¹ Abya jǐrh Zhəda pyɔ̌ Zhərɔbwam pyɛ̀lɛ́ rɛ́ jú byinə shí ǹdə́ lyɛlɛ byin rí. ² Ń jòm Zhərəzalɛm nɛ́ n mə n jí pyɛ̀lɛ̀ rɛ́ byinə nə̀tɔ̀. Ń ná mɔ́ yà ń yíl Myəkaya. Ń yà ń wɔ́ Jəbəya lyì bal Urəyəə bə̀kɔ́. Búlə́ jòm Abya ǹdə́ Zhərɔbwam cəcəl wə. ³ Abya bú búlə́ né ǹdə́ shə̀dɛ́ɛ́sɛ sə̀ y'à wɔ́ búlə́ kàndar; shə̀dɛ́ɛ́sɛ mɔ̀ɔ̀rhɛ̀ zwã̌-àna (400 000) shɛ̀bɛ́ sə̀ y'à yě kɔn du sə̀ dwã bɛ́ mɔ́ gakó. Zhərɔbwam myɛ̌ zɛ̃̀ n ce shə̀dɛ́ɛ́sɛ mɔ̀ɔ̀rhɛ̀ zɔ̃̌-lyɛlɛ (800 000) sə̀ wɔ́ kàndar sə j'à yě kɔn du sə̀ dwã bɛ́ tùrhì sə zhì sə̀ la bú ǹdə́ mɔ. ⁴ Abya jì n vò n zhì Shəmərəyim pyɔ̀ w ò wɔ Efərəyim pyàr rɛ́ w mɔ́ yə́-pɛ̀lɛ́ wa, n zɛ̃̀ n wɔ̀: «Cili-nə ne, Zhərɔbwam ǹdə́ Esərayɛl lyì byǎ púlə́púlə́. ⁵ Á nə yə̀l bə̀ Cinu, Esərayɛl Yi rí, pɔ pyɛ̀lɛ̀ Dəvyidi ǹdə́ ń byǎ bɛ́ nɛ Esərayɛl yó w gaga yilə, rə̀ wɔ́ nyí tɛ̀bɛ́ kɔn nə wɔ̌ rə̀ m'a kwǎrh nà? ⁶ E jà Nəbaatɛ byǐ Zhərɔbwam, Dəvyidi byǐ Saləmɔ tùntùnnə mó, já n zɛ̃̀ ń nə́ ń bwí ǹdə́ ń yó-cə́bal mɔ́, ń bə shɛ̀ ń nyí ni shɔ̀nɔ́ yé. ⁷ Lyì-bəyùúrhi ǹdə́ lyì bə̀ bə kùr zhe zɛ̃̀ bə b'e mù dwã nɛ bə ce nyí Zhərɔbwam kwã nɛ́, bə̀ nyí zɛ̃̀ e ŋwɛ̀nɛ́ Saləmɔ byǐ Orɔbwam. Orɔbwam gə́ yà ń wɔ́ ébɔ́-dǎl ń wu w j'à gwẽ̌ bə jɛ̀ mɔ́ ce, ń yə̀ ŋwɛ̀nɛ́ n cə̀r bə̀ nyǎn rɛ́ yé ne yé. ⁸ Èlǎsɛ̃́, á zhe b'ǎ t'á la Cinu Yi pyɛ̀lɛ̀ rɛ́ ń co Dəvyidi byǎ bɛ́ jɔ̃̀ w mɔ́ yò shɔ̀nɔ́ yé! Á búl á já dɛ̃́dɛ̃́, è jà sánə́má nũ̌-bwə̀lsé Zhərɔbwam zùrhì n pə ába sə̀ wɔ́ á yə mó ŋwɛ́nɛ́ ǹd'ába. ⁹ Á nə yə̀ Aarɔ̃ byǎ bɛ́ bə̀ wɔ́ Cinu vwĩ̀-zwə́lnə bé ǹdə́ Levyi dwí rí lyì bí jì, á zɛ̃̀ á cír á sə̀pwà vwĩ̀-zwə́lnə ǹdə dwə́ né dwã bɛ́ lyì bí ta nà? Lò mɔ̀bɔ́ gakó ń yà ń nə́ ń zal nə̀-bya ń vwàmá nɛ́ wẽ́ ǹdə́ pyì-byərh shàlpyɛ̀ ń mə́ ń twí mùnì bə pɔ̃ ŋwɔ̀nɔ́ n jǐrh vwĩ̀-zwə́lnə mó yà ń já ń nə́ ń jǐrh yə né nə̀myɛ́ nə̀ də̀ yə mó vwĩ̀-zwə́lnə. ¹⁰ Sə è gə wɔ́ nə́myɛ̌ yilə, Cinu Yi ń wɔ́ nə́ Yi, sə nə́ yə̀ mo yẽ̌ yé: vwĩ̀-zwə́lnə bé byɛ̀bɛ́ bə̀ n'ê twĩ̀ Cinu yil mú wɔ́ Aarɔ̃ byǎ, Levyi dwí rí lyì bí myɛ zɛ̃̀ bə̀ n'ê twĩ̀ bə̀ tum rí! ¹¹ Bə̀ n'ê ji vwə̃̀ námpúmə́ cɛ̃́ɛ̃́ nɛ́ myǐn Cinu yilə, nəkɔkɔ́lɛ́ ǹdə́ də̀dɛ̀nɛ́ gakó; èta myɛ ǹdə́ wẽ̀ ré tɛ̀bɛ́ rə̀ lwẽ́ wɔ́ nã́nyə̀nyɛ̀lɛ́ mɔ́. Bə̀ n'ê cĩ́ búrú w jùlú w kɔ̀bɔ́ ò bə jìmdi zhe mó yó, bə n'ê ji pàntámsɛ́ sə̀ wɔ ku w bə̀ n'ê cĩ́ pàntámsɛ́ ò yó ò zùrhì ǹdə́ sánə́má mɔ́yó. Nyǐ nə́myɛ̌ n'ê twĩ̀ Cinu, nə́ Yi rí tum rí, sə ámyɛ̌ yẽ̌ mo. ¹² Nyǐ Yi ŋwɛ́nɛ́ ǹdə́ nə́ba, rə̀ wɔ́ nə́ pyɔ̌, rə̀ vwĩ̀-zwə́lnə bé ŋwɛ́nɛ́ ǹdə́ nə́ba ǹdə́ bə̀ pɔ́lsɛ́ bə̀ tɛnɛ bə zhɛ̀ bə̀ la búlə́ né bú ǹd'ába mɔ́ kùr jirə́ y wúl. Esərayɛl lyì byǎ, á bə̀k'á bú ǹdə́ Cinu, á nàmbala bɛ́ Yi rí yé, b'ǎ t'á la bɛlɛ jú yé.» ¹³ Rə̀myɛ́ yi ní, Zhərɔbwam yà ń ce shə̀dɛ́ɛ́sɛ kùkùl vò rə shèè Zhəda lyì bí kwã nɛ́, rə̀myɛ́ mɔ́ y'à ce Zhəda lyì bí y'à zɛ̃̀ bə̀ wɔ Esərayɛl lyì byǎ bɛ́ shə̀dɛ́ɛ́sɛ́ ǹdə́ shə̀dɛ́ɛ́sɛ́ kùkùl ré tɛ̀bɛ́ rə̀ shèè mó cəcəl wə. ¹⁴ Zhəda lyì bí gə́ pyìrhí, bə̀ púrí bə̀ kɔn y'à n'ê nyɛ́ɛ́ bɛ bə̀ bə̀ bú bə̀ yé né ǹdə́ bə̀ kwã nɛ́ ga. Bə zɛ̃̀ bə wǔrh bə ce Cinu ni, rə̀myɛ́ yi ní ǹdə́ vwĩ̀-zwə́lnə bé n'ê wúl pɔ́lsɛ́. ¹⁵ Zhəda lyì bí mà búlə́ bú búbwéé y bə ce né. Sə bə̀ gə́ y'à n'ê mà y yi ní, Yi ce Zhərɔbwam ǹdə́ Esərayɛl lyì byǎ bɛ́ púlə́púlə́ twə̀r Abya ǹdə́ Zhəda lyì bí yé né bə vò kwã nɛ́. ¹⁶ Esərayɛl lyì byǎ bɛ́ dùr Zhəda lyì shə̀dɛ́ɛ́sɛ́ yé né, sə Yi co be bə̀ jɔ̃̀ wa. ¹⁷ Abya ǹdə́ ń dwí rí búl bə ŋwɛ̀nɛ́ bɛ: Bə̀ zɔ Esərayɛl lyì byǎ bɛ́ byɛ̀bɛ́ bə̀ y'à yě kɔn du bə̀ dwã bɛ́ nunə mɔ̀ɔ̀rhɛ̀ zwã̌-ànu (500 000) bə gu. ¹⁸ Cìzhìl nánfɔ̀lɔ̀ zɔ Esərayɛl lyì byǎ bɛ́ rə̀myɛ́ mɔ́ yi ní, sə Zhəda lyì bí jú bɛlɛ, bə̀ gə́ y'à zhí Cinu Yi, bə̀ nàmbala bɛ́ Yi rí ni mú yilə. ¹⁹ Abya pú Zhərɔbwam kùr n jì, n zwẽ ń cɛmɛ: Bətɛl ǹd'ô cə-bwǎlsɛ́ ò yala nɛ mɔ́ ǹdə́ Yəshana ǹd'ô cə-bwǎlsɛ́ ò yala nɛ mɔ́ e súlí Efərɔ̃ ǹd'ô cə-bwǎlsɛ́ ò yala nɛ mɔ́. ²⁰ Zhərɔbwam kə́ ń yə̀ ŋwɛ̀nɛ́ n zə jàn Abya yi ní yé. Cinu mà mɔ n já n cì. ²¹ Sə Abya myɛ̌ jàn rɛ́ súlí. N jí kana shí ǹdə́ bə̀na, n lù bala-byǎ shí-èlyè ǹdə́ bə̀lyè e súlí kana-byǎ shí ǹdə́ bwə̀ldù. ²² Abya tumə né dwã bɛ́, kɔn tɛ̀bɛ́ ń wɛ̀rhɛ́ ǹdə́ kɔn tɛ̀bɛ́ ń zɔ̀m, kɛ̃ nyì-zwennə Yədo sɛ́bɛ́ rɛ́ wẽ́. Abya cùwə̀ sə bə̀ co mo Dəvyidi Pyə̀-cɔ w wa. Ń byǐ Aza jǐrh pyɔ̌ ń jàà wa.