¹ Pyɔ̌ Dəvyidi zɛ̃̀ n wɔ̀ lyì bí bə̀ y'à tú dwã yó mó gakó ne: «À byǐ Saləmɔ Yi cír mú wɔ́ bə̀sɔ́bwɛ̀lɛ́, e súlí myɛ ń gwẽ̌ yə̀l kaka yé. E jà tum rí já dɛ̃́dɛ̃́, bə̀ jì y kɛ̀bɛ́ ń la lú mú də̀ numbyíní yil yé, wɔ́ Cinu Yi yilə. ² À j'a ce jàn nɛ́ ǹdə à gə́ wɔ̌ nɛ́ a tɛnɛ kɔn rɛ́ tɛ̀bɛ́ bə̀ la m'e lù à Yi rí jì yə́: à tɛnɛ sánə́má, wẽ̀ ré tɛ̀bɛ́ rə̀ mə̌ sə rə yə̀ sánə́má wẽ̀ mó yilə; a tɛnɛ sə̀byǐ, wẽ̀ ré tɛ̀bɛ́ rə̀ mə̌ sə rə yə̀ sə̀byǐ wẽ̀ mó yilə; a tɛnɛ kàmmɔ, wẽ̀ ré tɛ̀bɛ́ rə̀ mə̌ sə rə yə̀ kàmmɔ wẽ̀ mó yilə; a tɛnɛ lù, wẽ̀ ré tɛ̀bɛ́ rə̀ mə̌ sə rə yə̀ lù wẽ̀ mó yilə; a tɛnɛ dǎr, wẽ̀ ré tɛ̀bɛ́ rə̀ mə̌ sə rə yə̀ dǎr wẽ̀ mó yilə; a tɛnɛ nə́kulə, nə̀ wun ní wɔ́ námbyín námpwẽ̀ ǹdə́ nə́kulə nə̀ n'ê swàrh dwã w ǹdə́ nə́kulə námbyínə́ ǹdə́ nə́kulə námpɔ̀pɔ̀ɔ̀lɛ ǹdə́ nə́kulə nyɛ̀bɛ́ nə̀ càn dwí gakó e súlí aləbátərɛa nánzhəzhɔ̌. ³ E súlí myɛ, à gə́ só à Yi rí jì y mú ce, à n'â pɛ à sə̀pwà sánə́má mɔ́ ǹdə́ sə̀byǐ mú mɔ̀bɔ́ à zhe mó à Yi rí jì y yilə, a m'a súlí kɔn tɛ̀bɛ́ gakó à tɛnɛ Cinu dúdú jì y èmyɛ́ mɔ́ yil mú ne: ⁴ sánə́má mɔ̀bɔ́ mə̀ shí Ofyííri cəə́le mɔ̀ɔ̀rhɛ zɔ̌m ǹdə́ sə̀byǐ mɔ̀bɔ́ bə̀ vùr mə̀ jìmdí cəə́le mɔ̀ɔ̀rhɛ zwã̌-èlyè ǹdə́ shə́-èna bə̀ la m'e fwàl Yi jì y byílsí. ⁵ Sə á cəcəl w zà mɔ́, mɔ̌ dõ ń nə́ ń yǎl n pə sánə́má kɔn rɛ́ tɛ̀bɛ́ gakó rə̀ mə̌ sə rə yə̀ sánə́má yilə, ǹdə́ sə̀byǐ kɔn rɛ́ tɛ̀bɛ́ gakó rə̀ mə̌ sə rə yə̀ sə̀byǐ yilə, e súlí tùntùnnə bé jɛ̃̀ tum dwí gakó yilə, e yə̀ pùbùlə̀ pɛnɛ́ ń nə́ ń pɛ Cinu ni?» ⁶ Rə̀myɛ́ yó, dwə́ né yó-cìnə́ bé, ǹdə́ Esərayɛl kwálsɛ́ yó-cìnə́ bé, shə̀dɛ́ɛ́sɛ mɔ̀rhɔ̀ mɔ̀rhɔ̀ yó-cìnə́ bé ǹdə́ shə̀dɛ́ɛ́sɛ zɔ̌m zɔ̌m yó-cìnə́ bé, e súlí byɛ̀bɛ́ bə̀ y'à n'ê nyǐ pyɔ̌ mɔ́ tumə né yò mó yó-cìnə́ bé pə pùbùlə̀ pansɛ. ⁷ Bə̀ pɔ sɛ Yi jì y tum rí yilə: sánə́má cəə́le mɔ̀ɔ̀rhɛ̀ zɔ̌m ǹdə́ shə́-shàlpyɛ̀ (170 000) ǹdə́ sánə́má wár-kùlsi mɔ̀ɔ̀rhɛ̀ shíyə́ (10 000) ǹdə́ sə̀byí cəə́le rə̀ du mɔ̀ɔ̀rhɛ̀ zwã̌-àtɔ̀ (300 000) ǹdə́ kàmmɔ ò yú cəə́le mɔ̀ɔ̀rhɛ̀ zɔ̃̌-nyə̀ldù (600 000) e súlí lù ò dùmì y'à lyɛ̃ cəə́le mɔ̀rh-fwààlɛ̀ rə̀tɔ̀ (3 000 000). ⁸ Lyì bí byɛ̀bɛ́ bə̀ y'à zhe nə́kulə nyɛ̀bɛ́ nə̀ càn kwè ne bə ce Gɛrəshɔn jì y lò Yayɛl jɔ̃̀ wa, bə̀ ń ló Cinu jì y nə̀cɛ̀ndɛ́ yó. ⁹ Dwí rí púlə́púlə́ wu zɔ nyàn bə̀ pùbùlə̀ pansɛ́ shɛ̀bɛ́ bə̀ pɔ mɔ́ yilə, b'è y'à wɔ́ ǹdə́ bə̀ wun gakó bə̀ y'à pɔ sɛ Cinu Yi yilə. Pyɔ̌ Dəvyidi myɛ wu zɔ nyàn dɛ̃́dɛ̃́ rə̀ yilə. ¹⁰ Dəvyidi ce Cinu Yi nə̀bán lyì bí púlə́púlə́ yírh wə, ń mə́ ń wə̀lə̀: «Cinu, nə́ da Esərayɛl Yi, ǹ yil ré nə còrhó twéé gakó! ¹¹ Wɔ́ ǹmyɛ́ ǹ cǐ jɛ́ɛ́nɛ ǹdə́ jàn ǹdə́ cɛ̀nɛ̀ ǹdə́ zùwə́ ǹdə́ còrhó Cinu Yi, bə̀ kɔn rɛ́ tɛ̀bɛ́ gakó rə̀ wɔ dɛ̃̌-yi w ǹdə́ tɛ̃́ cɛ yó wɔ́ ǹmyɛ́ ǹ cǐ ri. Wɔ́ ǹmyɛ́ ǹ nə́ ǹ jí pyɛ̀lɛ̀, ǹ zhe ŋwɔ̀nɔ́ wẽ̀ ré gakó yó wə, Cinu. ¹² Nə̀cɛ̀ndɛ̀ ǹdə́ zùwə́ n'ê shí ǹmyɛ́ sono, sə wɔ́ ǹmyɛ́ myɛ ǹ cǐ kɔn gakó. Jàn ǹdə́ ŋwɔ̀nɔ́ ŋwɛ́nɛ́ ǹ jɔ̃̀ wa; ǹmyɛ́ jɛ̃̀ y è n'ê zhẽ̌ numbyíní yó dɛ̃̌, è n'ê súlí è pɛ y jàn e zhì kẽkẽ. ¹³ Èlǎsɛ̃́, nə́ Yi, nə́ n'é ce ǹ nə̀báná, nə́ n'é súlí nə́ cèrhé ǹ yil ré rə̀ càn dɛ̃́dɛ̃́ mɔ́. ¹⁴ Àmyɛ́ wɔ́ byè, à dwí rí myɛ wɔ́ byè nə́ m'é ŋwɛ̀nɛ́ nə́ pɔ̃́ pùbùlə̀ pansɛ́ shɛ̀bɛ́ èta mɔ́? Kɔn gakó n'ê shí ǹ sono, sə kɔn rɛ́ tɛ̀bɛ́ nə́ pɔ mɔ́ mɔ́ wɔ́ ǹmyɛ́ sõ rə̀ shí ni. ¹⁵ Nə́ wɔ́ zhələ ǹdə nə́ dabá ta, ǹmyɛ́ yé né, nə́ dwã nɛ́ cɛ yó mó n'ê lyɛ̃ làlà ǹdə ywə́l ta, ce nə́ t'á dɛ̃̀ kaka yé. ¹⁶ Cinu nə́ Yi, wẽ̀ ré tɛ̀bɛ́ nánzhəzhɔ̌ w gakó nə́ tɛnɛ nə́ la m'é lù jì ǹ yil ré rə̀ wɔ́ rə̀ dúdú rə̀ dwí ni mú còrhó yil mú, wɔ́ ǹmyɛ́ sõ rə̀ shí ní e súlí myɛ wɔ́ ǹmyɛ́ ǹ cǐ ri. ¹⁷ À yě bə̀ ǹ nə́ ǹ gwɛ̃ numbyíní wẽ́ mùnì ga ń lwar kɔn rɛ́ tɛ̀bɛ́ è n'ê bùl mú sə ǹ súlí ǹ só cángá. Wɔ́ ǹdə́ wu cángá, ǹd'â pùbùlə̀ à pɔ mɔ́ pansɛ́ shɛ̀bɛ́ gakó, a zɛ̃̀ à nə ǹ dwí rí rə̀ wɔ nyɔ̀nɔ̀ mɔ́, rə̀ n'ê pɛ mɔ́ pùbùlə̀ pansɛ ǹdə́ wu-nyɔ̃̀. ¹⁸ Cinu, nə́ dabá Abəraam ǹdə́ Yəzakɛ ǹdə́ Zhakɔɔbɛ Yi, ce pùbùlə̀ né nə̀myɛ́ mɔ́ dwí rí j'a yə̀ ǹ dwí lyì bí wun ní wẽ́ twéé gakó, sə́ ce bə̀ wun ní j'a zhí ǹmyɛ́ nɛ. ¹⁹ Sə́ pə wu-põ̀ à byǐ Saləmɔ nɛ mùnì ga n zwẽ ǹ nyə́ né ǹdə́ ǹ pùbùlə̀ né ǹdə́ ǹ nyə́ né ǹ kwè mó sə n wɛ̀rhɛ́ ǹdə nə̀ gakó gə́ n'ê byili ní, sə n súlí n lù jì y à tɛnɛ è lú mú wẽ̀ ré mó.» ²⁰ Rə̀myɛ́ kwã nɛ́, Dəvyidi zɛ̃̀ n wɔ̀ lyì bí bə̀ y'à tú dwã yó mó púlə́púlə́ ne: «Ce-nə Cinu á Yi rí nə̀báná.» Bə̀ gakó zɛ̃̀ bə ce Cinu, bə̀ dabá Yi rí nə̀báná. Bə jòm bə̀ nə̀dwə́nə́ yó, bə wùlì tɛ̃́ Cinu Yi ǹdə́ pyɔ̌ mɔ́ yé né. ²¹ Dɛ̃ rɛ́ rə̀myɛ́ mɔ́ zɛ̃̀ nəkɔkɔ́lɛ́ yá, bə̀ zwə́l vwə̃̀ ǹdə́ vwə̃̀-námpúmə́ cɛ̃́ɛ̃́ bə pə Cinu ni: nə̀-byərh mɔ̀rhɔ̀ ǹdə́ pyì-byərh mɔ̀rhɔ̀ ǹdə́ pyì-byǐrh mɔ̀rhɔ̀ e súlí nə̀ də̀vɛ̃́ pansɛ́ ǹdə́ vwə̃̀ nánzhəzhɔ̌ Esərayɛl púlə́púlə́ yilə. ²² Bə jí bə súlí bə nyɔ̀ Cinu yé né, dɛ̃ rɛ́ rə̀myɛ́ mɔ́ yù wə, wu-nyɔ̃̀ nánfɔ̀lɔ̀ wẽ́, bə zɛ̃̀ bə k'e cír Dəvyidi byǐ Saləmɔ, twər rə̀lyè nyǎn rɛ́. Bə tútǔ mu ǹdə́ pyɛ̀lɛ̀ nwə̃̌ n jǐrh pyɔ̌ Cinu yilə; bə tútǔ Sadɔɔkɛ myɛ ǹdə́ pyɛ̀lɛ̀ nwə̃̌ n jǐrh vwĩ̀-zwə́lnə*. ²³ Saləmɔ jòm Cinu pyɛ̀lɛ̀ də̀gwã́ y yó, n yə̀ pyɔ̌ ń da Dəvyidi jàà wa, sə ń pyɛ̀lɛ̀ rɛ́ zwẽ nyí. Esərayɛl lyì bí gakó zwẽ ń nyí ni. ²⁴ Yó-cìnə́ bé gakó ǹdə́ shə̀dɛ́ɛ́sɛ́ e súlí pyɔ̌ Dəvyidi byǎ bɛ́ gakó shɛ̀nɛ́ pyɔ̌ Saləmɔ nyí ni. ²⁵ Cinu já n búl n zhẽ̌ Saləmɔ yó dɛ̃̌, Esərayɛl lyì byǎ bɛ́ gakó yírh wə, n ce ń pyɛ̀lɛ̀ rɛ́ còrhó w dwini pyǎ bɛ́ byɛ̀bɛ́ bə̀ jɛ̀nɛ̀ mɔ bə yə̀ pyǎ Esərayɛl nɛ́ mɔ́. ²⁶ Zhese byǐ Dəvyidi jú pyɛ̀lɛ̀ Esərayɛl púlə́púlə́ yó. ²⁷ Ń jú pyɛ̀lɛ̀ rɛ́ Esərayɛl púlə́púlə́ yó w byinə shə́-èna: ń jòm Ebərɔ̃ nɛ́ n mə n jí ri byinə nyàlpyɛ̀, n zɛ̃̀ n jòm Zhərəzalɛm nɛ́ n mə n jí ri byinə shə́-ètɔ̀ ǹdə́ nə̀tɔ̀. ²⁸ Ń nɔ caarɛ tɛ̀bɛ́ rə̀ càn n zɛ̃̀ n cì. Ń yà ń sú lũ wə́, n sú nə̀cɛ̀ndɛ́ ǹdə́ còrhó wə́. Sə wɔ́ ń byǐ Saləmɔ ń yàl pyɔ̌ n jòm ń jàà wa. ²⁹ Pyɔ̌ Dəvyidi tumə né, nə̀ nã́yə́ə́ né e m'e vò nə̀ nánkwaá nɛ́ ga, kɛ̃ nyì-zwennə Saməwəə Tumə né sɛ́bɛ́ rɛ́ wẽ́ ǹdə́ nyì-zwennə Natã Tumə né sɛ́bɛ́ rɛ́ wẽ́ e súlí nyì-zwennə Gaadɛ myɛ Tumə né sɛ́bɛ́ rɛ́ wẽ́. ³⁰ Bə̀ súlí bə̀ n'ê zɔ̀m ń pyɛ̀lɛ̀ rɛ́ ǹdə́ ń bɛlɛ tumə né e súlí ywẽ̀ né nyɛ̀bɛ́ nə̀ zɔ ńmyɛ̌ ǹdə́ Esərayɛl ǹdə́ tənèsé dwã bɛ́ gakó mó yò nə̀ wẽ́.