¹ Aza pyɛ̀lɛ̀ rɛ́ jú byinə shə́-ètɔ̀ ǹdə́ nyə̀ldù byin rí, Esərayɛl pyɔ̌ Basha tú n bə̀ n bú ǹdə́ Zhəda tənà yá; n zɛ̃̀ n lù byílsi n mə n kə́kɛ́lɛ́ Arama mùnì ga n cə̀r Zhəda pyɔ̌ Aza yé ne. ² Aza vùr sə̀byì-kùlì ǹdə́ sánə́má Cinu jì y nə̀cɛ̀ndɛ́ e súlí pyɔ̌-kɛ̀lɛ́ y nə̀cɛ̀ndɛ́ wẽ́, n pə bə vò bə pə Siri pyɔ̌ Bɛ̃-Adaadɛ ń yà ń jě Damaasɛ nɛ́ mɔ́ nɛ. N súlí n pə nyí bə wɔ̀ mɔ: ³ «Bà, àmyɛ́ ǹdə́ ǹmyɛ́ zə dɔbrɛ ǹdə à da ǹdə́ ǹ da gə́ y'à zɔ dɔbrɛ nɛ́. Nyǐ sə̀byì-kùlì ǹdə́ sánə́má à pɔ bə̀ bə̀ zhəl bə pɔ̃́. Cɔ̌ ǹ dɔbrɛ́ ǹdə́ Esərayɛl pyɔ̌ Basha mùnì ga ń bə̀ká n bə̀ n bú ǹdə́ nɛ yé.» ⁴ Bɛ̃-Adaadɛ cili kɔn rɛ́ tɛ̀bɛ́ pyɔ̌ Aza byili mú. N twĩ̀ ń shə̀dɛ́ɛ́sɛ́ yó-cìnə́ bé bə vò bə bú ǹdə́ Esərayɛl lyì byǎ bɛ́ cɛmɛ nɛ́. Bə zwẽ Yəyɔ̃ ǹdə́ Dan ǹdə́ Abɛl-Məyim e súlí Nəfətəlyi tənà y nyí rí gakó cɛmɛ nɛ́ wẽ̀ ré cṹ jààsɛ́. ⁵ Sə Basha gə́ já n nyɛ̀ɛ̀ rɛ, ń yẽ̌ byílsí lú n mə n kə́kɛ́lɛ́ Arama nɛ, n yẽ̌ ń tumə né ne. ⁶ Rə̀myɛ́ yó, pyɔ̌ Aza zɔ Zhəda lyì bí gakó. Bə pwà nə́kulə né ǹdə́ dǎr rɛ́ Basha yà ń mə́ ń lwì byílsí ń la n mə n kə́kɛ́lɛ́ Arama mɔ́. Pyɔ̌ mɔ́ zə rɛ n mə n lù byílsi n mə n kə́kɛ́lɛ́ Gəba ǹdə́ Myəsəpa. ⁷ Yi rí rə̀myɛ́ mɔ́ wẽ́, Anəni, mɔ̀bɔ́ ń yà ń nɛ̃́ mɔ́ tú n bə̀ n nə Zhəda pyɔ̌ Aza, n wɔ̀ mɔ: «Ǹ gə́ zhí Siri pyɔ̌ mɔ́ nɛ, ń zɛ̃̀ ǹ yə̀ Cinu, ǹ Yi rí ni zhí mú ce, Siri pyɔ̌ mɔ́ shə̀dɛ́ɛ́sɛ́ vwǎrh ǹ jɔ̃̀ wa. ⁸ Ecopyi ǹdə́ Lyibi lyì bí gə́ mù dwã nɛ mɔ́ bə̀ y'à də̀ shə̀dɛ́ɛ́sɛ nánzhəzhɔ̌ ǹdə́ eshə-vwə̃tur e súlí eshə-jòmnə nánjə̀jóló nà? Sə ǹ gə́ yà ǹ zhí Cinu Yi ni mú ce, ń yà ń co be ǹ jɔ̃̀ wa. ⁹ Nyǐ Cinu yírhə́ pyǎ lũ w púlə́púlə́ yó, mùnì n sɛ̃ lyì bí byɛ̀bɛ́ bə̀ pyìrhí bə̀ wun gakó bə m'e zǎ ńmyɛ̌ nɛ mɔ́. Sə yò w kɔ̀bɔ́ wẽ́, ǹ twĩ̀ ǹdə nyə̀nyà ta. Rə̀myɛ́ ce, kɔn zhì zà mɔ́, bə̀ m'à j'â n'ê bwí ǹdə́ mɔ́.» ¹⁰ Aza já n kwè lyim ǹdə́ mɔ̀bɔ́ ń nɛ̃́ mɔ́, n ce bə pyi mu byə̀nə́-jù wə. Aza já n nwɛ̀nɛ̀ dwí rí lyì jàlà rə̀myɛ́ mɔ́ yi ní dɛ̃́dɛ̃́. ¹¹ Nyǐ Aza tumə né, nə̀ nã́yə́ə́ né ǹdə́ nə̀ nánkwaá nɛ́ ga, kɛ̃ Zhəda ǹdə́ Esərayɛl pyǎ bɛ́ sɛ́bɛ́ rɛ́ wẽ́. ¹² Aza tú n bə̀ n tu nə̀bwɛ̀nɛ̀ ń pyɛ̀lɛ̀ rɛ́ jú byinə shə́-ètɔ̀ ǹdə́ nə̀bɔ́ byin rí; nə̀rh címí nánfwɛ̀lɛ̀ zɔ mɔ. Sə ń címí y wẽ́ myɛ ń yə̀ sɛ̃ɛ̃́ pyà Cinu sõ yé, è wɔ́ nə̀bwànà-shilnə bé sõ ń pyà sɛ̃ɛ̃́ nɛ́. ¹³ Aza cù ń pyɛ̀lɛ̀ rɛ́ jú byinə shə́-èna ǹdə́ rə̀dù byin rí. ¹⁴ Bə̀ co mo lú-bɔ̀l mɔ́ mɔ̀bɔ́ ń yà ń kù ń cìcì yil mú, Dəvyidi Pyə̀-cɔ w w mɔ́ wa. Bə cĩ́ mu pal rə̀ y'à sú ǹdə́ nǔrh sǝ̀ lwẽ́ nã́nyǝ̀nyɛ̀lɛ́ e súlí wẽ̀ dwã dúdúmə́ dúdúmə́ yó, bə̀ la m'e tɛnɛ ń yala nɛ́, bə súlí bə jéé myǐn nánfɔ̀lɔ̀ ń yil ré còrhó yiləa.