¹ Orɔbwam pyɛ̀lɛ̀ rɛ́ gə́ y'à tú rə kwɛrhɛ rə cĩ́ kùr rə̀ jě cɛ̀nɛ̀ yi ní, ń yẽ̌ Cinu nyə́ né zõ mó ne. Esərayɛl dwí rí púlə́púlə́ myɛ j'a kwè ń nà yá. ² Sə ń pyɛ̀lɛ̀ rɛ́ jú byinə nə̀nu byin rí, Ezhibti pyɔ̌ Shəshaakɛ tú n bə̀ n bú ǹdə́ Zhərəzalɛm, Orɔbwam ǹdə́ Esərayɛl lyì byǎ bɛ́ gə́ y'à dó Cinu ni mú yilə. ³ Shəshaakɛ yà ń zhe eshə-vwə̃tur mɔ̀rhɔ̀ ǹdə́ zwã̌-àlyè (1 200) ǹdə́ eshə-jòmnə mɔ̀ɔ̀rhɛ̀ shə́-shə̀ldù (60 000) e súlí lyì nánzhɔ̌ bə̀ bə yó zhe bə̀ la byilu bə̀ y'à tó mo bə shí Ezhibti bə bà: Lyibi lyì ǹdə́ Suuki lyì e súlí Ecopyi lyì. ⁴ Shəshaakɛ zwẽ Zhəda cɛmɛ nɛ́ bə̀ y'à lù byíl-fwàlsɛ bə m'e kə́kɛ́lɛ́ nɛ mɔ́, n zɛ̃̀ n lyɛ̃ n yí Zhərəzalɛm. ⁵ Nyì-zwennə Shəmaya bə̀ n nə Orɔbwam ǹdə́ Zhəda yó-cìnə́ bé, bə̀ y'à tú dwã yó Zhərəzalɛm nɛ́, ǹdə́ Shəshaakɛ bwəlse, n wɔ̀ bɛ: «Nyǐ Cinu nyí rí: Ámyɛ̌ yẽ̌ ne; rə̀myɛ́ ce, àmyɛ yẽ̌ ába a ce Shəshaakɛ jɔ̃̀ wa.» ⁶ Esərayɛl lyì byǎ bɛ́ yó-cìnə́ bé ǹdə́ Esərayɛl pyɔ̌ mɔ́ ga lwəl bə̀ cìn tɛ̃́, bə súlí bə wɔ̀: «Cinu Yi gə́ wɛ̀rhɛ́ ma mɔ́ mǎ.» ⁷ Cinu Yi gə́ púrí bə̀ lwəl bə̀ cìn tɛ̃́, ń wə̀l Shəmaya nɛ: «Bə̀ lwəl bə̀ cìn tɛ̃́. À t'â la ce bə jé tɛ̃́ yé. Kɔn gə yàl námpɔ́lɛ́ à m'a zwẽ be, b'à t'â la Shəshaakɛ dɛnnɛ tó a ló à lyi-shùùrí Zhərəzalɛm yó w yé. ⁸ Ǹdə́ rə̀myɛ́ ga, bə̀ m'a yə̀ ń tùntùnnə, sə bə̀ m'a lwar bə̀ nyǐ e twĩ̀ e pə àmyɛ́ nɛ ǹdə́ e twĩ̀ e pə lũ w pyǎ bɛ́ nɛ, də̀ kɔn rə̀dù yé.» ⁹ Ezhibti pyɔ̌ Shəshaakɛ já n bə̀ n bú ǹdə́ Zhərəzalɛm. N pwà Cinu jì y nə̀cɛ̀ndɛ́ e súlí pyɔ̌ mɔ́ jì y nə̀cɛ̀ndɛ́. N pwà rə̀ gakó lyə́m lyə́m. N pwà sánə́má nə̀kwə̀r ré Saləmɔ yà ń zùrhì mú myɛ cìcì. ¹⁰ Pyɔ̌ Orɔbwam zùrhì rə̀ dwã ǹdə́ kàmmɔ n cĩ́ rə̀ jàà wa, n kwè re n pə pyɔ̌-kɛ̀lɛ́ y bwə̀rə̀ nyí rí yìlnə bé yó-cìnə́ bé ne bə̀ n'ê nyǐ rə̀ yò. ¹¹ Èta, pyɔ̌ mɔ́ gə la Cinu jì y wẽ́ gakó, bwə̀rə̀ y nyí rí yìlnə bé y'à n'ê twí bə̀ pwà rɛ, sə rə̀myɛ́ kwã nɛ́ bə̀ y'à n'ê zə rɛ bə̀ kwɛ̃̀ bə̀ twí bə̀ cĩ́ bə̀ jì y wẽ́. ¹² Pyɔ̌ mɔ́ gə́ yà ń lwəl ń cìn tɛ̃́ mɔ́ ce, Cinu lyim k'ê yə̀ mo yì yé, ń kə́ ń yə̀ ce n jé tɛ̃́ lyə́m lyə́m yé, bə̀ kɔn tɛ̀bɛ́ rə̀ càn mɔ́ y'à gwẽ̌ wɔ Zhəda né. ¹³ Pyɔ̌ Orɔbwam jàn rɛ́ kwɛrhɛ rə súlí, n jí pyɛ̀lɛ̀ Zhərəzalɛm nɛ́. Ń tú n bə̀ n jǐrh pyɔ̌ ǹdə́ ń yà ń zhe byinə shə́-èna ǹdə́ rə̀dù; sə ń jú pyɛ̀lɛ̀ rɛ́ Zhərəzalɛm nɛ́, cɔ w kɔ̀bɔ́ Cinu yà ń cír Esərayɛl lyì byǎ bɛ́ kwálsɛ́ gakó wẽ́, ò la yə̀ ńmyɛ̌ cɔ mɔ́, byinə shí ǹdə́ nyàlpyɛ̀. Orɔbwam ná mɔ́ yà ń yíl Naama, Amɔ̃ byǎ bɛ́ bə̀kɔ́. ¹⁴ Ń twĩ̀ lwɛlɛ, bə̀ ń yə̀ Cinu pyà ǹdə́ ń wu gakó yé. ¹⁵ Orɔbwam tumə né, nə̀ nã́yə́ə́ né ǹdə́ nə̀ nánkwaá nɛ́ ga, yə̀ kɛ̃ nyì-zwennə Shəmaya Tumə né sɛ́bɛ́ rɛ́ ǹdə́ Yədo, mɔ̀bɔ́ ń nɛ̃́ mɔ́, Tumə né sɛ́bɛ́ rɛ́ wẽ́ nà? Orɔbwam ǹdə́ Zhərɔbwam y'à j'â búl bə̀ n'ê bwí dwã bə̀ j'â ŋwɛ́nɛ́. ¹⁶ Orɔbwam tú n bə̀ n cì, sə bə̀ co mo Dəvyidi Pyə̀-cɔ w wa. Ń byǐ Abya jǐrh pyɔ̌ ń jàà wa.