¹ Orɔbwam yà ń zɛ̃̀ n vò Shəshɛm bə̀ wɔ́ gàà Esərayɛl lyì byǎ bɛ́ púlə́púlə́ y'à zhə̀l bə gùlí dwã nɛ́ bə̀ la m'e cír mu n yə̀ bə̀ pyɔ̌ nɛ́. ² Rə̀myɛ́ yi ní ǹdə́ Nəbaatɛ byǐ Zhərɔbwam yà ń ŋwɛ́nɛ́ Ezhibti ní, ń gə́ yà ń dùr n vò mə̀gã̌ mùnì ga n lú pyɔ̌ Saləmɔ yé né mó. Zhərɔbwam gə́ nyɛ̀ɛ̀ dwã-gùlú w Shəshɛm nɛ́ mɔ́ yò, n já n shí Ezhibti n kwɛ̃̀ n bà. ³ Bə twĩ̀ lyì bə vò bə byẽ̀ mo, n zɛ̃̀ n bə̀ n tó Esərayɛl lyì byǎ bɛ́ gakó ne. Bə zɔ̀m ǹdə́ Orɔbwam, bə wɔ̀: ⁴ «Ǹ da Saləmɔ ce nə́ zhĩ zhĩĩ nánvovòló; èlǎsɛ̃́, ǹmyɛ́ bɔ̌ ń yómdé tumə né dùmì rí e súlí zhĩĩ nándùdṹ w ń nyɛ́ɛ́ nə́ba nə́ n'ê zhĩ mú dùmì rí, èta nə́ la zɛ̃̀ nə́ yə̀ ǹ tùntùnnə.» ⁵ N lyár bɛ n wɔ̀: «Zhəl-nə jè, sə á k'á kwɛ̃̀ á bə̀ dwã nə̀tɔ̀ zà.» Dwí rí j'a zhǐr rə vò jè. ⁶ Pyɔ̌ Orɔbwam zɛ̃̀ n vò n bwə̀rh náncɛsɛ́ shɛ̀bɛ́ sə̀ y'à wɔ́ ń da Saləmɔ tùntùnnə ǹdə́ ń yírhə́ y'à gwẽ̌ ŋwɛ́nɛ́ yi ní n wɔ̀: «Etər á n'á cící ni b'à lyár dwí rí tɛ̀bɛ́ nɛ́?» ⁷ Bə wɔ̀ mɔ: «Ǹ gə zɔ wu-bɔ̀nɔ̀ ǹdə́ dwí rí tɛ̀bɛ́, ń zwẽ rə̀ lwə̌l mó, ń súlí ń lyár rɛ ǹdə́ zɔ̃̀-ènyɛ̀là, rə̀ m'a yə̀ ǹ tùntùnnə twéé gakó.» ⁸ Sə Orɔbwam yə̀ náncɛsɛ́ cúcú mú sə̀ y'à pɔ mɔ mɔ́ kwè ǹdə wɔ́ kɔn tɛ̀bɛ́ rə̀ zhe kùr ta yé. Ń zhə̀l n zhərh ǹdə́ ń shí-dwã ébwá-dàlá bɛ́ bə̀ y'à wɔ́ ń tùntùnnə mó. ⁹ N bwə̀rh be n wɔ̀: «Nyǐ-nə dwí rí tɛ̀bɛ́ wə̀l ne: ‹Bɔ̌ zhĩĩ rí tɛ̀bɛ́ ǹ da nyɛ́ɛ́ nə́ba nə́ n'é zhĩ mú dùmì rí›. Etər ámyɛ̌ n'á cící ni b'à lyár rɛ nɛ́?» ¹⁰ Ń shí-dwã ébwá-dàlá bɛ́ wɔ̀ mɔ: «Nyǐ kɔn rɛ́ tɛ̀bɛ́ ǹ la dwí rí tɛ̀bɛ́ rə̀ wə̀l mó mó: ‹Ǹ da ce nə́ zhĩĩ rí dùm sə ǹmyɛ́ bɔ̌ rə̀ dùmì rí›, lyár mɔ́: ‹À jə̀fɔ́lɛ́ námpɔ́lɛ́ y já du à da vɔ̃̀ wá. ¹¹ À da gə́ zhĩ ába zhĩĩ tɛ̀bɛ́ rə̀ dùm mú ce, kɔn zhí zà, àmyɛ́ m'a súlí á zhĩĩ rí dùmì rí. À da zə ywǎlsɛ n mə n pə ába còrhò-tum, àmyɛ́ wɔ́ dã̀nə̀shàárɛ ǹdə́ rə̀ cɛ̌bsɛ à la m'a pə ába còrhò-tum.› » ¹² Dwã nə̀tɔ̀ dɛ̃ rɛ́ yù wə, Zhərɔbwam ǹdə́ dwí rí kwɛ̃̀ bə bə̀ Orɔbwam sõ ǹdə ń gə́ yà ń wə̀l be né: «Kwɛ̃̀-na á bə̀ dwã nə̀tɔ̀ zà.» ¹³ Sə pyɔ̌ mɔ́ yə̀ náncɛsɛ́ cúcú mú sə̀ y'à pɔ mɔ mɔ́ zwẽ yé, n zɛ̃̀ n lyár bɛ ǹdə́ zɔ̃̀-kùlə̀; ¹⁴ ń zwẽ ń shí-dwã ébwá-dàlá bɛ́ cúcú mú n zɛ̃̀ n wɔ̀ dwí rí ni: «À da ce á zhĩĩ rí zə dùmì, àmyɛ́ m'a súlí rə̀ dùmì rí. Ń zə ywǎlsɛ n mə n pə ába còrhò-tum, àmyɛ́ wɔ́ dã̀nə̀shàárɛ ǹdə́ rə̀ cɛ̌bsɛ à la m'a pə ába còrhò-tum.» ¹⁵ Pyɔ̌ mɔ́ yə̀ dwí rí cili yé. Wɔ́ Cinu ń ce kɔn yàl èta bə̀ ń yà ń nə́ ń yǎl n tó rə̀myɛ́ mɔ́ dɛnnɛ n pyìrh kɔn rɛ́ tɛ̀bɛ́ ń yà ń tó Shilo lyì bal Ayəya dɛnnɛ n byili Nəbaatɛ byǐ Zhərɔbwam nɛ mɔ́. ¹⁶ Esərayɛl lyì byǎ bɛ́ púlə́púlə́ gə́ púrí pyɔ̌ mɔ́ yə̀ be cili, bə zɛ̃̀ bə wɔ̀ mɔ: «Cəl tɛ̌ nə́ zhe ǹdə́ Dəvyidi? Nə́myɛ̌ ǹdə́ Zhese byǐ mú bə cəl zhe dwã yó yé! kwɛ̃̀-na nə́ vò nə́ kwə̀ə́rhé wẽ́ Esərayɛl lyì byǎ! Zɛ̃̀ ń cili ǹ kɛ̀lɛ́ y sõ èlǎsɛ̃́, Dəvyidi!» Sə Esərayɛl lyì byǎ bɛ́ kwɛ̃̀ bə vò bə̀ kwə̀ə́rhé wẽ́. ¹⁷ 17 Sə rə̀myɛ́ kwã nɛ́, Orɔbwam wɔ́ Esərayɛl lyì byǎ bɛ́ byɛ̀bɛ́ bə̀ y'à jě Zhəda cɛmɛ nɛ́ wẽ́ mó dúdú ń cìní. ¹⁸ 18 Ń twĩ̀ tũ̀-kùlə̀ né yó-cə́bal Adɔram Esərayɛl lyì byǎ bɛ́ sõ, sə bə̀ dul mu ǹdə́ nə́kulə bə gu. Orɔbwam cìcì mú nɔ yó-nyɔ̃̀ n ŋwɛ̀nɛ́ n zù ń búlə́ eshã-vwə̃tu w wẽ́, n dùr n vò Zhərəzalɛm n mə n lú. ¹⁹ Esərayɛl lyì byǎ bɛ́ j'a cẽ Dəvyidi kɛ̀lɛ́ lyì bí nyí ni shɔ̀nɔ́ yò kɔn b'e yí zà.