koussoube-marc-lee_1jn_text

Kǝ̀kàl-fwɛ̀lɛ̀ 5

¹ Lò mɔ̀bɔ́ gakó ǹ nǝ́ ǹ zwẽ nyí bǝ̀ Yezu wɔ́ Kristǝ, sǝ́ nyǐ ǹ wɔ́ Yi byǐ. Lò mɔ̀bɔ́ ǹ só nǝ́ Da Yi, ǹ só rǝ̀ byǎ bɛ́ myɛ. ² Nǝ́ gǝ só Yi, nǝ́ n'é zwẽ rǝ̀ nyǝ́ né mó ce, nǝ́ yě bǝ̀ nǝ́ só byɛ̀bɛ́ bǝ̀ wɔ́ rǝ̀ byǎ bɛ́ mɔ́. ³ Nǝ́ gǝ n'é zwẽ Yi nyǝ́ né, rǝ̀myɛ́ n'ê byili bǝ̀ nǝ́ só re. Rǝ̀ nyǝ́ né zõ bǝ zum ǹdǝ́ nǝ́ba yé. ⁴ Lò mɔ̀bɔ́ gakó ǹ wɔ́ Yi byǐ, ǹ nǝ́ ǹ jí bɛlɛ lũ w yó, sǝ wɔ́ nǝ́ Yi zhú mú è ce nǝ́ n'é jí bɛlɛ ò yó. ⁵ Lò mɔ̀bɔ́ ń nǝ́ ń zwẽ nyí bǝ̀ Yezu wɔ́ Yi Byǐ, wɔ́ ńmyɛ̌ dúdú ń nǝ́ jí bɛlɛ ò yó. ⁶ Yezu wɔ́ lò mɔ̀bɔ́ ń tó nɛ̃̌ ǹdǝ́ jal dɛnnɛ n bà. S'e dǝ̀ nɛ̃̌ dúdú yé; wɔ́ nɛ̃̌ ǹdǝ́ jal ga. Eshirhǝ náàcɛ̀nɛ́ wɔ́ rǝ̀myɛ́ zhǝ̀n-cínnǝ, b'e t'â gòm kɔma gaga yé. ⁷ Zhǝ̀n-cínnǝ bé wɔ́ bǝ̀tɔ̀: ⁸ wɔ́ Eshirhǝ ǹdǝ́ nɛ̃̌ ǹdǝ́ jal. Bǝ̀myɛ́ bǝ̀tɔ̀ y ga nyí wɔ́ rǝ̀dù. ⁹ Numbyínsi gǝ wɔ́ zhǝ̀n-cínnǝ yò yilǝ, nǝ́ r'é zwẽ ò nyí. Yi byili zhǝ̀n rǝ̀ Byǐ mú shò-kwã nɛ́, sǝ rǝ̀ zhǝ̀n-byilu mú du numbyínǝ́ bé nyǎn mɔ́. ¹⁰ Lò mɔ̀bɔ́ ǹ zù Yi Byǐ mú, ǹ zhe zhǝ̀n-cṹ mú mǝ̀myɛ́ mɔ́ ǹ wẽ́. Sǝ lò mɔ̀bɔ́ ń tá ń zwẽ Yi nyí ni, rǝ̀-ná-cí nǝ́ ń zǝ Yi ń yàl kɔma cǝ́bal, bǝ̀ ń tá ń zwẽ zhǝ̀n dɛ́ tɛ̀bɛ́ rǝ̀ byili rǝ̀ Byǐ mú shò-kwã nɛ́ mɔ́ yé. ¹¹ Zhǝ̀n-byilu mú mǝ̀myɛ́ mɔ́ wɔ́, Yi gǝ́ pɔ nǝ́ba nyǔ mǝ̀ t'â la zhɔ̌ mɔ́, sǝ wɔ́ rǝ̀ Byǐ mú dɛnnɛ rǝ̀ tó né rǝ pǝ mɔ nǝ́ba. ¹² Lò mɔ̀bɔ́ Byǐ ŋwɛ́nɛ́ ǹ wẽ́, ǹ zhe nyǔ mú mǝ̀myɛ́ mɔ́, sǝ lò mɔ̀bɔ́ Yi Byǐ mú tɛ̀nɛ́ ǹ wẽ́, ǹ bǝ nyǔ mú mǝ̀myɛ́ mɔ́ zhe yé ¹³ À n'â kɛ̃ sɛ́bɛ́ rɛ́ tɛ̀bɛ́ à la ába pɔ, mùnì á lwar b'ǎmyɛ̌ byɛ̀bɛ́ á zù Byǐ mú mú zhe nyǔ mǝ̀ t'â la zhɔ̌. ¹⁴ Nǝ́ zhe Yi zhǝ̀n námpúm bǝ̀ nǝ́ gǝ lwǝ̀l ré kɔn dɛ̀bɛ́ rǝ̀ wɔ́ rǝ̀ wɔ́ rǝ̀myɛ́ cìcì pùbùlǝ̀, rǝ̀ n'ê cili. ¹⁵ Nǝ́ yě bǝ̀ nǝ́ gǝ́ n'é lwǝ̀l Yi gakó, rǝ̀ n'ê cili. Rǝ̀myɛ́ ce, nǝ́ yě bǝ̀ kɔn dɛ̀bɛ́ gakó nǝ́ n'é lwǝ̀l mó, nǝ́ y'a nǝ rɛ. ¹⁶ Ǹ gǝ nɔ ǹ da-byǐ ń nǝ́ ń wɛ̀rhɛ́ yǝ̀-bǝlɔ̀lɔ́ kɔ̀bɔ́ ò t'â cĩ́ lò cu sɔ́má yó, sǝ́ lwǝ̀l Yi ń yilǝ, bǝ̀ Yi b'a pɔ̃ nyǔ, ǹdǝ́ ń yǝ̀-bǝlɔ̀lɔ́ w gǝ wàr ò cĩ́ lò cu sɔ́má yó zhǝ̀nà. Yǝ̀-bǝlɔ̀lɔ́ ŋwɛ́nɛ́ ò wɔ̌ ò cĩ́ lò cu sɔ́má yó, sǝ è dǝ̀ òmyɛ́ mɔ́ yil à wò bǝ̀ lwǝ̌lnǝ Yi yé. ¹⁷ Tùntùm-bǝlwɛ̀lɛ́ dwí gakó wɔ́ yǝ̀-bǝlɔ̀lɔ́, sǝ è dǝ̀ yǝ̀-bǝlwàálɛ́ ga rǝ̀ wɔ̌ rǝ̀ cĩ́ lò cu sɔ́má yó yé. ¹⁸ Nǝ́ yě bǝ̀ Yi Byǐ mú nǝ́ ń yìlì byɛ̀bɛ́ bǝ̀ wɔ́ Yi byǎ bɛ́ mɔ́, bǝ̀ k'ê t'â wɛ̀rhɛ́ yǝ̀-bǝlɔ̀lɔ́ yé, bǝ̀ lwɛlɛ cǝ́bal mɔ́ bǝ bǝ̀ yàlà zhe yé. ¹⁹ Nǝ́ yě bǝ̀ nǝ́myɛ̌ wɔ́ Yi lyì, sǝ lũ w púlǝ́púlǝ́ wɔ́ lwɛlɛ cǝ́bal mɔ́ ń cǐ wǝ. ²⁰ Nǝ́ yě bǝ̀ Yi Byǐ Yezu Kristǝ tú n pul nǝ́ surhǝ, mùnì ga nǝ́ lwar Yi rí tɛ̀bɛ́ rǝ̀ wɔ́ zhǝ̀n mɔ́ párá. Sǝ nǝ́ mù dwã nɛ ǹdǝ́ ń jàn yilǝ, ńmyɛ̌ mɔ̀bɔ́ ń wɔ́ Yi zhǝ̀nà, ń nǝ́ ń pɛ nyǔ mǝ̀ t'â la zhɔ̌ mɔ́. ²¹ À byǎ, dɛ̃̌-na á cìnǝ̀, á bǝ̀k'á cèrhé wẽ̀ ré tɛ̀bɛ́ rǝ̀ dǝ̀ Yi mú yé.