¹ À dɔwabá nántwǝ̌rh, lyì bí byɛ̀bɛ́ bǝ̀ n'ê myìnì bǝ̀ dwã bɛ́ bǝ̀ bǝ̀myɛ́ wɔ́ Yi nyì-zwennǝ mó sú lũ w wẽ́. Rǝ̀myɛ́ ce, á bǝ̀k'á zwẽ lyì bí byɛ̀bɛ́ gakó bǝ̀ n'ê wǝ̀l bǝ̀ Yi Eshirhǝ y ŋwɛ́nɛ́ bǝ̀myɛ́ wẽ́ mó zɔ̀mà nɛ́ yé. Zhìlìnǝ̀ á yala nɛ́ á pyà bǝ̀ yé-shò náàcɛ̀nɛ́, á nyǐ ǹdǝ́ è gǝ wɔ́ Yi Eshirhǝ y è ŋwɛ́nɛ́ bǝ̀ wẽ́ zhǝ̀nà. ² Nyǐnǝ á gǝ́ b'ǎ tó né á lwar lò mɔ̀bɔ́ Yi Eshirhǝ y ŋwɛ́nɛ́ ń wẽ́ mó párá: lò mɔ̀bɔ́ gakó ǹ nǝ́ ǹ wǝ̀l bǝ̀ Yezu Kristǝ jǐrh numbyíní n bǝ̀ lũ w wẽ́ zhǝ̀nà, Yi Eshirhǝ y ŋwɛ́nɛ́ ǹ wẽ́. ³ Sǝ lò mɔ̀bɔ́ gakó ǹ tá ǹ yǎl ń zwẽ yò w òmyɛ́ Yezu Kristǝ shò-kwã nɛ́ mɔ́ nyí, Yi Eshirhǝ y tɛ̀nɛ́ ǹ wẽ́ yé. Wɔ́ Kristǝ zù-bal mɔ́ éshìrhǝ́ y è ŋwɛ́nɛ́ ǹ wẽ́. Á nyɛ̀ɛ̀ bǝ̀ nyǐ Kristǝ zù-bal mɔ́ mà n bà, sǝ èlǎsɛ̃́, ń tú ń ŋwɛ́nɛ́ lũ w wẽ́. ⁴ À byǎ, ámyɛ̌ wɔ́ Yi lyì. Á jú bɛlɛ lyì bí byɛ̀bɛ́ bǝ̀ n'ê myìnì bǝ̀ dwã bɛ́ bǝ̀ bǝ̀myɛ́ wɔ́ Yi nyì-zwennǝ mó yó, bǝ̀ Eshirhǝ y kɛ̀bɛ́ è ŋwɛ́nɛ́ á wẽ́ mó jàn dɛ́ du kɛ̀bɛ́ è ŋwɛ́nɛ́ bǝ̀myɛ́ wẽ́ mó. ⁵ Bǝ̀ gǝ́ wɔ́ lũ w lyì mú ce, bǝ̀ n'ê zɔ̀m ǹdǝ lũ w lyì bí ta. Rǝ̀myɛ́ ce, lũ w lyì bí n'ê cili bǝ̀ zɔ̀mà nɛ́. ⁶ Sǝ nǝ́myɛ̌ wɔ́ Yi lyì. Lò mɔ̀bɔ́ ń yě Yi párá, ń nǝ́ ń cili nǝ́ zɔ̀mà nɛ́, sǝ lò mɔ̀bɔ́ ń yǝ̀l Yi párá, ń tá ń cili nǝ́ zɔ̀mà nɛ́ yé. Wɔ́ èta nǝ́ b'ǎ tó né nǝ́ lwar zhǝ̀n Eshirhǝ y ǹdǝ́ yǔr éshìrhǝ́ y pár dwã wa. ⁷ À dɔwabá nántwǝ̌rh, swénénǝ nǝ́ swéné dwã, bǝ̀ sónó w wɔ́ Yi sõ ò n'ô shí ní. Lò mɔ̀bɔ́ gakó ǹ só ǹ dõ, ǹ wɔ́ Yi byǐ, ń jà ǹ yě Yi párá. ⁸ Lò mɔ̀bɔ́ ǹ bǝ ǹ dõ só, ǹ yǝ̀l Yi pár yé, bǝ̀ Yi wɔ́ sónó. ⁹ Nyǐ-nǝ Yi gǝ́ byili nǝ́ba rǝ̀ sónó w né: rǝ̀ ce rǝ̀ byì-dùwǝ̀ y bǝ̀ lũ w wǝ, mùnì nǝ́ tó ńmyɛ̌ dɛnnɛ nǝ́ nǝ nyǔ. ¹⁰ Sǝ sónó w òmyɛ́ dǝ̀ nǝ́myɛ̌ nǝ́ swéné Yi yé. Wɔ́ Yi rǝ̀ swéné nǝ́ba, rǝ ce rǝ̀ Byǐ mú bà, n pǝ ń cìn n yǝ̀ vwĩ̀ kɔn, mùnì Yi pǝ nǝ́ba nǝ́ dwǝ́ǝ́ré sǔbri ń vwĩ̀ rí jàn yilǝ. ¹¹ À dɔwabá nántwǝ̌rh, Yi gǝ́ só nǝ́ba èta mɔ́ ce, nǝ́myɛ mǝ̌ sǝ nǝ́ swéné dwã. ¹² Lò lò gwẽ̌ yǝ̀ Yi nɛ ǹdǝ́ ń yírhǝ́ yé. Sǝ nǝ́ gǝ só dwã, rǝ̀ ŋwɛ́nɛ́ ǹdǝ́ nǝ́ba, rǝ̀ sónó w myɛ ŋwɛ́nɛ́ nǝ́ wẽ́ námpúm. ¹³ Nǝ́ gǝ́ tó mǝ̀gã̌ nǝ́ yě bǝ̀ nǝ́ ŋwɛ́nɛ́ ǹdǝ́ Yi, sǝ Yi myɛ ŋwɛ́nɛ́ ǹdǝ́ nǝ́ba mɔ́ wɔ́, rǝ̀ gǝ́ ce rǝ̀ Eshirhǝ y ŋwɛ́nɛ́ ǹdǝ́ nǝ́ba mɔ́. ¹⁴ Nǝ́ Da Yi ce ń Byǐ mú bǝ̀ lũ w vwǎrh yilǝ. Nǝ́ nɔ rǝ̀myɛ́ ǹdǝ́ nǝ́ yírhǝ́, nǝ́ zɛ̃̀ nǝ́ r'é byili ri zhǝ̀nà. ¹⁵ Lò mɔ̀bɔ́ ǹ nǝ́ ǹ wǝ̀l bǝ̀ Yezu wɔ́ Yi Byǐ, Yi ŋwɛ́nɛ́ ǹdǝ́ mɔ́, sǝ ǹmyɛ ŋwɛ́nɛ́ ǹdǝ́ Yi. ¹⁶ Nǝ́myɛ̌ yě sónó w kɔ̀bɔ́ Yi b'e swéné nǝ́ba mɔ́ gǝ́ wɔ́ nɛ́, sǝ nǝ́ r'é zwẽ ò nyí. Yi wɔ́ sónó. Lò mɔ̀bɔ́ ǹ ŋwɛ́nɛ́ sónó wẽ́, ǹ ŋwɛ́nɛ́ ǹdǝ́ Yi, sǝ Yi ŋwɛ́nɛ́ ǹdǝ́ ǹmyɛ. ¹⁷ Sónó gǝ ŋwɛ́nɛ́ nǝ́ wẽ́ námpúm, nǝ́ t'á la ywẽ dǔr bùrsí dɛ̃ rɛ́ yù w yé, bǝ̀ nǝ́ tùntwǝ̃̀ǝ̃̀ né lũ w kɔ̀bɔ́ wẽ́ mó nyɛ̌ ǹdǝ Yezu Kristǝ nyǝ̀ná nɛ́ ta. ¹⁸ Sónó gǝ ŋwɛ́nɛ́ mǝ̀gã̌ zhǝ̀n zhǝ̀nà, ywẽ tɛ̀nɛ́ gàà yé, bǝ̀ sónó w páá mɔ́ n'ô vùr ywẽ. Lò mɔ̀bɔ́ ń nǝ́ ń dùr ywẽ bǝ sónó w páá mɔ́ zhe yé, bǝ̀ wɔ́ còrhò-tum rǝ̀ n'ê zǝ ywẽ rǝ̀ twí. ¹⁹ Nǝ́myɛ̌ só dwã, bǝ̀ Yi jɛ̀nɛ̀ rǝ swéné nǝ́ba. ²⁰ Lò gǝ wò bǝ̀ ǹ só Yi, ń jà ǹ bǝ ǹ da-byǐ só, wɔ́ kɔma, bǝ̀ ǹ wàr ǹ b'ǎ swéné Yi rí ǹ yírhǝ́ bǝ nɛ mɔ́, ń jà ǹ bǝ ǹ da-byǐ mú ǹ yírhǝ́ nǝ mɔ́ só yé. ²¹ Kristǝ cìcì pɔ nǝ́ba nyí n wɔ̀: «Lò mɔ̀bɔ́ ǹ só Yi, ǹ mǝ̌ sǝ́ swéné ǹ da-byǐ myɛ.»