¹ Dəvyidi byẽ̀ Esərayɛl lyì byǎ bɛ́ yó-cìnə́ bé gakó n cĩ́ dwã yó Zhərəzalɛm nɛ́: kwálsɛ́ yó-cìnə́ bé ǹdə́ shə̀dɛ́ɛ́sɛ́ kùkùlə̀ né yó-cìnə́ bé bə̀ y'à wɔ́ pyɔ̌ mɔ́ tùntùnnə mó ǹdə́ shə̀dɛ́ɛ́sɛ mɔ̀rhɔ̀ mɔ̀rhɔ̀ yó-cìnə́ bé ǹdə́ shə̀dɛ́ɛ́sɛ zɔ̌m zɔ̌m yó-cìnə́ bé ǹdə́ byɛ̀bɛ́ bə̀ y'à n'ê nyǐ pyɔ̌ mɔ́ ǹdə́ ń byǎ bɛ́ nə̀cɛ̀ndɛ́ ǹdə́ ń vwàmá nɛ́ yò mó yó-cìnə́ bé ǹdə́ pyɔ̌-kɛ̀lɛ́ y tùntùnnə bé ǹdə́ búlə́ kàndar rɛ́ e súlí bala bɛ́ byɛ̀bɛ́ bə̀ y'à zhe kùr mú. ² Pyɔ̌ Dəvyidi zɛ̃̀ n zhì dɛ̃̌ n wɔ̀ bɛ: «À da-byǎ ǹd'â tənà y lyì, cili-nə. À y'à búl a bù jì lú bùlə̀ Cinu dɔbrɛ́ kùlkṍ w ǹdə́ ń nə̀rh cṹ ku w gə́ m'a zhì mə̀gã̌, sə à tɛnɛ kɔn gakó rə̀myɛ́ mɔ́ yilə. ³ Sə Yi wə̀l ne: ‹Ǹ tá ǹ la jì lú àmyɛ́ yil ré còrhó yil yé, bə̀ ǹ wɔ́ búlə́-cí, ǹ ló jal tɛ̃́ dɛ̃́dɛ̃́.› ⁴ Cinu, Esərayɛl Yi rí, ń cír ni à dwí rí púlə́púlə́ cəcəl wə, mùnì ga a yə̀ Esərayɛl pyɔ̌ gaga yilə. Shãã ga, ń cír Zhəda ń la n yə̀ yé-twə́rnə, n zɛ̃̀ n cír à da dwí rí Zhəda kwálá y wẽ́, n zɛ̃̀ n swéné n cír àmyɛ́ à da byǎ bɛ́ wẽ́ mùnì ga à yə̀ Esərayɛl púlə́púlə́ pyɔ̌. ⁵ Èlǎsɛ̃́, byǎ bɛ́ nánzhəzhɔ̌ w Cinu Yi pɔ nɛ mɔ́ wẽ́ mó, ń cír à byǐ Saləmɔ ń la n jòm Cinu pyɛ̀lɛ̀ rɛ́ də̀gwã́ y yó, n yə̀ Esərayɛl pyɔ̌. ⁶ N zɛ̃̀ n wɔ̀ nɛ: ‹Wɔ́ ǹ byǐ Saləmɔ ń mà n lù jì ǹd'ê kɛ̀lɛ́ y wu w n pɛ̃, bə̀ wɔ́ àmyɛ́ à cír mu; ń mà n yə̀ byǐ à yilə, àmyɛ m'a yə̀ da ń yilə. ⁷ À tɛnɛ pyɛ̀lɛ̀ rə̀ la yə̀ nɛ́ gaga yilə, ń yilə, ń gə pyɛ́nɛ́ n wɛ̀rhɛ́ kɔn rɛ́ tɛ̀bɛ́ à nyə́ né ǹd'â cúcú mú n'ê byili mú, ǹdə zà mɔ́ ta.› ⁸ Rə̀myɛ́ ce, èlǎsɛ̃́, Esərayɛl lyì byǎ bɛ́ púlə́púlə́ yírh wə, ǹdə́ Cinu Yi kúlí y yírh wə, e súlí Yi yé né: ce-nə jàn nɛ́ á sú Cinu, á Yi rí, nyə́ né gakó kùrə̀, sə á zwẽ ne, mùnì á gwẽ̌ cìní tənà náàcɛ̀nɛ́ y kɛ̀bɛ́, sə á gwẽ̌ b'ǎ yẽ̌ y á pə á byǎ bɛ́ nɛ e yə̀ bə̀ cəl, gaga yilə. ⁹ Sə ǹmyɛ́ à byǐ Saləmɔ, lwar ǹ da Yi rí párá, sə́ cèrhé re ǹdə́ ǹ wu gakó ǹdə́ ǹ bùlə̀ gakó, bə̀ Cinu nə́ ń gwɛ̃ numbyínsí wun ní gakó wẽ́, mùnì ga n lwar sə̀ bùlə̀ né dwí gakó gə́ wɔ́ nɛ́. Ǹ gə pyà mɔ, ń mà n shɛ̀nɛ́ ń nə mɔ, sə ǹ gə yẽ̌ mo, ńmyɛ mà n zhɛ̃̀ mɔ́ gaga yilə. ¹⁰ Nyì wé, èlǎsɛ̃́: Cinu Yi cír mú mùnì ga ń lù jì e yə̀ ń dúdú jì; rə̀myɛ́ ce, zə wu-jɔ̀, sə ń zɛ̃̀ ń ji tum rí kùrə̀!» ¹¹ Dəvyidi kwè jì y Yi dúdú cǐ mú ǹdə́ jìsí shɛ̀bɛ́ sə̀ y'à kə́kɛ́lɛ́ y mɔ́, ǹdə́ jìsí shɛ̀bɛ́ bə̀ y'à n'ê cĩ́ nə̀cɛ̀ndɛ sə̀ wẽ́ mó ǹdə́ dɛ̃̌-yó jìsí ǹdə́ etwã-kùr w jìsí e súlí dɔbrɛ kùlkṍ* w jì y lú mú nə̀-twéésé n pə ń byǐ Saləmɔ nɛ. ¹² Ń súlí n pɔ̃ kɔn rɛ́ tɛ̀bɛ́ gakó ń yà ń tɛnɛ ń la wɔ̀rhɔ́, Yi jì y kɛ̀lɛ́ y wu w yilə, ǹdə́ jìsí shɛ̀bɛ́ gakó sə̀ y'à kə́kɛ́lɛ́ y mɔ́ yil mú, e súlí Yi jì y nə̀cɛ̀ndɛ́ ǹdə́ wẽ̀ né tɛ̀bɛ́ bə̀ pɔ Yi ni mú jìsí yil mú, lú mú nə̀-twéésé. ¹³ Dəvyidi kwè vwĩ̀-zwə́lnə* bé ǹdə́ Levyi dwí rí lyì bí kùkùlə̀ né yilə né bə̀ y'à kɛ̃ mɔ́ ǹdə́ tumə né nyɛ̀bɛ́ bə̀ mə̌ sə bə twĩ̀ Cinu Yi jì y w mú sɛ́bɛ́ rɛ́ e súlí Yi jì y tum wẽ̀ ré yilə né n pə Saləmɔ nɛ. ¹⁴ N byili mu sánə́má mɔ̀bɔ́ bə̀ mə̌ sə bə m'e zùrhì sánə́má wẽ̀ ré tum gakó yil mú dùmì rí e súlí sə̀byì-kùlì y bə̀ mə̌ sə bə m'e zùrhì sə̀byì-kùlì wẽ̀ ré tum gakó yil mú dùmì rí myɛ; ¹⁵ e súlí sánǝ́má pàntámsɛ́ cṹ jààsɛ́ ǹdə́ sánə́má pàntámsɛ́ cìcì mú sánə́má mɔ́ dùmì rí; e súlí sə̀byì-kùlì pàntámsɛ́ cṹ jààsɛ́ ǹdə́ sə̀byì-kùlì pàntámsɛ́ cìcì mú sə̀byì-kùlì y dùmì rí, kɔn tó ǹdə́ pàntɛ́mɛ́ cṹ jàà y gakó tum rí ne. ¹⁶ N byili sánə́má mɔ́ mɔ̀bɔ́ mə̀ mə̌ sə mə zùrhì byúúlí bə̀ n'ê cĩ́ búrú w rə̀ yó bə̀ pɛ Yi ni mú òdù gakó mó dùmì rí, e súlí sə̀byì-kùlì y kɛ̀bɛ́ bə̀ mə̌ sə bə m'e zùrhì sə̀byì-kùlì byúúlí dùmì rí, ¹⁷ e súlí nàmá-lyəlsé ǹdə́ jal-zhɔ́rhɔ́ nə̀zhĩ̌sí ǹdə́ kwə̀lsé sə̀ mə̌ sə sə zùrhì ǹdə́ sánə́má mɔ̀bɔ́ mə̀ càn mɔ́ dùmì rí, ǹdə́ sánə́má nə̀zhĩ̀-bwǎlsɛ́ dùmì rí, ǹdə́ sə̀byì-kùlì nə̀zhĩ̀-bwǎlsɛ́ dùmì rí, nə̀zhĩ̀-bwɛ̀lɛ́ gakó ǹdə́ è dùmì. ¹⁸ e súlí wẽ̀ rǝ̀ lwẽ́ nã́nyǝ̀nyɛ̀lɛ́ sánə́má vwĩ̀-jùlú w sánə́má mɔ̀bɔ́ mə̀ càn mɔ́ dùmì rí, e súlí lù eshərh-vwə̃tu w ǹdə́ sánə́má shərəbɛ̃́bá sə̀ vɔ̀mɛ̀ nɛ́ lɛ̀lɛ̀ nə pyi Cinu Yi dɔbrɛ kùlkṍ w mó zùrhù nə̀-twéésé. ¹⁹ Dəvyidi zɛ̃̀ n wɔ̀: «Rə̀myɛ́ èta mɔ́ gakó ŋwɛ́nɛ́ sɛ́bɛ́ Cinu cìcì jɛ̃̀ y kɛ̃ wẽ́. Sɛ́bɛ́ rə̀myɛ́ n'ê byili bə̀ gə́ m'a tó né bə tó lú mú nə̀-twéésé dɛnnɛ bə twĩ̀ tumə né né.» ²⁰ N zɛ̃̀ n wɔ̀ ń byǐ Saləmɔ nɛ: «À byǐ, zə wu-jɔ̀ ń mə́ twĩ̀ sə́ yə̀ bal; bə̀k'á dùr ywẽ yé, ǹ wu bə̀k'a gə yé, bə̀ Cinu à Yi rí ŋwɛ́nɛ́ ǹdə́ mɔ́. Ń tá ń la mɔ́ yõ̌ yé, ń tá ń la mɔ́ zhɔ̃́ yé, kɔn m'e yí Cinu Yi jì y tum rí gakó zhɔ̌. ²¹ Nyǐ vwĩ̀-zwə́lnə bé ǹdə́ Levyi dwí rí lyì bí kùkùlə̀ né ŋwɛ́nɛ́ Yi jì y tum rí rə̀myɛ́ mɔ́ yilə; pùbùlə̀ cìnə́ ǹdə́ lárma cìnə́ m'a nə tum dwí gakó yilə; sə yó-cìnə́ bé ǹdə́ dwí rí lyì bí púlə́púlə́ m'a wɛ̀rhɛ́ kɔn rɛ́ tɛ̀bɛ́ ǹ la bɛ rə̀ nyí pɔ mɔ́.»