¹ Aza wɛ̀rhɛ́ kɔn rɛ́ tɛ̀bɛ́ rə̀ y'à càn, rə̀ súlí rə̀ y'à wɔ́ cángá Cinu, ń Yi rí yírh wə. ² Ń ce dwə́ né dwã bɛ́ vwĩ̀-jùúlí ǹdə́ vwə̃̀ zwə́l jààsɛ́ jé tɛ̃́, n mà nə́kulə né nyɛ̀bɛ́ bə̀ y'à cìì tɛ̃́ mɔ́ n lo, n súlí n gõ̀ Ashəra pálá nɛ́ bə̀ y'à cìì tɛ̃́ mɔ́ myɛ. ³ N wɔ̀ Zhəda lyì bí ni bə̀ bə̀ pyǎ Cinu, bə̀ nàmbala bɛ́ Yi rí, sə bə tó ń nyə́ né ǹdə́ ń cúcú mú ni. ⁴ N ce vwə̃̀ né zwə́l jààsɛ́ ǹdə́ vwĩ̀-jùúlí tɛ̀bɛ́ bə̀ y'à n'ê ji wẽ̀ ré tɛ̀bɛ́ rə̀ lwẽ́ nã́nyə̀nyɛ̀lɛ́ y nə̀ yó mó jé tɛ̃́ Zhəda cɛmɛ nɛ́ gakó wẽ́, sə tənà y jòm ǹdə́ yə̀-zùlə́ ń pyɛ̀lɛ̀ rɛ́ jú yi ní. ⁵ N lù cɛmɛ nə̀ kə́kɛ́lɛ́ ǹdə́ byíl-fwàlsɛ Zhəda né, bə̀ tənà y y'à zhe yə̀-zùlə́. Sə bə̀ yə̀ bwí ǹdə́ mɔ byinə né nə̀myɛ́ mɔ w yé, bə̀ Cinu yà ń pɔ mɔ shìrhə́. ⁶ N wɔ̀ Zhəda lyì bí ni: «Bà-na nə́ lù cɛmɛ nɛ́ nə̀myɛ́ mɔ́, nə́ kə́kɛ́lɛ́ nɛ ǹdə́ byíl-fwɛ̀lɛ̀ ǹdə́ jì-fwàlsɛ nánjíjínsi sə̀ lù sə vò dɛ̃̌dɛ̃̌ bə̀ m'ê yìlì cɔ w mɔ́ e súlí bwə̀ə̀le rə̀ n'ê sàásɛ: ǹdə́ tənà y gwẽ̌ pyě shɛ́ɛ́ nə́ yé né. Nyǐ nə́ pyà Cinu nə́ Yi rí, nə́ búl nə́ pyà mɔ zhə̀n zhə̀nà sə ń pɔ nə́ba yə̀-zùlə́ kɔn gə́ kə́kɛ́lɛ́ nə́ba mɔ́ nyí rí gakó wẽ́.» Bə j'a zɛ̃̀, bə ŋwɛ̀nɛ́ bə lù cɛmɛ nɛ́ nə̀myɛ́ mɔ́ bə kə́kɛ́lɛ́ nɛ ǹdə́ byíl-fwɛ̀lɛ̀ bə zhɛ̀. ⁷ Aza yà ń zhe Zhəda nunə mɔ̀ɔ̀rhɛ̀ zwã̌-àtɔ̀ (300 000) bə̀ wɔ́ ń shə̀dɛ́ɛ́sɛ, bə̀ mə̀dù gakó yà ń zhe nə̀kò nánfɔ̀lɔ̀ ǹdə́ swé, e súlí Bɛ̃zhamɛ nunə mɔ̀ɔ̀rhɛ̀ zwã̌-àlyè ǹdə́ shə́-lyɛlɛ (280 000), bə̀ y'à zhe nə̀kò-bwɛ̀lɛ́ bə j'à y'à yě twərh myɛ tɔ. Bə̀ gakó y'à wɔ́ búlə́ kàndar. ⁸ Ecopyi lyì bal Zəra zɛ̃̀ n du n bə̀ ń la bú ǹdə́ bɛ ǹdə́ shə̀dɛ́ɛ́sɛ mɔ̀rhɔ̀ mɔ̀rhɔ̀ kùrə̀ mɔ̀rhɔ̀ e súlí eshə-vwə̃tur zwã̌-àtɔ̀, n bə̀ n yí Marəsha. ⁹ Aza du n jəl mo. Bə zɛ̃̀ bə tɛnɛ bə zhì Səfata pyə̀-gɔ́rɔ́ w wa, Marəsha yala nɛ, búlə́ né bú yilə. ¹⁰ Aza byẽ̀ n ce Cinu ń Yi rí ni, n wɔ̀: «Cinu, lò dõ tɛnɛ e súlí ǹmyɛ́ nɛ ń mà n pɔr kàndɔ ǹdə́ nə̀bwɛ̃̀ búlə́ yé. Sɛ̃ nə́ba Cinu nə́ Yi! Bə̀ wɔ́ ǹmyɛ́ nɛ nə́ zhí, e súlí myɛ wɔ́ ǹmyɛ́ yil nə́ tú nə́ la bú ǹdə́ lyì-zhǎ bɛ́ byɛ̀bɛ́. Cinu, ǹ wɔ́ nə́ Yi. Bə̀ numbyíní bə̀k'a zə è cìn e mɛrhɛ ǹmyɛ́ yé.» ¹¹ Cinu Yi ce Ecopyi lyì bí twə̀r Aza ǹdə́ Zhəda lyì bí yé né bə vò kwã nɛ́, Ecopyi lyì bí j'a kwɛ̃̀ bə dùr. ¹² Aza ǹdə́ ń shə̀dɛ́ɛ́sɛ́ sə̀ y'à ŋwɛ́nɛ́ ǹdə́ mɔ mɔ́ jì bí bə m'e yí Gəraarɛ. Ecopyi lyì bí nánzhəzhɔ̌ tu bə cì rə̀myɛ́ ce, bə̀ mə̀dù ga yə̀ dàl nã́nyì yé, b'è wɔ́ Cinu ǹdə́ ń dwí rí yé né bə̀ y'à tu ní bə bɔbwɛlɛ. ¹³ Aza lyì bí pwà wẽ̀ rə̀ y'à búl rə̀ já dɛ̃́dɛ̃́ búlə́ né kwã nɛ́ bə m'e lyɛ̃. ¹⁴ Bə̀ ŋwɛ̀nɛ́ bə zwẽ cɛmɛ nɛ́ nyɛ̀bɛ́ gakó nə̀ y'à kə́kɛ́lɛ́ Gəraarɛ mɔ́, bə̀ Cinu Yi yà ń ce ywẽ nánfɔ̀lɔ̀ zə nɛ, bə zɛ̃̀ bə bubu nə̀ gakó, bə̀ wẽ̀ ré tɛ̀bɛ́ bə̀ y'à wɔ̌ bə̀ m'a bubu mú y'à já nə̀ wẽ́. ¹⁵ Bə vò bə zù vwàmá jilə né wẽ́, bə pwà və̌-ywàálɛ nánzhəzhɔ̌ ǹdə́ yómde. Rə̀myɛ́ kwã nɛ́, bə̀ kwɛ̃̀ bə vò Zhərəzalɛm.