¹ Pyɔ̌ Zhɔzafaatɛ yà ń búl ń zhe nə̀cɛ̀ndɛ nánzhəzhɔ̌ ǹdə́ zùwə́ myɛ. N tó cɔ̀nɔ̀ dɛnnɛ n zə dɔbrɛ́ ǹdə́ Akaabɛ. ² Byinə màngɛlɛ́ kwã nɛ́, Zhɔzafaatɛ zhə̀l Akaabɛ sõ, Samarɛ nɛ́. Akaabɛ gu və̌-ywàálɛ ǹdə́ vwàmá nánfwààlɛ nə̀ y'à búl nə̀ já ńmyɛ̌ ǹdə́ lyì bí byɛ̀bɛ́ bə̀ y'à tó mo mó yilə. N zɛ̃̀ n zɔ̀m ǹdə́ mɔ, n ŋwɛ̀nɛ́ n ce ń la n tó mo n vò Aramɔɔtɛ, Galaadɛ nɛ́. ³ Esərayɛl pyɔ̌ Akaabɛ bwə̀rh Zhəda pyɔ̌ Zhɔzafaatɛ, n wɔ̀: «Ǹ m'ǎ shɛ̀nɛ́ ń tó ne ń vò Aramɔɔtɛ, Galaadɛ nɛ́?» Zhɔzafaatɛ lyár mɔ n wɔ̀: «Àmyɛ́ ǹdə́ ǹmyɛ́ m'ǎ yə̀ kɔn rə̀dù, à shə̀dɛ́ɛ́sɛ́ m'a yə̀ ǹ shə̀dɛ́ɛ́sɛ́, nə́ m'ǎ tó mó nə́ vò búlə́ né jàà y wa.» ⁴ Zhɔzafaatɛ súlí n wɔ̀ Esərayɛl pyɔ̌ mɔ́ nɛ: «À n'â lwə̀l mó sə́ jɛ̀nɛ̀ ń sú Cinu wu.» ⁵ Esərayɛl pyɔ̌ mɔ́ zɛ̃̀ n byẽ̀ nyì-zwennə bé gakó dwã yó, bə̀ y'à wɔ́ nunə zwã̌-àna, n zɛ̃̀ n bwə̀rh be, n wɔ̀: «Nə́ nə wɔ̌ nə́ zhə̀l nə́ bwí ǹdə́ Aramɔɔtɛ cɔ wá, Galaadɛ nɛ́ ráá à yẽ̌?» Bə lyár mɔ bə wɔ̀: «Zhəl ń vò ń bú ǹdə́ wa, bə̀ Cinu co cɔ w pyɔ̌ mɔ́ jɔ̃̀ wa.» ⁶ Sə Zhɔzafaatɛ bwə̀rh, n wɔ̀: «Cinu nyì-zwennə dõ tɛ̀nɛ́ nyɔ̀nɔ̀ nə́ la tó ń dɛnnɛ nə́ sú Cinu wu nà?» ⁷ Esərayɛl pyɔ̌ mɔ́ wɔ̀ Zhɔzafaatɛ nɛ: «Lò dõ gwẽ̌ ŋwɛ́nɛ́ nyɔ̀nɔ̀ nə́ wɔ̌ nə́ m'ǎ tó ń dɛnnɛ nə́ sú Cinu wu, sə àmyɛ́ súl mu, bə̀ ń tá ń zɔ̀m zɔ̃̀-ènyɛ̀lɛ̀ rə̀dù ga ń pɛ nɛ yé, è wɔ́ lwɛlɛ dúdú: wɔ́ Yəməla byǐ Myishe.» Zhɔzafaatɛ zɛ̃̀ n wɔ̀: «Pyɔ̌, ǹ bə̀k'á zɔ̀m èta yé!» ⁸ Esərayɛl pyɔ̌ mɔ́ byẽ̀ ń kɛ̀lɛ́ y tùntùnnə mə̀dù n wɔ̀ mɔ: «Zhəl ń zə Yəməla byǐ Myishe ń mə́ bə̀ làlà!» ⁹ Esərayɛl pyɔ̌ Akaabɛ ǹdə́ Zhəda pyɔ̌ Zhɔzafaatɛ y'à zù bə̀ pyǎ gàndɛ, lò gakó jě ń pyɛ̀lɛ̀ də̀gwã́ yó, jàà y kɛ̀bɛ́ è ŋwɛ́nɛ́ Samarɛ cɔ w bwə̀rə̀ y yé y w mó; rə̀myɛ́ yi ní ǹdə́ nyì-zwennə bé j'â n'ê zɔ̀m bə̀ nyì-zwennə zɔ̀mà nɛ́ bə̀ yé né. ¹⁰ Kənaana byǐ Shədəca yà ń zùrhì lù nyimi sə ń yà ń nə́ ń wə̀lə̀: «Nyǐ Cinu nyí rí. Ǹ m'ǎ zə nyimi ní nyɛ̀bɛ́ ń mə́ ń zò Siri lyì bí ń pwə́r kɔn b'e yí ń ce bə jé tɛ̃́!» ¹¹ Nyì-zwennə bé gakó myɛ y'à n'ê wə̀l rə̀myɛ́ rə̀dù yə́: «Zhəl ń vò ń bú ǹdə́ Aramɔɔtɛ cɔ wá, Galaadɛ nɛ́, nyǐ ǹ m'ǎ jí bɛlɛ. Cinu mà n ce cɔ w pyɔ̌ mɔ́ jɔ̃̀ wa.» ¹² Lò mó mɔ̀bɔ́ bə̀ y'à twĩ̀ Myishe kwã nɛ́ mɔ́ yí n wɔ̀ mɔ: «Cili! Nyì-zwennə bé co nyí dwã w bə̀ n'ê zɔ̀m zɔ̃̀-ènyɛ̀là bə̀ pɛ pyɔ̌ mɔ́ nɛ. Ce ǹ cəl ré ǹdə́ bə̀ cəl ré yə̀ rə̀dù! Zɔ̌m zɔ̃̀-ènyɛ̀là!» ¹³ Sə Myishe lyár mɔ, n wɔ̀: «Ǹdə́ Cinu mú mɔ̀bɔ́ ń wɔ́ nã́nyì mú, wɔ́ kɔn rɛ́ tɛ̀bɛ́ à Yi rí la nɛ byilu mú, wɔ́ rə̀myɛ́ à la cṹ!» ¹⁴ Myishe gə́ tú n yí pyɔ̌ mɔ́ yé né, pyɔ̌ mɔ́ bwə̀rh mo n wɔ̀: «Myishe, nə́ nə wɔ̌ nə́ zhə̀l nə́ bwí ǹdə́ Aramɔɔtɛ cɔ wá, Galaadɛ nɛ́ ráá à nə yẽ̌?» N lyár mɔ n wɔ̀: «Zhəl-nə, á m'ǎ ŋwɛ̀nɛ́ wa. Cinu mà n ce cɔ w lyì bí á jɔ̃̀ wa!» ¹⁵ Pyɔ̌ mɔ́ zɛ̃̀ n wɔ̀ mɔ: «Twər màngala à m'a ce ń bwəl ne nyí bə̀ wɔ́ zhə̀n rɛ́ dúdú ǹ mə̌ sə́ byili ni Cinu yil yilə?» ¹⁶ Rə̀myɛ́ yó, Myishe lyár mɔ, n wɔ̀: «À nɔ Esərayɛl lyì byǎ bɛ́ púlə́púlə́ bə̀ làà pyàr rɛ́ yó ǹdə pyììsi shɛ̀bɛ́ sə̀ bə ènɔ̀n zhe mó ta. Cinu zɛ̃̀ n wɔ̀: ‹Lyì bí byɛ̀bɛ́ bə cǐnnə zhe yé; bə̀ mə̀dù mə̀dù gakó ká n kwɛ̃̀ n vò jè ǹdə́ yə̀-zùlə́!› » ¹⁷ Esərayɛl pyɔ̌ mɔ́ wɔ̀ Zhɔzafaatɛ nɛ: «À y'à yə̀ dámǎ a wɔ̀ mɔ́: ‹ń já ń búl ń tá ń zɔ̀m zɔ̃̀-ènyɛ̀là ń pɛ nɛ gaga yé, è wɔ́ lwɛlɛ dúdú›!» ¹⁸ Myishe súlí n wɔ̀: «Èlǎsɛ̃́, cili Cinu zɔ̀mɛ̀ rɛ́. À nɔ Cinu ń jě ń pyɛ̀lɛ̀ də̀gwã́ y yó ǹdə́ dɛ̃̌-yi rí tùntùnnə bé gakó bə̀ zhǐ ń jə̀-jĩ́ ǹdə́ ń jə̀-gwã̀ ga nɛ. ¹⁹ Sə Cinu bwə̀rh n wɔ̀: ‹Mɔ̌ ń mà n vò n swèlè Esərayɛl pyɔ̌ Akaabɛ n ce n vò n bú ǹdə́ Aramɔɔtɛ, Galaadɛ nɛ́, sə n cì gàà mɔ́?› Mɔ̀ lyár èta, mɔ̀ myɛ lyár èta. ²⁰ Rə̀myɛ́ yi ní éshìrhə́ èdù twẽ̌ e b'e zhì Cinu yé né e wɔ̀: ‹àmyɛ́ m'a vò a swèlè mo.› Cinu zɛ̃̀ n bwə̀rh y n wɔ̀: ‹Etər ǹ la mɔ nɛ́ sòlò?› ²¹ E lyár mɔ e wɔ̀: ‹À m'a vò a ce ń nyì-zwennə bé gakó j'â n'ê gòm kɔma.› Cinu wɔ̀ éshìrhə́ y ne: ‹Zhəl ń vò ń swèlè mo, ǹ m'ǎ ŋwɛ̀nɛ́ mɔ. Zhəl sə́ wɛ̀rhɛ́ ǹdə ǹ gə́ byili ní.› ²² Cinu gə ce ǹ nyì-zwennə bé gakó n'ê gòm kɔma sə́ nyǐ wɔ́ zɔ́m ń zɔ̀m n gu ń wẽ́ ń la n ce lwɛlɛ pú mú.» ²³ Kənaana byǐ Shədəca twẽ̌ n yí Myishe nyí ni n mà mɔ jə̀-sǎ ń mə́ ń ywə̀lə̀: «Cinu éshìrhə́ y nə wɔ̌ è shə́r è yẽ̌ àmyɛ́ nɛ e zɔ̀m ǹdə́ ǹmyɛ́?» ²⁴ Myishe myɛ lyár mɔ n wɔ̀: «Ǹ m'ǎ lwar rɛ zhə̀n ga, dɛ̃ rɛ́ tɛ̀bɛ́ ǹ m'ǎ pyà ń zù jì jì gakó wẽ́ ǹ la mə́ shèè mó.» ²⁵ Esərayɛl pyɔ̌ mɔ́ pə nyí n wɔ̀: «Zə-na Myishe á vò á pə cɔ w cə́bal Amɔ̃ ǹdə́ pyɔ̌ mɔ́ byǐ Yɔwaashɛ nɛ, ²⁶ sə á wɔ̀ bɛ: ‹Nyǐ pyɔ̌ mɔ́ nyí rí: ce-nə lò mó mɔ̀bɔ́ byə̀nə́-jù wə, sə á n'á pɛ mɔ búrú ǹdə́ nɛ̃̌ námpɔ́lɛ́ námpɔ́lɛ́ kɔn b'e yí a kwɛ̃̀ a bə̀ ǹdə́ yə̀-zùlə́.› » ²⁷ Myishe lyár mɔ n wɔ̀: «Ǹ gə kwɛ̃̀ ń bə̀ ǹdə́ yə̀-zùlə́ sə́ nyǐ Cinu yə̀ àmyɛ́ dɛnnɛ tó n zɔ̀m yé.» N zɛ̃̀ n súlí n wɔ̀: «Dwə́ né gakó, cili-nə...!»a ²⁸ Esərayɛl pyɔ̌ mɔ́ ǹdə́ Zhəda pyɔ̌ Zhɔzafaatɛ j'a zɛ̃̀ bə tó dwã bə vò bə bú ǹdə́ Aramɔɔtɛ cɔ wá, Galaadɛ nyí rí wẽ́. ²⁹ Esərayɛl pyɔ̌ mɔ́ wɔ̀ Zhɔzafaatɛ nɛ: «À m'a lyə́r à cìn a m'a vò búlə́ né bú jàà wa. Ǹmyɛ́ zwí ǹ pyɔ̌ gàndɛ́.» Esərayɛl pyɔ̌ mɔ́ zhə̀n ga lyə́r ń cìn n lyɛ̃ n vò búlə́ né bú jàà wa. ³⁰ Siri pyɔ̌ mɔ́ yà ń pɔ nyí ń búlə́ eshə-vwə̃tur rí yó-cìnə́ bé ne n wɔ̀: «Á bə̀k'á bú ǹdə́ shə̀də́-fò ráá shə̀dɛ́-fɔ̀lɔ̀ yé, bú-nə ǹdə́ Esərayɛl pyɔ̌ mɔ́ dúdú.» ³¹ Rə̀myɛ́ ce búlə́ eshə-vwə̃tur rí yó-cìnə́ bé gə́ nɔ Zhɔzafaatɛ, bə wɔ̀: «Wɔ́ ńmyɛ̌ ń wɔ́ Esərayɛl pyɔ̌ mɔ́.», bə j'a kə́kɛ́lɛ́ mɔ bə̀ la bú ǹdə́ mɔ. Rə̀myɛ́ yi ní Zhɔzafaatɛ mà búbwéé n ce né. Cinu sɛ̃ mɔ, Yi j'a ce bə kwɛ̃̀ bə yẽ̌ mo. ³² Búlə́ eshə-vwə̃tur rí yó-cìnə́ bé gə́ púrí bə̀ nyǐ è y'à də̀ Esərayɛl pyɔ̌ mɔ́, bə̀ j'a k'a kwɛ̃̀ bə yẽ̌ mo. ³³ Sə lò mə̀dù vùr ń twã n tə yɔ̌, sə ń cám rɛ́ tó Esərayɛl pyɔ̌ mɔ́ cɔ̀bɔ́ kàmə̀zǔ w gə́ zhí zhí dwã nɛ mə̀gã̌ mɔ́ rə zə mɔ. Pyɔ̌ mɔ́ zɛ̃̀ n wɔ̀ ń búlə́ eshã-vwə̃tu w dùrnə̀ mó ne: «K'á kwɛ̃̀ ǹ kwã nɛ́, zə nɛ a du búlə́ né jàà y wa, nyǐ à cɛ̀mɛ̀.» ³⁴ Búlə́ né zɔ càn dɛ̃́dɛ̃́ dɛ̃ rɛ́ rə̀myɛ́ mɔ́ yù wə, rə̀myɛ́ ce Esərayɛl pyɔ̌ mɔ́ mɛ̃ ń búlə́ eshã-vwə̃tu w wẽ́ Siri lyì shə̀dɛ́ɛ́sɛ́ yé y wə, kɔn m'e yí də̀dɛ̀nɛ́. Sə ń cù yi rí gə́ y'à n'ê zwì yi ní.