¹ Yi Eshirhə y'à só Obɛɛdɛ byǐ Azarəya yó wə; ² n zɛ̃̀ n vò n nə Aza, n wɔ̀ mɔ: «Ámyɛ̌, pyɔ̌ Aza ǹdə́ Zhəda e súlí Bɛ̃zhamɛ lyì, cili-nə ne! Cinu Yi ŋwɛ́nɛ́ ǹd'ába, ámyɛ gə ŋwɛ́nɛ́ ǹdə́ mɔ yi ní. Á gə pyà mɔ, ń mà n yẽ̌ á nə mɔ; sə á gə yẽ̌ mo, ńmyɛ mà n yẽ̌ ámyɛ nɛ. ³ Esərayɛl lyì byǎ bɛ́ dɛnɛ ǹdə́ bə̀ y'à k'ê bə Yi rí tɛ̀bɛ́ rə̀ wɔ́ zhə̀n mɔ́ zhe yé, bə̀ y'à k'ê bə vwĩ̀-zwə́lnə zhe ń la bɛ còrhò yé, bə̀ y'à k'ê bə Yi nyə́ né zhe yé. ⁴ Sə bə̀ zúzúnú w wẽ́, bə̀ kwɛ̃̀ bə bə̀ Cinu, Esərayɛl Yi rí sõ; bə̀ pyà mɔ sə ń yẽ̌ bə nə mɔ. ⁵ Yi rí rə̀myɛ́ mɔ́ w mɔ́, lò yà ń wàr ń shə́r ń dwi ń kə́ ń kwɛ̃̀ ń twí ǹdə́ yə̀-zùlə́ yé, ywẽ nánfɔ̀lɔ̀ y'à j'â zhe tənèsé lyì bí gakó. ⁶ Tənà èdù gakó y'à n'ê cèè è dõ tənà tɛ̃́, cɔ òdù gakó myɛ n'ô cèè ò dõ cɔ tɛ̃́, bə̀ Yi y'à ce zúzúnú kùrə̀ nánzhəzhɔ̌ y'à búl ò zhe lyì bí. ⁷ Sə ámyɛ̌, zhǐ-nə kẽkẽ, á jɛ̀sɛ́ bə̀k'á lyɛ̀ɛ̀ yé, b'ǎ tum rí b'a zə kwǎndɛ.» ⁸ Aza gə́ já n nyɛ̀ɛ̀ zɔ̀mà nɛ́ nə̀myɛ́ nə̀ shí nyì-zwennə Obɛɛdɛ nyú w mú, ń pɔ wu-jɔ̀ ń cìn ni, n zɛ̃̀ n ce pwarha wẽ̀ ré jé tɛ̃́ Zhəda ǹdə́ Bɛ̃zhamɛ nyí rí gakó wẽ́ e súlí cɛmɛ nɛ́ nyɛ̀bɛ́ gakó ń yà ń zwẽ Efərəyim pyàr rɛ́ w mɔ́. N kə́ n kwɛrhɛ Cinu vwĩ̀-jùlú w ò y'à wɔ Cinu jì y zɔ́nɔ́ w yé y mó o jǐrh nándũ̀. ⁹ N zɛ̃̀ n cĩ́ Zhəda ǹdə́ Bɛ̃zhamɛ lyì bí púlə́púlə́ dwã yó e súlí lyì bí byɛ̀bɛ́ bə̀ y'à dùr bə shí Efərəyim ǹdə́ Manasɛ e súlí Shəmənyɔ̃ kwálsɛ́ w bə bə̀ mɔ́. Esərayɛl lyì byǎ nánzhəzhɔ̌ y'à kwɛ̃̀ bə b'e zù mu bə̀ gə́ tú bə púrí bə̀ Cinu, ń Yi rí yà ń ŋwɛ́nɛ́ ǹdə́ mɔ mɔ́ yi ní mú. ¹⁰ Bə̀ tú dwã yó Zhərəzalɛm nɛ́, Aza pyɛ̀lɛ̀ rɛ́ jú byinə shí ǹdə́ nə̀nu byin rí cànsɛ̀ sə̀tɔ̀ nyǎ y yó. ¹¹ Dɛ̃ rɛ́ rə̀myɛ́ mɔ́ yù wə, bə vùr vwàmá nɛ́ nyɛ̀bɛ́ bə̀ pwà búlə́ né kwã nɛ́ bə m'e bə̀ mɔ́ wẽ́, bə m'e zwə́l vwə̃̀ bə pə Cinu ni: nə̀-byərh zɔ̃̌-nyàlpyɛ̀ (700) ǹdə́ və̌-ywàálɛ mɔ̀ɔ̀rhɛ tàlpyɛ̀ (7 000). ¹² Bə̀ shɛ̀nɛ́ Yi dɔbrɛ́ yò, mùnì ga bə pyà Cinu, bə̀ dabá Yi rí ǹdə́ bə̀ wun gakó ǹdə́ bə̀ surhə gakó. ¹³ Sə lò mɔ̀bɔ́ gakó ń yə̀ Cinu, Esərayɛl Yi rí pyà, ń wɔ́ bə̀sɔ́bwɛ̀lɛ́ ráá náncɛ, ń wɔ́ bal ráá kɛ̃, bə̀ m'a gu mu. ¹⁴ Bə bwəl nyí Yi ni ǹdə́ búbwéé nánfwɛ̀lɛ̀ ǹdə́ còrhó búbwéése, bə wúl pɔ́lsɛ ǹdə́ pyì-byərh nyimi, ¹⁵ Zhəda tənà y púlə́púlə́ fùù nyì-bwelé y èmyɛ́ mɔ́ yilə. È gə́ y'à wɔ́ ǹdə́ bə̀ wun gakó bə̀ m'e bwəl nyí, bə zɛ̃̀ bə̀ n'ê pyà Cinu ǹdə́ bə̀ wun gakó mó ce, Cinu yẽ̌ bə nə mɔ, sə ń pɔ bɛ shìrhə́ kɔn gə́ kə́kɛ́lɛ́ bɛ mɔ́ nyí rí gakó wẽ́. ¹⁶ Pyɔ̌ Aza vùr ń ná náncɛ Maaka gaga mɔ́ pyɔ̌ ná tum rí wẽ́, ń gə́ yà ń wɛ̀rhɛ́ yi nánku Ashəra èsã̌yùlú w yilə. Aza cɔ̀ yi nánku w òmyɛ́ èsã̌yùlú wə́, n bɔbwɛlɛ wa, n súlí n ji w myǐn Sədərɔ̃ nə̀-gɔ̀lɔ̀ w wẽ́. ¹⁷ Sə yə né còrhó jààsɛ́ yə̀ tɛ̃́ jé Esərayɛl nɛ́ yé. E jà Aza yà ń zhí Yi ni ǹdə́ ń wu gakó ń nyǔ mú púlə́púlə́ wẽ́. ¹⁸ N zə sə̀byì-kùlì ǹdə́ sánə́má e súlí wẽ̀ dwã, ńmyɛ̌ ǹdə́ ń da ga y'à pɔ Yi ni mú n mə n bə̀ Yi jì y wẽ́. ¹⁹ Búlə́ k'ê yə̀ jòm kɔn m'e yí Aza pyɛ̀lɛ̀ rɛ́ jú byinə shə́-ètɔ̀ ǹdə́ nə̀nu byin rí yé.