaga yé. ¹¹ Vwĩ̀-zwə́lnə náncɛ Amarəya mà n yə̀ á yó-cə́bal, Cinu ywẽ̀ né gakó yilə, sə Yəsəmayəə byǐ Zəbaja mà n yə̀ á yó-cə́bal ywẽ̀ né nyɛ̀bɛ́ gakó nə̀ wɔ́ pyɔ̌ mɔ́ ywẽ̀ yilə. Levyi dwí rí lyì bí m'a yə̀ ǹdə sá-kanna ta á yé né. Zə-na wu-jɔ̀ sə á twĩ̀! Sə Cinu yə̀ nɛ́ ǹdə́ lò mɔ̀bɔ́ ń la cɛ̀nɛ̀ wɔ̀rhɔ́ mɔ́!»