koussoube-marc-lee_1ch_text

Kǝ̀kàl-fwɛ̀lɛ̀ 4

¹ Orɔbɛn yà ń wɔ́ Zhakɔɔbɛ byì-cɛ, sə ń gə́ zù ǹdə́ ń da kana bɛ́ mə̀dù y mú ce, bə̀ pɔ ń náncaarɛ́ Zhozefu ni, ńmyɛ yà ń wɔ́ Zhakɔɔbɛ byǐ, bə zɛ̃̀ bə̀ k'ê yə̀ mo kwè ǹdə byì-cɛ ta yé. ² Zhəda dwini ń da-byǎ bɛ́ gakó, wɔ́ ńmyɛ̌ byǐ ń tú n bə̀ n jǐrh Esərayɛl pyɔ̌. Sə ǹdə́ rə̀myɛ́ ga wɔ́ Zhozefu ń jú náncaarɛ́. ³ Esərayɛl byì-cɛ Orɔbɛn byǎ bɛ́ yàl: Anɔɔkɛ ǹdə́ Pəlu ǹdə́ Esərɔ̃ e súlí Kərəmyi. ⁴ Zuwəə byǐ mú yàl: Shəmaya; Shəmaya zɛ̃̀ n lù Gɔɔgɛ, Gɔɔgɛ zɛ̃̀ n lù Shəmeyi; ⁵ Shəmeyi zɛ̃̀ n lù Myəka; Myəka zɛ̃̀ n lù Erəyaya; Erəyaya zɛ̃̀ n lù Baalɛ; ⁶ Baalɛ zɛ̃̀ n lù Bɛɛra, mɔ̀bɔ́ Ashəri pyɔ̌ Təgəlaatɛ-Falazaarɛ zɔ n mə n vò yómə́-jè mó; ń yà ń wɔ́ Orɔbɛn dwí rí pyɔ̌. ⁷ Nyǐ ń da-byǎ bɛ́ yilə né bə̀ tó bə̀ nàmbala bɛ́ yilə né dɛnnɛ bə kɛ̃ jì jì mú: nã́yə́ə́ mó wɔ́ Yəyəə ǹdə́ Zakarɛ ⁸ ǹdə́ Azaazɛ byǐ Bəla, Shəma nɔ̃̌ wá, Zuwəə nàn-jòlò wə́; Orɔbɛn dwí rí y'à jě tənà y kɛ̀bɛ́ è y'à wɔ Arɔwɛɛrɛ, jə̀-jĩ́ sõ mó, ǹdə́ Nəbo e súlí Baal-Məwɔ̃, jə̀-gwã̀ sõ mó, bwə̌l mó wə. ⁹ Yi-púrhí sõ, bə̀ y'à ŋwɛ́nɛ́ kɔn zhì Efəraatɛ bù-fwɛ̀lɛ̀ y nɛ e m'e yí gɔ-elũ èpòlò w nyí ni, bə̀ bə̀ vwàmá nɛ́ y'à wɔ́ nánzhəzhɔ̌ Galaadɛ tənà y wa. ¹⁰ Səyuuli yi ní, bə̀ bú ǹdə́ Agəri lyì bí, bə ŋwɛ̀nɛ́ bɛ; bə zwẽ bə̀ kwə̀ə́rhé bə yə̀ rə̀ wẽ́ Galaadɛ yi-púrhí sõ nyí rí gakó wẽ́. ¹¹ Gaadɛ byǎ bɛ́ y'à jě Orɔbɛn byǎ bɛ́ tənà y jə̀-gwã̀ sõ, Bashã tənà y w e m'e yí Saləka, yi-púrhí sõ: ¹² nã́yə́ə́ mó wɔ́ Zuwəə, bə̀lyè nyǎn mɔ́ Shafã e súlí Yənəyi ǹdə́ Shafaatɛ, Bashã nɛ́. ¹³ Bə̀ da-byǎ bɛ́, kɔn tó dwã ǹdə bə̀ jìsí, yàl: Myəkayəə ǹdə́ Məshəlam ǹdə́ Shəba ǹdə́ Yorəyi ǹdə́ Yakã ǹdə́ Zha e súlí Ebɛɛrɛ, bə̀ y'à wɔ́ nunə bwàlpyɛ̀. ¹⁴ Wɔ́ Abyəyəyil byǎ bɛ́ bə ju jìsí sə̀myɛ́ mɔ́ kùrə̀. Nyǐ Uuri byǐ Abyəyəyil nàmbala bɛ́: Uuri wɔ́ Yarɔwa byǐ, Yarɔwa zɛ̃̀ ń wɔ́ Galaadɛ byǐ, Galaadɛ zɛ̃̀ ń wɔ́ Myəkayəə byǐ, Myəkayəə zɛ̃̀ ń wɔ́ Yəshəshəyi byǐ, Yəshəshəyi zɛ̃̀ ń wɔ́ Yədo byǐ, Yədo zɛ̃̀ ń wɔ́ Buuzi byǐ. ¹⁵ Abəjəə byǐ Ayi, Guni nɔ̃̌ wá, yà ń wɔ́ bə̀ jìsí yó-cə́bal. ¹⁶ Bə̀ y'à jě Galaadɛ nɛ́, Bashã tənà y ǹdə́ è gə́ cǐ má nyí rí wẽ́, Sarɔ̃ vwàmá gɔ-dɔ́m-jààsɛ́ gakó wẽ́ kɔn m'e yí sə̀ swã́ nɛ́. ¹⁷ Bə̀ kɛ̃ bə̀ gakó yilə né sɛ́bɛ́ yó Zhəda pyɔ̌ Yɔtam ǹdə́ Esərayɛl pyɔ̌ Zhərɔbwam yi ní. ¹⁸ Orɔbɛn byǎ bɛ́ ǹdə́ Gaadɛ byǎ bɛ́ e súlí Manasɛ kwálá kə̀kàlà y byǎ bɛ́ myɛ y'à wɔ́ búlə́ kàndar, bə̀ y'à zhe nə̀kwə̀r ǹdə́ búlə́ shìmì, bə̀ n'ê tɛ twã bə̀ y'à súlí bə cèrhè búlə́ bú. Bə̀ y'à wɔ́ nunə mɔ̀ɔ̀rhɛ̀ shə́-èna ǹdə́ rə̀na ǹdə́ zɔ̃̌-nyàlpyɛ̀ ǹdə́ shə́-shə̀ldù, bə̀ y'à wɔ̌ bə̀ m'a vò búlə́ jàà wa. ¹⁹ Bə̀ bú ǹdə́ Agəri lyì bí e súlí Yətuuri ǹdə́ Nəfyiishi ǹdə́ Nɔdaabɛ. 20 Búlə́ né yi ní bə lwə̀l sɛ̃ɛ̃́ Yi ni; Yi zwẽ bə̀ co wə́, rə zɛ̃̀ rə sɛ̃ bɛ, bə̀ gə́ y'à zhe rə̀ zhə̀n mɔ́ yilə. Bə ŋwɛ̀nɛ́ Agəri lyì bí ǹdə́ byɛ̀bɛ́ bə̀ nyí y'à ŋwɛ́nɛ́ bə̀ kwã mɔ́. ²⁰ Búlə́ né yi ní bə lwə̀l sɛ̃ɛ̃́ Yi ni; Yi zwẽ bə̀ co wə́, rə zɛ̃̀ rə sɛ̃ bɛ, bə̀ gə́ y'à zhe rə̀ zhə̀n mɔ́ yilə. Bə ŋwɛ̀nɛ́ Agəri lyì bí ǹdə́ byɛ̀bɛ́ bə̀ nyí y'à ŋwɛ́nɛ́ bə̀ kwã mɔ́. ²¹ Bə zə bə̀ vwàmá nɛ́: Yómdé mɔ̀ɔ̀rhɛ̀ shí-ènu ǹdə́ vwàmá námpɔ́lsɛ́ mɔ̀ɔ̀rhɛ̀ zwã̌-èlyè ǹdə́ shí-ènu ǹdə́ bə̀nərh mɔ̀ɔ̀rhɛ̀ rə̀lyè e súlí nunə mɔ̀ɔ̀rhɛ̀ zɔ̌m. ²² Bə̀ y'à gu bə̀ zwə̀ bé nánzhəzhɔ̌. Kɔn yàl èta bə̀ wɔ́ Yi rə̀ y'à ce búlə́ né jòm. Bə zɛ̃̀ bə jòm Agəri lyì bí tənà y w kɔn m'e yí bə pwà bɛ bə vò yómə́-jè y mó. ²³ Manasɛ kwálá y kə̀kàlà y byǎ bɛ́ y'à jě tənà y kɔn zhì Bashã, jə̀-jĩ́ sõ, e m'e yí Baal-Erəmɔ̃ ǹdə́ Səniiri ǹdə́ Erəmɔ̃ pyɔ̀ w mɔ́ wa. Bə̀ y'à já. ²⁴ Nyǐ bə̀ dwə́ né yó-cìnə́ bé yilə né: Efɛɛrɛ ǹdə́ Yəsheyi ǹdə́ Elyɛl ǹdə́ Azərəyəə ǹdə́ Yərəməya ǹdə́ Odavya e súlí Yajɛl. Bə̀ gakó y'à wɔ́ kàndar, bə̀ yil j'à y'à duwə. Bə̀ y'à wɔ́ dwə́ né yó-cìnə́. ²⁵ Bǝ̀ dó bǝ̀ dabá Yi rí ni, bǝ wùlì tɛ̃́ bǝ cèrhé dwǝ́ dwã yǝ né, tǝnà y Yi y'à cɔ̀ y bǝ̀ yé né mó wẽ́. Orɔbɛn kwálá y ǹdə́ Gaadɛ kwálá y e súlí Manasɛ kwálá kə̀kàlà y yə̀ bə̀ nà yó zhì ǹdə́ bə̀ nàmbala bɛ́ Yi rí yé; ²⁶ Rə̀myɛ́ yi ní, Esərayɛl Yi rí ce Puuli ǹdə́ Təgəlaatɛ-Falazaarɛ, Ashəri pyǎ bɛ́, bə̀ bə bú ǹdə́ kwálsɛ́ sə̀myɛ́ mɔ́ tənèsé, bə pwà sə̀ lyì bí bə m'e vò bə cĩ́ Ala ǹdə́ Abɔɔrɛ ǹdə́ Ara tənèsé wə, Gɔzã bwǐ y yala nɛ. Bə̀ jě gàà ǹdə́ zà gwẽ̌.