¹ Dəvyidi gə́ tú n jǐrh náncɛ dɛ̃́dɛ̃́ yi ní, ń cír ń byǐ Saləmɔ n ce n jǐrh Esərayɛl púlə́púlə́ pyɔ̌. ² N zɛ̃̀ n cĩ́ Esərayɛl lyì byǎ bɛ́ yó-cìnə́ bé gakó ǹdə́ vwĩ̀-zwə́lnə* bé e súlí Levyi dwí rí lyì bí dwã yó. ³ Bə gə̀ Levyi dwí rí lyì bí byɛ̀bɛ́ bə̀ y'à zhe byinə shə́-ètɔ̀ ǹdə́ lyì bí byɛ̀bɛ́ bə̀ byinə né y'à lyɛ̃ gàà mɔ́. Bə̀ yàl nunə mɔ̀ɔ̀rhɛ̀ shə́-ètɔ̀ ǹdə́ lyɛlɛ. ⁴ Dəvyidi zɛ̃̀ n wɔ̀: «cír-nə nunə mɔ̀ɔ̀rhɛ̀ shí-èlyé ǹdə́ rə̀na bə̀ wẽ́ bə̀ la Yi jì y lú mú yò nyǔ ǹdə́ nunə mɔ̀ɔ̀rhɛ tə̀ldù bə̀ la yə̀ yé né cìnə́ ǹdə́ bù-kárna, ⁵ nunə mɔ̀ɔ̀rhɛ̀ rə̀na bə̀ la yə̀ étwí-ènyə́ né yìlnə e súlí nunə mɔ̀ɔ̀rhɛ̀ rə̀na bə̀ la cèrhé Cinu Yi ǹdə́ wə̀-dúúrí tɛ̀bɛ́ à ce bə wɛ̀rhɛ́ rə̀myɛ́ mɔ́ yil mú.» ⁶ Dəvyidi bɔ̀n bɛ kùkùlə̀ kɔn tó dwã ǹdə́ Levyi byǎ bɛ́: Gɛrəshɔn, ǹdə́ Kəyaatɛ e súlí Mərəri. ⁷ 7 Gɛrəshɔn byǎ bɛ́ yàl Ladã ǹdə́ Shəmeyi. ⁸ Ladã lùl byǎ bə̀tɔ̀: Yəyəə, byì-cɛ yá, ǹdə́ Zətam e súlí Zuwəə. ⁹ Shəmeyi lùl byǎ bə̀tɔ̀: Shəlomiiti ǹdə́ Azhɛl e súlí Arã, bə̀myɛ́ bə̀ yàl Ladã dwə́ né yó-cìnə́. ¹⁰ Shəmeyi kə́ n súlí n lù byǎ bə̀na: Yaatɛ ǹdə́ Zəza ǹdə́ Yəwuushi e súlí Bərəya. ¹¹ Yaatɛ yà ń wɔ́ náncɛ yá, Zəza bə̀lyè nyǎn mɔ́; Yəwuushi ǹdə́ Bərəya yə̀ bə̀sɔ́ná nánzhəzhɔ̌ lùl yé, rə̀myɛ́ ce bə mɛ̃ dwí rə̀dù, tum rə̀dù yilə. ¹² Kəyaatɛ lùl byǎ bə̀na: Aməram ǹdə́ Yəsaarɛ ǹdə́ Ebərɔ̃ e súlí Uzhəl. ¹³ Aməram byǎ bɛ́ yàl: Aarɔ̃ ǹdə́ Muyiisi. Bə cír Aarɔ̃ bə cĩ́ ń dúdú ń la n nyǐ Yi dúdú jàà y tum rí yò, ńmyɛ̌ ǹdə́ ń byǎ bɛ́, gaga yilə; bə̀ la pansɛ́ shɛ̀bɛ́ sə̀ lwẽ́ wɔ́ nã́nyə̀nyɛ̀lɛ́ mɔ́ pɔ Cinu yé né, bə̀ la Cinu tum rí tũ̌ sə bə súlí bə cĩ́ bwəl Cinu Yi yil yilə, kɔn m'e la gaga. ¹⁴ È gə wɔ́ Muyiisi yilə, ń yàl Yi lò; sə bə̀ gàl ń byǎ bɛ́ bə ce Levyi kwálá lyì bí wẽ́. ¹⁵ Muyiisi byǎ bɛ́ yàl: Gɛrəshɔn ǹdə́ Elyəzɛɛrɛ. ¹⁶ Gɛrəshɔn byǎ bɛ́ yàl: Shəbwɛl, byì-cɛ yá. ¹⁷ Elyəzɛɛrɛ lùl byǐ mə̀dù: Erəyabya. Ń yə̀ byǎ dwã lùl yé, sə Erəyabya lùl byǎ nánjə̀jóló. ¹⁸ Yəsaarɛ byǎ bɛ́ yàl: Shəlomiiti, byì-cɛ yá. ¹⁹ Ebərɔ̃ byǎ bɛ́ yàl: Yərəya, byì-cɛ yá, ǹdə́ Amarəya, bə̀lyè nyǎn mɔ́ ǹdə́ Yazhɛl, bə̀tɔ̀ nyǎn mɔ́ e súlí Yəkamam, bə̀na nyǎn mɔ́. ²⁰ Uzhəə byǎ bɛ́ yàl: Myəka, byì-cɛ yá, ǹdə́ Yəsha, bə̀lyè nyǎn mɔ́. ²¹ Mərəri byǎ bɛ́ yàl: Məli ǹdə́ Mushi. Məli lùl byǎ bə̀lyè, Eləyazaarɛ ǹdə́ Ciishi. ²² Eləyazaarɛ cù ǹdə́ ń yə̀ bal-byǐ lùl yé, è yàl kana-byǎ dúdú, sə wɔ́ bə̀ da da-byǐ Ciishi byǎ bɛ́ bə̀ jú bi. ²³ Mushi lùl byǎ bə̀tɔ̀: Məli ǹdə́ Edɛɛrɛ e súlí Yərəmɔɔtɛ. ²⁴ Wɔ́ Levyi byǎ bɛ́ èta, kɔn tó dwã ǹdə́ bə̀ dwə́ né, ǹdə́ dwə́ né yó-cìnə́ bé kɔn tó dwã ǹdə́ bə̀ tumə né, bə̀ gə́ byẽ̀ lò mə̀dù mə̀dù gakó yil ré bə m'e gə̀ nɛ mɔ́. Bə̀ y'à n'ê ji kùr ǹdə́ Cinu jì y tum rí tũ̌, bə̀ byinə shí-èlyè yó wə, è m'ê la. ²⁵ Zhə̀nà, Dəvyidi gaga mɔ́ yà ń wə̀lə̀: «Cinu, Esərayɛl Yi rí, pɔ shìrhə́ ń dwí rí ni, sə rə̀ cìcì mú j'â jě Zhərəzalɛm nɛ́ twéé twéé yilə. ²⁶ Rə̀myɛ́ ce, Levyi dwí rí lyì bí k'ê t'â la Yi kòrhó w ǹdə́ wẽ̀ ré tɛ̀bɛ́ gakó bə̀ m'ê cèrhé Cinu mú, zhũ kə́dò yé.» ²⁷ Sə ǹdə Dəvyidi zɔ̀mɛ̀ nànkwɛɛ́ rɛ́ gə́ byili ní wɔ́ èta bə̀ gàl Levyi byǎ bɛ́ nɛ́, kɔn zhì byinə shí-èlyè cìnə́ e m'e vò. ²⁸ Bə̀ mə̌ sə bə tó Aarɔ̃ byǎ bɛ́ nyə́ né ne, Cinu jì y tumə né yilə, kǎlsɛ́ wun ní, e súlí jǐnsí shò kwã nɛ́. E súlí kɔn rɛ́ tɛ̀bɛ́ gakó bə̀ pɔ Yi ni mú jimdí vǔr ǹdə́ Cinu jì y tum rí tũ̌ yilə; ²⁹ bə̀ mə̌ sə bə nyǐ búrú w bə̀ n'ê pɛ Yi ni mú ǹdə́ mún mú bə̀ n'ê pɛ vwĩ̀ rí yil mú ǹdə́ ŋwǎmsɛ́ sə̀ yə̀ sã̀-nə̀byẽ̌ ce mó ǹdə́ búúrí rə̀ kɛ̀lɛ̀ mɔ́ ǹdə́ búúrí dwã e súlí wẽ̀ ré yírh ǹdə́ rə̀ dwɛ̀ɛ̀lɛ́ mɔrhɔ wẽ̀ ré gakó yò. ³⁰ Bə̀ mə̌ sə bə tɛnɛ bə zhì twéé gakó, nəkɔkɔ́lɛ́ ǹdə́ də̀dɛ̀nɛ́ ga, bə m'e cèrhé Cinu Yi sə bə súlí bə gə̀ ń shə̀nə̀. ³¹ E súlí bə̀ gə la mɔ vwə̃̀ námpúmə́ cɛ̃́ɛ̃́ nɛ́ pɔ, shìrhə́ dɛ̃ rɛ́ yù wə, ǹdə́ càn-dùlí y dɛ̃ nã́yéé ré yù wə, ǹdə́ címsí dwã bɛ́ yù wə. Yi gakó wẽ́, bə̀ m'a twĩ̀ bə̀ tum rí Cinu Yi yé né, twər ré tɛ̀bɛ́ yó w bə̀ pɔ bɛ rə̀ nyí gaga yil mú. ³² Bə̀ m'a nyǐ Cinu kòrhó w ǹdə́ jì y Yi dúdú cǐ mú yò, sə bə twĩ̀ ǹdə́ bə̀ da-byǎ Aarɔ̃ byǎ bɛ́, bə̀myɛ n'ê twĩ̀ Yi jì y tum rí mú.