¹ À byǎ, à n'â kɛ̃ ywẽ̀ né nyɛ̀bɛ́ à la ába byilu, mùnì ga á bǝ̀k'á wɛ̀rhɛ́ yǝ̀-bǝlwàálɛ yé. Sǝ bá lò gǝ wɛ̀rhɛ́ yǝ̀-bǝlɔ̀lɔ́ myɛ, nǝ́ zhe lò nǝ́ Da Yi yé né ń nǝ́ ń zwẽ nǝ́ nyí ni: wɔ́ Yezu Kristǝ. Ń bǝ dóó zhe, ² sǝ ń pɔ ń cìn n yǝ̀ vwĩ̀-kɔn mùnì ga nǝ́ nǝ nǝ́ dwǝ́ǝ́ré sǔbri; sǝ è dǝ̀ nǝ́myɛ̌ dúdú dwǝ́ǝ́ré sǔbri nɔ yil yé, wɔ́ nǝ́myɛ̌ ǹdǝ́ lũ w púlǝ́púlǝ́ lyì bí dwǝ́ǝ́ré ga sǔbri nɔ yilǝ. ³ Wɔ́ nǝ́ gǝ́ n'é zwẽ Yi nyǝ́ né mó è ce nǝ́ lwar bǝ̀ nǝ́ yě rǝ̀ párá. ⁴ Lò gǝ wò bǝ̀ ǹ yě Yi párá, ń jà ǹ tá ǹ zwẽ rǝ̀ nyǝ́ né, sǝ́ nyǐ ǹ wɔ́ kɔma cǝ́bal, zhǝ̀n tɛ̀nɛ́ ǹ wẽ́ yé. ⁵ Sǝ lò mɔ̀bɔ́ ǹ nǝ́ ǹ zwẽ Yi nyǝ́ né, sǝ́ nyǐ rǝ̀ sónó w ŋwɛ́nɛ́ ǹ wẽ́ námpúm. Nyǐ-nǝ kɔn dɛ̀bɛ́ rǝ̀ ce nǝ́ wɔ̌ nǝ́ wǝ̀l bǝ̀ nǝ́ zù Yi: ⁶ lò mɔ̀bɔ́ ǹ nǝ́ ǹ wǝ̀l bǝ̀ ǹ zù Yi, ǹ tùntwǝ̃̀ǝ̃̀ né mǝ̌ sǝ nǝ yǝ̀ ǹdǝ Yezu Kristǝ nyǝ̀ná nɛ́ ta. ⁷ À dɔwabá nántwǝ̌rh, è dǝ̀ nyí nándùl à n'â kɛ̃ à la ába pɔ yé. Wɔ́ nyí rí nándwǝ́l lé á nyɛ̀ɛ̀ kùr-ju yi ní ga mɔ́. Nyí rí nándwǝ́l lé rǝ̀myɛ́ mɔ́ wɔ́ zɔ̀mɛ̀ rɛ́ tɛ̀bɛ́ á nyɛ̀ɛ̀ kùr-ju yi ní ga mɔ́. ⁸ Rǝ̀ j'à wɔ́ nyí nándùl à n'â kɛ̃ à la ába pɔ. Yezu Kristǝ tùntwĩ̀ĩ̀ rí ǹdǝ́ ámyɛ̌ nyǎn dɛ́ ga n'ê byili bǝ̀ nyí rí rǝ̀myɛ́ mɔ́ wɔ́ zhǝ̀nà, bǝ̀ cǝ-byṹ w n'ê lyɛ̃, sǝ pwẽ̀ dé páá mɔ́ pú è n'ê yǝ̀rǝ́. ⁹ Lò mɔ̀bɔ́ ǹ nǝ́ ǹ wǝ̀l bǝ̀ ǹmyɛ́ ŋwɛ́nɛ́ pwẽ̀ wǝ̀, ń jà ǹ nǝ́ ǹ súl ǹ da-byǐ, sǝ́ nyǐ ǹ gwẽ̌ ŋwɛ́nɛ́ cǝ-byṹ w wẽ́. ¹⁰ Lò mɔ̀bɔ́ ǹ zhe sónó ǹdǝ́ ǹ da-byǐ, ǹ ŋwɛ́nɛ́ pwẽ̀ wǝ̀; kaka wàr rǝ̀ b'a ce ń tu tɛ̃́ yé. ¹¹ Lò mɔ̀bɔ́ ń súl ń da-byǐ, rǝ̀-ná-cí ŋwɛ́nɛ́ cǝ-byṹ wǝ, ń nǝ́ ń zhǝ̀l cǝ-byṹ wǝ. Cǝ-byṹ w ce n jǐrh lyìlyǒ, n zɛ̃̀ ń kǝ́ ń yǝ̀l ń gǝ́ la má yé. ¹² À byǎ, à n'â kɛ̃ sɛ́bɛ́ rɛ́ tɛ̀bɛ́ à la ába pɔ, á gǝ́ nɔ á yǝ̀-bǝlwàálɛ́ sǔbri ǹdǝ́ Yezu Kristǝ yil lé jàn mɔ́ yilǝ. ¹³ Dabá, à n'â kɛ̃ sɛ́bɛ́ rɛ́ tɛ̀bɛ́ à la ába pɔ, á gǝ́ lwar mɔ̀bɔ́ ń yàl nɛ́ kùr-ju yi ní ga mɔ́ pár mɔ́ yilǝ. Ébwá-dàlá, à n'â kɛ̃ sɛ́bɛ́ rɛ́ tɛ̀bɛ́ à la ába pɔ, á gǝ́ ŋwɛ̀nɛ́ lwɛlɛ cǝ́bal mɔ́ mɔ́ yilǝ. ¹⁴ À byǎ, à n'â kɛ̃ sɛ́bɛ́ rɛ́ tɛ̀bɛ́ à la ába pɔ, á gǝ́ yě Da mɔ́ pár mɔ́ yilǝ. Dabá, à n'â kɛ̃ sɛ́bɛ́ rɛ́ tɛ̀bɛ́ à la ába pɔ, á gǝ́ lwar mɔ̀bɔ́ ń yàl nɛ́ kùr-ju yi ní ga mɔ́ pár mɔ́ yilǝ. Ébwá-dàlá, à n'â kɛ̃ sɛ́bɛ́ rɛ́ tɛ̀bɛ́ à la ába pɔ, á gǝ́ wɔ́ kàndar, Yi zɔ̀mɛ̀ rɛ́ jě á wẽ́, á gǝ́ ŋwɛ̀nɛ́ lwɛlɛ cǝ́bal mɔ́ mɔ́ yilǝ. ¹⁵ Á bǝ̀k'á swéné lũ w yé, s'á bǝ̀k'á swéné wẽ̀ ré tɛ̀bɛ́ rǝ̀ wɔ́ lũ w nyǎn mɔ́ myɛ yé. Lò mɔ̀bɔ́ ǹ só lũ wǝ́, sǝ́ nyǐ ǹ bǝ nǝ́ Da Yi só yé. ¹⁶ Wẽ̀ ré tɛ̀bɛ́ rǝ̀ wɔ́ lũ w nyǎn rɛ́ mɔ́ wɔ́: shilǝ námmǝlwǎlsɛ́, ǹdǝ́ wẽ̀ tɛ̀bɛ́ yírhǝ́ nǝ mɔ́ yǎl, ǹdǝ́ jɛ̃̀ zhe kɔn cìn-byilu. Rǝ̀myɛ́ rǝ̀dù ga t'â shí Da mɔ́ sõ yé. Wɔ́ lũ w wẽ́ rǝ̀ n'ê shí ní. ¹⁷ Lũ w n'ô lyɛ̃; wẽ̀ ré tɛ̀bɛ́ rǝ̀ ŋwɛ́nɛ́ ò wẽ́ rǝ̀ shil n'ê zal lyì bí mú myɛ n'ê lyɛ̃. Sǝ lò mɔ̀bɔ́ ń nǝ́ ń wɛ̀rhɛ́ Yi pùbùlǝ̀, rǝ̀-ná-cí já ń ŋwɛ́nɛ́ twéé gakó. ¹⁸ À byǎ, lũ zhɔ̌ bwǝlse. Á nyɛ̀ɛ̀ bǝ̀ Kristǝ zù-bal mɔ́ bànà. Sǝ èlǎsɛ̃́, Kristǝ zwǝ̀ nánzhǝzhɔ̌ pú è ŋwɛ́nɛ́. Wɔ́ rǝ̀myɛ́ è ce nǝ́ yě bǝ̀ lũ zhɔ̌ bwǝlse. ¹⁹ Bǝ̀ y'à dǝ̀ nǝ́myɛ̌ lyì yé. Wɔ́ rǝ̀myɛ́ è ce bǝ du nǝ́ wẽ́. Bǝ̀ gǝ y'à wɔ́ nǝ́myɛ̌ lyì zhǝ̀nà, bǝ̀ y'à b'a mɛ̃ nǝ́ wẽ́. Sǝ bǝ̀ du nǝ́ wẽ́, mùnì ga e yǝ̀ pamparɛ̃ɛ̃ bǝ̀ bǝ̀myɛ́ mǝ̀dù ga yà ń dǝ̀ nǝ́myɛ̌ lò yé. ²⁰ Sǝ è gǝ wɔ́ ámyɛ̌ yilǝ, Eshirhǝ náàcɛ̀nɛ́ só á yó wǝ; sǝ wɔ́ Kristǝ ń ce e só á yó wǝ. Wɔ́ rǝ̀myɛ́ è ce ámyɛ̌ gakó yě zhǝ̀n rɛ́ yé-shò. ²¹ È dǝ̀ á yǝ̀l zhǝ̀n rɛ́ yé-shò yil à n'â kɛ̃ sɛ́bɛ́ rɛ́ tɛ̀bɛ́ à la ába pɔ yé. Wɔ́ á gǝ́ yě rǝ̀ yé-shò mó yilǝ. Á yě myɛ bǝ̀ kɔma t'â shí zhǝ̀n wẽ́ yé. ²² Lò mɔ̀bɔ́ ń nǝ́ ń wǝ̀l bǝ̀ Yezu dǝ̀ Kristǝ mó, ńmyɛ̌ mɔ́ wɔ́ kɔ̀mɔ̀ w páá mɔ́, n jà ń wɔ́ Kristǝ zù-bal. Ń zhɔ̃̀ Da mɔ́ ǹdǝ́ Byǐ mú ga. ²³ Lò mɔ̀bɔ́ ǹ zhɔ̃̀ Byǐ mú, wɔ́ ǹdǝ́ Da mɔ́ ga ǹ zhɔ̃̀wà. Lò mɔ̀bɔ́ ǹ bwǝ̀l ń byili bǝ̀ ǹ zù Byǐ mú, wɔ́ ǹdǝ Da mɔ́ ga ǹ zùwǝ̀ ²⁴ Rǝ̀myɛ́ ce, zǝna kɔn dɛ́ dɛ̀bɛ́ á nyɛ̀ɛ̀ kùr-ju yi ní ga mɔ́ á wun ní wẽ́ náàcɛ̀nɛ́. Dɛ̀bɛ́ á nyɛ̀ɛ̀ kùr-ju yi ní ga mɔ́ gǝ mɛ̃ á wẽ́, ámyɛ b'ǎ yǝ̀ nɛ́ ǹdǝ́ Yi Byǐ mú ǹdǝ́ Da mɔ́ ga. ²⁵ Kɔn dɛ̀bɛ́ Yezu Kristǝ bwǝl nǝ́ba rǝ̀ nyí mú, wɔ́ nyǔ mǝ̀ t'â la zhɔ̌. ²⁶ À n'â kɛ̃ sɛ́bɛ́ rɛ́ tɛ̀bɛ́ à la ába pɔ, mùnì ga á dɛ̃̀ á cìn ǹdǝ́ byɛ̀bɛ́ bǝ̀ n'ê yǎl bǝ yǔr ába mó. ²⁷ È gǝ wɔ́ ámyɛ̌ yilǝ, Kristǝ Eshirhǝ y ń ce e só á yó mó ŋwɛ́nɛ́ á wẽ́. Rǝ̀myɛ́ ce, è k'ê dǝ̀ nyɔ́ɔ́ sǝ lò cèrhè ába yé, bǝ̀ Eshirhǝ y è só á yó mó n'ê byili ába kɔn gakó, sǝ dɛ̀bɛ́ è n'ê byili ába mó wɔ́ zhǝ̀nà, è t'â gòm kɔma yé. Rǝ̀myɛ́ ce, mɛ̃-na Kristǝ wẽ́ ǹdǝ Eshirhǝ y gǝ́ cèrhè ába né. ²⁸ À byǎ, èlǎsɛ̃́, mɛ̃-na Kristǝ wẽ́, mùnì ń gǝ ká ń túwǝ́, sǝ nǝ́ jí bɛlɛ nǝ́ b'é zhì ń yé né, nǝ́ bǝ̀k'á jí cìzhìl yé. ²⁹ Á yě bǝ̀ Kristǝ mó bǝ dóó zhe yé. Rǝ̀myɛ́ ce, lwarna bǝ̀ lò mɔ̀bɔ́ gakó ń nǝ́ ń wɛ̀rhɛ́ kɔn dɛ̀bɛ́ rǝ̀ wɔ́ cángá, rǝ̀-ná-cí wɔ́ Yi byǐ.