¹ Aza byǐ Zhɔzafaatɛ jǐrh pyɔ̌ ń jàà wa. Sə ń ce ń pyɛ̀lɛ̀ rɛ́ cĩ́ kùr mùnì ga n ŋwɛ̀nɛ́ n bú ǹdə́ Esərayɛl. ² N cĩ́ shə̀dɛ́ɛ́sɛ kùkùlə̀ Zhəda cɛmɛ nɛ́ nyɛ̀bɛ́ nə̀ y'à kə́kɛ́lɛ́ ǹdə́ byíl-fwàlsɛ mɔ́ gakó wẽ́, n súlí n cĩ́ yé né cìnə́ Zhəda tənà y ǹdə́ Efərəyim cɛmɛ nɛ́ nyɛ̀bɛ́ ń da Aza yà ń bú búlə́ n zwẽ mó wẽ́. ³ Cinu Yi yàl nɛ́ ǹdə́ Zhɔzafaatɛ, bə̀ ń yà ń kwè ń da Dəvyidi nà y ń yà ń kwè ń pyɛ̀lɛ̀ rɛ́ kùr ju yi ní mú. Ń yə̀ Baaləbá pyà yé. ⁴ Sə ń pyà Cinu, ń nàmbal mɔ́ Yi rí, ń tó ń nyə́ né ne, ń yə̀ Esərayɛl lyì byǎ bɛ́ tũ̀twə̃̀ə̃̀ né zwì yé. ⁵ Cinu Yi ce ń pyɛ̀lɛ̀ rɛ́ cĩ́ kùr n pɔ̃. Zhəda lyì bí púlə́púlə́ zə pansɛ bə b'e pə Zhɔzafaatɛ nɛ, sə rə̀myɛ́ ce ń yà ń zhe nə̀cɛ̀ndɛ nánzhəzhɔ̌ ǹdə́ zùwə́. ⁶ Ń tó Cinu sɔ́msɛ́ ǹdə́ ń wu gakó. Sə rə̀myɛ́ tú rə ce vwə̃̀ né zwə́l jààsɛ́ ǹdə́ Ashəra pálá jé tɛ̃́ Zhəda né. ⁷ Ń pyɛ̀lɛ̀ rɛ́ jú byinə nə̀tɔ̀ byin rí, ń twĩ̀ ń lyì-fwààlɛ jàlà: Bɛn-Ayil ǹdə́ Obaja ǹdə́ Zakarɛ ǹdə́ Nətanəyəə e súlí Myəkaya, bə vò bə pə còrhò Zhəda cɛmɛ nɛ́ lyì bí ni. ⁸ Levyi dwí rí lyì Shəmaya ǹdə́ Nətanya ǹdə́ Zəbaja ǹdə́ Asayəə ǹdə́ Shəmyəramɔɔtɛ ǹdə́ Yɔnatã ǹdə́ Adɔnya ǹdə́ Tɔbya ǹdə́ Tɔɔbɛ-Adɔnya e súlí vwĩ̀-zwə́lnə Elyəshama ǹdə́ Yɔram y'à súlí bə̀ ŋwɛ́nɛ́ ǹdə́ bɛ. ⁹ Bə zə Cinu Yi nyə́ né sɛ́bɛ́ rɛ́ bə m'e pə còrhò Zhəda lyì bí ni. Bə̀ tó Zhəda cɛmɛ nɛ́ gakó w bə m'e pə còrhò dwí rí ni. ¹⁰ Cinu ce ywẽ nánfɔ̀lɔ̀ zə tənèsé shɛ̀bɛ́ sə̀ y'à kə́kɛ́lɛ́ Zhəda mó gakó, èdù ga myɛ k'ê yə̀ búlə́ bwí ǹdə́ Zhɔzafaatɛ yé. ¹¹ Bə̀ y'à n'ê zal pansɛ ǹdə́ sə̀byì-kùlì e súlí myə̌l-kwǎndɛ bə̀ m'ê shí Shilisəti lyì bí sõ bə̀ twí bə̀ pɛ Zhɔzafaatɛ nɛ. Arabɛbá myɛ cìcì mú y'à n'ê zal və̌-ywàálɛ bə̀ twí bə̀ pɛ mɔ: pyì-byərh mɔ̀ɔ̀rhɛ̀ tàlpyɛ̀ ǹdə́ zɔ̃̌-nyàlpyɛ̀ (7 700) e súlí bə̀-cǐlsi mɔ̀ɔ̀rhɛ̀ tàlpyɛ̀ ǹdə́ zɔ̃̌-nyàlpyɛ̀ (7 700). ¹² Zhɔzafaatɛ ŋwɔ̀nɔ́ w y'à j'â n'ô súlí ò la, n lù jààsɛ, n zɛ̃̀ n lù byíl-fwàlsɛ n mə n kə́kɛ́lɛ́ sɛ e súlí wẽ̀ cṹ jààsɛ cɛmɛ. ¹³ Ń wẽ̀ ré tɛ̀bɛ́ ń yà ń tɛnɛ n cĩ́ Zhəda cɛmɛ nɛ́ wẽ́ mó y'à búl rə̀ já dɛ̃́dɛ̃́, e súlí búlə́ kàndar Zhərəzalɛm nɛ́. ¹⁴ Nyǐ bə̀ gə́ y'à bɔ̀n jì jì ní: Zhəda kwálá y wẽ́, yó-cə́bal Adəna, shə̀dɛ́ɛ́sɛ mɔ̀ɔ̀rhɛ̀ yó-cə́bal, ń yà ń cǐ búlə́ kàndar mɔ̀ɔ̀rhɛ̀ zwã̌-àtɔ̀ (300 000). ¹⁵ Yó-cə́bal Yɔwanã, ń yà ń ŋwɛ́nɛ́ ǹdə́ mɔ mɔ́, yà ń cǐ shə̀dɛ́ɛ́sɛ mɔ̀ɔ̀rhɛ̀ zwã̌-àlyè ǹdə́ shə́-lyɛlɛ (280 000), ¹⁶ e súlí Zəkəri byǐ Amasha, mɔ̀bɔ́ ń nə́ ń twĩ̀ tum rí ǹdə́ ń pùbùlə̀ Cinu yil mú, yà ń cǐ búlə́ kàndar mɔ̀ɔ̀rhɛ̀ zwã̌-àlyè (200 000). ¹⁷ Bɛ̃zhamɛ kwálá y wẽ́: Búlə́ kàndɔ Elyada, ń yà ń cǐ nunə mɔ̀ɔ̀rhɛ̀ zwã̌-àlyè (200 000) bə̀ y'à zhe twərh ǹdə́ nə̀kwə̀r; ¹⁸ e súlí Yɔzabaadɛ ń yà ń ŋwɛ́nɛ́ ǹdə́ mɔ mɔ́. Ń yà ń cǐ shə̀dɛ́ɛ́sɛ, mɔ̀ɔ̀rhɛ zɔ̌m ǹdə́ shə́-lyɛlɛ (180 000) ǹdə́ sə̀ búlə́ wẽ̀. ¹⁹ Wɔ́ shə̀dɛ́ɛ́sɛ́ shɛ̀bɛ́ sə̀ y'à n'ê twĩ̀ sə̀ pɛ pyɔ̌ mɔ́ nɛ mɔ́ èta. E jà ń yà ń vùr sə̀ dwã myɛ n cĩ́ Zhəda tənà y púlə́púlə́ cɛmɛ nɛ́ nə̀ lù nə kə́kɛ́lɛ́ ǹdə́ byíl-fwàlsɛ́ mɔ́ wẽ́.