koussoube-marc-lee_2ch_text

Kǝ̀kàl-fwɛ̀lɛ̀ 11

¹ Orɔbwam gə́ tú n bə̀ n yí Zhərəzalɛm, ń cĩ́ Zhəda kwálá y ǹdə́ Bɛ̃zhamɛ kwálá y shə̀dɛ́ɛ́sɛ dwã yó, sə̀ y'à wɔ́ mɔ̀ɔ̀rhɛ̀ zɔ̌m ǹdə́ shə́-lyɛlɛ (180 000), shɛ̀bɛ́ sə̀ y'à yě kɔn du sə̀ dwã bɛ́ mɔ́, ń la mə n vò n bú ǹdə́ Esərayɛl lyì byǎ bɛ́ mùnì ga ńmyɛ̌ Orɔbwam zwẽ tənà y n cìní. ² Sə Cinu Yi wə̀l Yi lò Shəmaya nɛ: ³ «Wál Saləmɔ byǐ Orɔbwam, Zhəda pyɔ̌ mɔ́, ǹdə́ Esərayɛl lyì byǎ bɛ́ púlə́púlə́ bə̀ wɔ Zhəda tənà y ǹdə́ Bɛ̃zhamɛ tənà y w mɔ́ nɛ: ⁴ ‹Nyǐ Cinu nyí rí: á bə mə̌ sə á vò á bú ǹd'á da-byǎ bɛ́ yé. Á mə̀dù mə̀dù gakó kwɛ̃̀ n vò jè! Nyǐ wɔ́ àmyɛ́ à ce kɔn yàl èta.› » Sə bə̀ cili Cinu zɔ̀mà nɛ́ bə̀ k'ê yə̀ zhə̀l bə bú ǹdə́ Zhərɔbwam yé. ⁵ Orɔbwam gə́ tú n bə̀ ń jě Zhərəzalɛm nɛ́ yi ní, ń lù byílsi n mə n kə́kɛ́lɛ́ Zhəda tənà y cɛmɛ jàlà. ⁶ Ń lù Bɛtǝlǝyɛm ǹdə́ Etam ǹdə́ Təkɔwa ⁷ ǹdə́ Bɛtɛ-Shuuri ǹdə́ Soko ǹdə́ Adəlam ⁸ ǹdə́ Gaatɛ ǹdə́ Marəsha ǹdə́ Ziifi ⁹ ǹdə́ Adɔrəyim ǹdə́ Ləciishi ǹdə́ Azəka ¹⁰ ǹdə́ Sɔrɛya ǹdə́ Ayalɔ̃ ǹdə́ Ebərɔ̃, cɛmɛ nə̀ kə́kɛ́lɛ́ ǹdə́ byíl-fwàlsɛ Zhəda ǹdə́ Bɛ̃zhamɛ tənèsé wə. ¹¹ Orɔbwam lù byíl-fwàlsɛ n mə n kə́kɛ́lɛ́ nɛ, n cír lyì bə la cìní ni, n súlí n lù jíjí ǹdə́ nwə̃̌ e súlí də̀vɛ̃́ cṹ jààsɛ nə̀ wẽ́. ¹² Nə̀kwə̀r ǹdə́ swə́ y'à ŋwɛ́nɛ́ cɔ gakó wẽ́. N ce cɛmɛ nɛ́ nə̀myɛ́ mɔ́ zɛ̃̀ nə̀ zhe jàn dɛ̃́dɛ̃́. Èta, n já n cìní Zhəda ǹdə́ Bɛ̃zhamɛ tənèsé. ¹³ Vwĩ̀-zwə́lnə bé ǹdə́ Levyi dwí rí lyì bí bə̀ y'à wɔ Esərayɛl tənà y púlə́púlə́ w mó shí bə̀ cɛmɛ nɛ́ w bə b'e ce nyí Orɔbwam kwã nɛ́. ¹⁴ Levyi dwí rí lyì bí y'à zhǐr bə yẽ̌ bə̀ vwàmá gɔ-dɔ́m-jààsɛ́ ǹdə́ bə̀ cɛsɛ́ nɛ, bə vò Zhəda ǹdə́ Zhərəzalɛm, bə̀ Zhərɔbwam ǹdə́ ń byǎ bɛ́ y'à n'ê cə̀r be bə̀ bə̀ twĩ̌ bə̀ vwĩ̀-zwə́lnə tum rí Cinu yilə. ¹⁵ Zhərɔbwam yà ń cír lyì n ce bə jǐrh ńmyɛ̌ vwĩ̀-zwə́lnə vwə̃̀ né zwə́l jààsɛ́ ǹdə́ bə̀-cǐlsí e súlí nũ̌-bwə̌lsé bə̀ y'à zùrhì mú yilə. ¹⁶ Lyì bí byɛ̀bɛ́ bə̀ y'à n'ê pyà Cinu, Esərayɛl Yi rí, ǹdə́ bə̀ wun gakó mó, shí Esərayɛl kwálsɛ́ gakó wẽ́ bə tó bə̀ kùr bə bə̀ Zhərəzalɛm bə̀ la zwə́l vwə̃̀ bə pə Cinu, bə̀ nàmbala bɛ́ Yi rí ni. ¹⁷ Bə̀ ce Zhəda tənà y jàn rɛ́ súlí, bə̀ kwɛ̃́ Saləmɔ byǐ Orɔbwam byinə nə̀tɔ̀ wẽ́, bə̀ byinə nə̀tɔ̀ wẽ́ ń yà ń kwè Dəvyidi ǹdə́ Saləmɔ nà. ¹⁸ Orɔbwam jú Yərəmɔɔtɛ bə̀kɔ́ Maalaatɛ, Yərəmɔɔtɛ yà ń wɔ́ Dəvyidi ǹdə́ Abyəyəyil byǐ. Abyəyəyil yà ń wɔ́ Eləyaabɛ bə̀kɔ́, Eləyaabɛ zɛ̃̀ ń yà ń wɔ́ Zhese byǐ. ¹⁹ Maalaatɛ lùl byǎ n pɔ̃: Yəwuushi ǹdə́ Shəmarəya e súlí Zaam. ²⁰ Ńmyɛ̌ kwã nɛ́, ń jú Abəsalɔ̃ bə̀kɔ́ Maaka, n lù Abya ǹdə́ Atəyi ǹdə́ Zəza e súlí Shəlomyiiti n pɔ̃. ²¹ Orɔbwam swéné Abəsalɔ̃ bə̀kɔ́ Maaka dwini ń kana bɛ́ ǹdə́ ń kana-dwã bɛ́ gakó; ń yà ń zhe kana shí ǹdə́ lyɛlɛ ǹdə́ kana-dwã shə́-shə̀ldù. Ń lùl bala-byǎ shí-èlyè ǹdə́ lyɛlɛ ǹdə́ kana-byǎ shə́-shə̀ldù. ²² Orɔbwam pə náncɔɔrɛ́ Maaka byǐ Abya nɛ, bə̀ ń yà ń nə́ ń yǎl n ce n yə̀ pyɔ̌. ²³ Ń yà ń nɔ surhə n làà ń byǎ bɛ́ Zhəda ǹdə́ Bɛ̃zhamɛ tənèsé wẽ́, e súlí cɛmɛ nɛ́ nyɛ̀bɛ́ bə̀ lù byíl-fwàlsɛ́ bə m'e kə́kɛ́lɛ́ nɛ mɔ́ wẽ́; n pə bɛ jíjí rə̀ y'à búl rə̀ já zhə̀n zhə̀nà, n súlí n pə bɛ kana nánzhəzhɔ̌.