koussoube-marc-lee_1ch_text

Kǝ̀kàl-fwɛ̀lɛ̀ 26

¹ Étwí-ènyə́ né dɛ̀nna bɛ́ myɛ y'à bɔ̀n kùkùlə̀. Kore byǎ bɛ́ wẽ́ è yàl: Kore byǐ Məshələmya, Asaafɛ nɔ̃̌ wá. ² Məshələmya lùl byǎ bwàlpyɛ̀. Nyǐ bə̀ yilə né: Zakarɛ, byì-cɛ yá, ǹdə́ Yəjayɛl, bə̀lyè nyǎn mɔ́, ǹdə́ Zəbaja, bə̀tɔ̀ nyǎn mɔ́, ǹdə́ Yatənyɛl, bə̀na nyǎn mɔ́, ǹdə́ ³ Elam, bə̀nu nyǎn mɔ́, ǹdə́ Yɔwanã bwə̀ldù nyǎn mɔ́, e súlí Elyowenəyi, bwàlpyɛ̀ nyǎn mɔ́. ⁴ Obɛɛdɛ-Edɔm lùl byǎ lyɛlɛ. Nyǐ bə̀ yilə né: Shəmaya, byì-cɛ yá, ǹdə́ Yɔzabaadɛ, bə̀lyè nyǎn mɔ́, ǹdə́ Yɔwa bə̀tɔ̀ nyǎn mɔ́, ǹdə́ Sakaarɛ, bə̀na nyǎn mɔ́, ǹdə́ Nətanəyəə, bə̀nu nyǎn mɔ́, ǹdə́ ⁵ Ammyɛl, bwə̀ldù nyǎn mɔ́, ǹdə́ Yəsakaarɛ, bwàlpyɛ̀ nyǎn mɔ́, e súlí Pəwulətəyi, lyɛlɛ nyǎn mɔ́. Zhə̀n ga, Yi y'à cĩ́ bwəl Obɛɛdɛ-Edɔm yó. ⁶ Ń byì-cɛ Shəmaya lùl byǎ bə̀ y'à zhe ŋwɔ̀nɔ́ bə̀ dwí rí wẽ́ bə̀ bə̀ y'à wɔ́ kàndar. ⁷ Shəmaya byǎ bɛ́ yàl: Otəni ǹdə́ Arəfɛɛ ǹdə́ Obɛɛdɛ ǹdə́ Eləzabaadɛ ǹdə́ bə̀ da-byǎ Elyəwu ǹdə́ Səmakəya, bə̀myɛ bə̀lyè y ga y'à wɔ́ kàndar. ⁸ Bə̀myɛ́ èta mɔ́ gakó y'à wɔ́ Obɛɛdɛ-Edɔm byǎ; bə̀myɛ́ ǹdə́ bə̀ byǎ bɛ́ ǹdə́ bə̀ da-byǎ bɛ́ y'à wɔ́ kàndar, bə̀ bə̀ y'à n'ê twĩ̀ bə̀ tum rí ǹdə́ yə̀wǎl. Bə̀ y'à wɔ́ nunə shə́-shə̀ldù ǹdə́ bə̀lyè. ⁹ Məshələmya lùl byǎ, ń yà ń súlí ń zhe da-byǎ, bə̀ gakó y'à wɔ́ kàndar shí ǹdə́ lyɛlɛ. ¹⁰ Osa Mərəri jì y lò mó lùl byǎ bə̀na: Shiməri, bə̀ dwí rí náncɛ yá; ń da pɔ mɔ náncɔɔrɛ́ ǹdə́ ń yà ń də̀ byì-cɛ ga. ¹¹ Yələkəya yàl bə̀lyè nyǎn mɔ́, Təbalya yàl bə̀tɔ̀ nyǎn mɔ́, Zakarɛ yàl bə̀na nyǎn mɔ́; Osa byǎ bɛ́ ǹdə́ ń da-byǎ bɛ́ y'à wɔ́ nunə shí ǹdə́ bə̀tɔ̀. ¹² Étwí-ènyə́ né dɛ̀nna bɛ́ kùkùlə̀ né yó-cìnə́ bé ǹdə́ bə̀ da-byǎ bɛ́ ga y'à n'ê tó dwã bə̀ twĩ̀ Cinu Yi jì y wə. ¹³ Bə̀ tɔ́ tántɛ́ɛ́ bə m'e pə étwí-ènyí rə̀dù gakó, bə̀ dwə́ né ne, e ce bə̀ ga námpɔ́lɛ́ y ǹdə́ bə̀ ga náncɛ y nɛ́. ¹⁴ Tántɛ́ɛ́ y zɔ Shələmya yi-púrhí sõ étwí-ènyí rí yilə. E zə ń byǐ Zakarɛ jə̀-gwã̀ sõ étwí-ènyí rí yilə; Zakarɛ yà ń wɔ́ cícírnə mɔ̀bɔ́ ń lɔ́wá. ¹⁵ Obɛɛdɛ-Edɔm nə jə̀-jĩ́ sõ étwí-ènyí rí, ń byǎ bɛ́ zɛ̃̀ bə̀ y'à mə̌ sə bə yìlì jìsí bə̀ n'ê cĩ́ wẽ̀ ré sə̀ wẽ́ mó. ¹⁶ Shupyim ǹdə́ Osa nɔ yi-zùr sõ étwí-ènyí rí e súlí Shaləkɛɛtɛ étwí-ènyí rí, rə̀ zǎ sə-jìlə́ y mó. Nyǐ tumə né gə́ y'à tə̀l né: ¹⁷ Yi-púrhí étwí-ènyí rí ni, y'à wɔ́ Levyi dwí rí lyì bwə̀ldù, dɛ̃ rə̀dù yilə; jə̀-gwã̀ sõ étwí-ènyí rí ni, lyì bə̀na, dɛ̃ rə̀dù yilə; jə̀-jĩ́ sõ étwí-ènyí rí ni, lyì bə̀na, dɛ̃ rə̀dù yilə; jìsí bə̀ n'ê cĩ́ wẽ̀ ré sə̀ wẽ́ mó yil mú, kùkùlə̀ nə̀lyè, lyì bə̀lyè bə̀lyè yilə; ¹⁸ jì y dõ mó è dɛ̃ gàà mɔ́, yi-zùr sõ mó, lyì bə̀na sɔ́má y yilə, ǹdə́ bə̀ dwã bə̀lyè jì y wẽ́. ¹⁹ Wɔ́ Kore byǎ bɛ́ ǹdə́ Mərəri byǎ bɛ́ bə̀ wɔ́ étwí-ènyə́ né dɛ̀nna bɛ́ mɔ́ kùkùlə̀ né èta. ²⁰ Levyi dwí rí lyì jàlà y'à n'ê nyǐ Yi jì y nə̀cɛ̀ndɛ́ ǹdə́ wẽ̀ ré tɛ̀bɛ́ bə̀ y'à pɔ Yi ni mu yò. ²¹ Gɛrəshɔn dwí rí lò Ladã byǎ bɛ́, bə̀ wɔ́ bə̀ dwə́ né yó-cìnə́ mó y'à wɔ́ Yeyeli, ²² ǹdə́ ń byǎ bɛ́ ǹdə́ Zətam e súlí ń da-byǐ Zuwəə; bə̀myɛ́ y'à n'ê nyǐ Cinu Yi jì y nə̀cɛ̀ndɛ́ yò. ²³ Aməram ǹdə́ Yəsaarɛ ǹdə́ Ebərɔ̃ e súlí Uzhəə byǎ bɛ́ wẽ́, ²⁴ è y'à wɔ́ Muyiisi byǐ Gɛrəshɔn byǐ Shəbwɛl ń yà ń wɔ́ byɛ̀bɛ́ bə̀ n'ê nyǐ Yi jì nə̀cɛ̀ndɛ́ yò mó yé né cə́bal. ²⁵ Nyǐ ń da-byǎ bɛ́ Elyəzɛɛrɛ lùl mú: Elyəzɛɛrɛ lùl Erəyabya, Erəyabya zɛ̃̀ n lù Yəshaya, Yəshaya zɛ̃̀ n lù Yɔram, Yɔram zɛ̃̀ n lù Zəkəri, Zəkəri zɛ̃̀ n lù Shəlomiiti. ²⁶ Shəlomiiti ńmyɛ̌ mɔ́ ǹdə́ ń da-byǎ bɛ́ y'à n'ê nyǐ wẽ̀ ré tɛ̀bɛ́ pyɔ̌ Dəvyidi ǹdə́ dwə́ né yó-cìnə́ bé ǹdə́ shə̀dɛ́ɛ́sɛ mɔ̀rhɔ̀ mɔ̀rhɔ̀ ǹdə́ shə̀dɛ́ɛ́sɛ zɔ̌m zɔ̌m yó-cìnə́ bé e súlí shə̀dɛ́ɛ́sɛ́ yó-cìnə́ dwã bɛ́ y'à pɔ Yi ni mú yò. ²⁷ Bə̀ y'à vùr re wẽ̀ ré tɛ̀bɛ́ bə̀ y'à pwà búlə́ né jàà w mɔ́ wẽ́, bə pə Cinu Yi ni bə̀ la m'e nyǐ Yi jì y yò. ²⁸ E súlí kɔn dɛ̀bɛ́ gakó Yi nyì-zwennə* Saməwəə ǹdə́ Ciishi byǐ Səyuuli ǹdə́ Nɛɛrɛ byǐ Abənɛɛrɛ e súlí Səruyə byǐ Zhɔwaabɛ y'à pɔ Yi ni mú. È y'à wɔ́ Shəlomiiti ǹdə́ ń da-byǎ bɛ́ bə̀ y'à n'ê nyǐ kɔn rɛ́ tɛ̀bɛ́ gakó bə̀ y'à pɔ Yi ni mú yò. ²⁹ Yəsaarɛ dwí rí lò Kənanya ǹdə́ ń byǎ bɛ́ y'à wɔ́ yé né cìnə́ ǹdə́ bù-kárna bɛ́ bə̀ y'à n'ê nyǐ Esərayɛl cɔ w jòmə̀ y ywẽ̀ né yò. ³⁰ Ebərɔ̃ dwí rí lyì wẽ́, è yàl Ashabya ǹdə́ kàndar mɔ̀rhɔ̀ ǹdə́ zɔ̃̌-nyàlpyɛ̀ (1 700) bə̀ y'à n'ê yìlì Esərayɛl tənà y è wɔ Zhɔrdɛ̃ bwǐ yi-zùr sõ mó; bə̀ y'à n'ê nyǐ ywẽ̀ né nyɛ̀bɛ́ nə̀ ŋwɛ́nɛ́ bə̀myɛ́ ǹdə́ Yi bwə̌l wə, e súlí pyɔ̌ mɔ́ tumə né yò. ³¹ Yərəya yà ń wɔ́ Ebərɔ̃ byǎ bɛ́ yó-cə́bal. Dəvyidi pyɛ̀lɛ̀ rɛ́ jú byinə shə́-èna nyǎn rɛ́ yó wə, bə̀ pyà Ebərɔ̃ jì y nàmbala pár lwar, sə bə̀ púrí bə̀ kàndar yàl bə̀ wẽ́, Yazɛɛrɛ nɛ́, Galaadɛ tənà y wa. ³² Yərəya ǹdə́ ń da-byǎ bɛ́ y'à wɔ́ kàndar mɔ̀ɔ̀rhɛ̀ rə̀lyè ǹdə́ zɔ̃̌-nyàlpyɛ̀ (2 700), bə̀ y'à wɔ́ dwə́ né yó-cìnə́. Pyɔ̌ Dəvyidi yà ń cír be bə̀ bə̀ nyǐ ywẽ̀ né nyɛ̀bɛ́ nə̀ ŋwɛ́nɛ́ bə̀myɛ́ ǹdə́ Yi bwə̌l w e súlí pyɔ̌ mɔ́ tumə né yò, Orɔbɛn kwálá y ǹdə́ Gaadɛ kwálá e súlí Manasɛ kwálá y kə̀kàlà y wa.