koussoube-marc-lee_1jn_text

Kǝ̀kàl-fwɛ̀lɛ̀ 3

¹ Nyǐ-nǝ Da mɔ́ só nǝ́ba dɛ̃́dɛ̃́, n zɛ̃̀ ń nǝ́ ń byẽ̀ nǝ́ba bǝ̀ ń byǎ. Sǝ nǝ́ wɔ́ Yi byǎ zhǝ̀nà. Lũ w lyì bí gǝ́ yǝ̀ Yi pár lwar mɔ́ ce, bǝ̀ yǝ̀l nǝ́myɛ pár yé. ² À dɔwabá nántwǝ̌rh, nǝ́ wɔ́ Yi byǎ èlǎsɛ̃́. Nǝ́ gwẽ̌ yǝ̀l nǝ́ gǝ́ la nɛ́ yál pamparɛ̃ɛ̃ rǝ̀myɛ́ kwã nɛ́ yé. Sǝ nǝ́ yě bǝ̀ Kristǝ gǝ ká ń túwǝ́, nǝ́ b'ǎ nǝ mɔ ǹdǝ ń gǝ́ wɔ́ nɛ́. Rǝ̀myɛ́ yó, nǝ́ b'ǎ yǝ̀ ǹdǝ ń ta. ³ Lò mɔ̀bɔ́ gakó ń nǝ́ ń dɛ̃̀ rǝ̀myɛ́ Kristǝ sõ, ń mǝ̌ sǝ n jǐrh wu-põ̀ cí ǹdǝ Kristǝ cìcì gǝ́ wɔ́ wu-põ̀ cǝ́bal nɛ́. ⁴ Lò mɔ̀bɔ́ gakó ń nǝ́ ń wɛ̀rhɛ́ yǝ̀-bǝlɔ̀lɔ́, ń tá ń nyàm Yi nyǝ́ né yé, bǝ̀ yǝ̀-bǝlɔ̀lɔ́ wɔ̀rhɔ́, wɔ́ Yi nyǝ́ né cõ. ⁵ Á yě bǝ̀ Yezu Kristǝ tú lũ w wẽ́ mùnì n vùr yǝ̀-bǝlwàálɛ́, ń cìcì mú jà ń yǝ̀ yǝ̀-bǝlɔ̀lɔ́ wɛ̀rhɛ́ yé. ⁶ Lò mɔ̀bɔ́ gakó ń ŋwɛ́nɛ́ ǹdǝ́ Yezu Kristǝ, rǝ̀-ná-cí kǝ́ ń tá ń wɛ̀rhɛ́ yǝ̀-bǝlwàálɛ yé. Lò mɔ̀bɔ́ ń gwẽ̌ cǝ̀ǝ̀lè ń nǝ́ ń wɛ̀rhɛ́ yǝ̀-bǝlwàálɛ, rǝ̀-ná-cí yǝ̀ Kristǝ nɛ yé, ń yǝ̀l ń pár myɛ yé. ⁷ À byǎ, á bǝ̀k'á yẽ̌ lò jǝ́jɛ̀rɛ́ ába yé. Lò mɔ̀bɔ́ ń nǝ́ ń wɛ̀rhɛ́ kɔn dɛ̀bɛ́ rǝ̀ wɔ́ cángá, ń wɔ́ wu-cángá cí ǹdǝ Kristǝ cìcì gǝ́ wɔ́ wu-cángá cǝ́bal nɛ́. ⁸ Lò mɔ̀bɔ́ ń gwẽ̌ cǝ̀ǝ̀lè ń nǝ́ ń wɛ̀rhɛ́ yǝ̀-bǝlwàálɛ, ń wɔ́ Shǝtana kwã-lò, bǝ̀ Shǝtana n'ê wɛ̀rhɛ́ yǝ̀-bǝlwàálɛ kùr-ju yi ní ga, sǝ Yi Byǐ mú tú mùnì n zhìlì è tumǝ né. ⁹ Lò mɔ̀bɔ́ gakó ǹ wɔ́ Yi byǐ, ǹ kǝ́ ǹ tá ǹ wɛ̀rhɛ́ yǝ̀-bǝlwàálɛ yé, bǝ̀ Yi co rǝ̀ jàn dɛ́ ǹ wẽ́. Ǹ kǝ́ ǹ wàr ǹ wɛ̀rhɛ́ yǝ̀-bǝlwàálɛ yé, bǝ̀ ǹ jǐrh Yi byǐ. ¹⁰ Kɔn dɛ̀bɛ́ rǝ̀ n'ê pɔr Yi byǎ bɛ́ ǹdǝ́ Shǝtana byǎ bɛ́ dwã w mɔ́ wɔ́: lò mɔ̀bɔ́ ǹ tá ǹ twĩ̀ kɔn dɛ̀bɛ́ rǝ̀ wɔ́ cángá, ǹ bǝ ǹ dwã bɛ́ myɛ só, ǹmyɛ́ mɔ́ dǝ̀ Yi byǐ yé. ¹¹ Zɔ̀mɛ̀ rɛ́ tɛ̀bɛ́ á nyɛ̀ɛ̀ kùr-ju yi ní ga mɔ́ n'ê wǝ̀l bǝ̀ nǝ́ swé-né dwã. ¹² Nǝ́ bǝ mǝ̌ sǝ nǝ́ wɛ̀rhɛ́ ǹdǝ Kɛ̃ɛ̃ nɛ́ yé. Ń yà ń wɔ́ lwɛlɛ cǝ́bal mɔ́ kwã-lò, n zɛ̃̀ n gu ń nyɛ̃́ mɔ́. Wɔ́ byè yil ń gu mu? Ń sǝ̀pwà tùntwǝ̃̀ǝ̃̀ né y'à dǝ̀ cángá yé, ń nyɛ̃́ mɔ́ nyǝ̀ná né zɛ̃̀ nǝ yǝ̀ cángá. ¹³ Da-byǎ, lũ w kɔ̀bɔ́ lyì bí gǝ́ n'ê súl ába mó bǝ̀k'a jàr ába yé. ¹⁴ Sǝ nǝ́myɛ̌ gǝ́ só nǝ́ da-byǎ bɛ́ mɔ́ ce, nǝ́ yě bǝ̀ nǝ́ du cu wẽ́ nǝ́ zù nyǔ wẽ́. Lò mɔ̀bɔ́ ǹ bǝ ǹ da-byǐ só, ǹ gwẽ̌ ŋwɛ́nɛ́ cu mú wẽ́. ¹⁵ Lò mɔ̀bɔ́ gakó ǹ bǝ ǹ da-byǐ só, ǹ wɔ́ lyì-gurnǝ. Á j'ǎ yě bǝ̀ lyì-gurnǝ bǝ nyǔ mǝ̀ t'â la zhɔ̌ zhe ń wẽ́ yé. ¹⁶ Nǝ́ yě dõ sónó gǝ́ wɔ́ kɔn ná-dwí yilǝ, bǝ̀ Yezu Kristǝ pɔ ń myǝ̌l lé nǝ́ yilǝ. Nǝ́myɛ mǝ̌ sǝ nǝ́ pǝ nǝ́ myǝ̌l lé nǝ́ da-byǎ bɛ́ yilǝ. ¹⁷ Lò mɔ̀bɔ́ ǹ zhe, ń zɛ̃̀ ń nǝ ǹ da-byǐ ń nǝ́ ń nwɛ̀nɛ̀, ń j'ǎ pyi ǹ yírhǝ́ ń yó, wɔ́ etǝr Yi sónó w b'a tó né o yǝ̀ ǹ wẽ́? ¹⁸ À byǎ, nǝ́ bǝ mǝ̌ sǝ nǝ́ swéné dwã ǹdǝ́ nyì-gwàl ǹdǝ́ zɔ̀m-fwǝ̀r dúdú yé. Nǝ́ mǝ̌ sǝ nǝ́ swéné dwã ǹdǝ́ nǝ́ tùntwǝ̃̀ǝ̃̀ né. Wɔ́ nǝ́ tùntwǝ̃̀ǝ̃̀ né nǝ̀ m'a byili bǝ̀ nǝ́ só dwã zhǝ̀nà. ¹⁹ Wɔ́ rǝ̀myɛ́ dɛnnɛ nǝ́ b'ǎ tó né nǝ́ lwar bǝ̀ nǝ́ wɔ́ zhǝ̀n dɛ́ lyì, mùnì ga nǝ́ wun ní jòm. ²⁰ Bá nǝ́ gǝ tɛ́rɛ́ nǝ́ wẽ́ nǝ́ pwírí nǝ́ dó myɛ, nǝ́ yě bǝ̀ Yi jàn dɛ́ du nǝ́ tɔ́rɔ́ mɔ́, sǝ rǝ̀ yě kɔn gakó. ²¹ À dɔwabá nántwǝ̌rh, nǝ́ wun ní gǝ yǝ̀ nǝ́ bùrsì kɛ́, nǝ́ b'ǎ zǝ wu-jɔ̀ nǝ́ zhì Yi yé né. ²² Rǝ̀ b'a pǝ nǝ́ba kɔn dɛ̀bɛ́ gakó nǝ́ r'é lwǝ̀lǝ̀, nǝ́ gǝ́ n'é zwẽ rǝ̀ nyǝ́ né, nǝ́ j'ǎ n'é wɛ̀rhɛ́ rǝ̀ pùbùlǝ̀ mó yilǝ. ²³ Kɔn dɛ́ dɛ̀bɛ́ rǝ̀ pɔ nǝ́ba rǝ̀ nyí mú wɔ́ bǝ̀ nǝ́ zhí rǝ̀ Byǐ Yezu Kristǝ ne, sǝ nǝ́ swéné dwã ǹdǝ ń gǝ́ pɔ nǝ́ba nyí ní. ²⁴ Lò mɔ̀bɔ́ ǹ nǝ́ ǹ zwẽ Yi nyǝ́ né, ǹ ŋwɛ́nɛ́ ǹdǝ́ Yi, sǝ Yi myɛ ŋwɛ́nɛ́ ǹdǝ́ mɔ́. Zhǝ̀nà, wɔ́ Eshirhǝ y Yi pɔ nǝ́ba mɔ́ è ce nǝ́ yě bǝ̀ rǝ̀ ŋwɛ́nɛ́ ǹdǝ́ nǝ́ba.