¹ Wɔ́ rə̀myɛ́ rə̀ ce Dəvyidi zɛ̃̀ n wɔ̀: «È wɔ́ nyɔ̀nɔ̀ è wɔ́ Cinu Yi jì yə́, sə nyǐ vwĩ̀-jùlú w kɔ̀bɔ́ Esərayɛl lyì byǎ bɛ́ mə̌ sə bə̀ n'ê zwə́l vwə̃̀ námpúmə́ cɛ̃́ɛ̃́ nɛ́ ò yó mó.» ² Dəvyidi pə nyí bə̀ bə̀ cĩ́ zhələ bé bə̀ y'à wɔ Esərayɛl tənà y w mɔ́ dwã yó, n zɛ̃̀ n vùr nə́kul-sə̀lnə bə̀ la nə́kulə sə́l Yi jì y lú yilə. ³ Dəvyidi súlí n tɛnɛ lù ò y'à já, bwə̀ə̀lé jɛ̀sɛ́ dàdǎbsɛ́ yilə, ǹdə́ cɛ̌bsɛ́ námməgɔ́lsɛ́, e súlí kàmmɔ myɛ sə ò gə́ y'à já mɔ́ ce bə̀ y'à wàr ò dùmì rí bə̀ la jə̀ə̀le yé, ⁴ e súlí sɛ́ɛ́dərɛ dǎr, rə̀ yó y'à wàr rə̀ la gál yé, bə̀ Sədɔ̃ lyì bí ǹdə́ Tiiri lyì bí y'à zɔ sɛ́ɛ́dərɛ dǎr nánzhəzhɔ̌ bə b'e pə Dəvyidi ni. ⁵ Dəvyidi yà ń nə́ ń wə̀lə̀: «À byǐ Saləmɔ gwẽ̌ wɔ́ bə̀sɔ́bwɛ̀lɛ́ e súlí myɛ ń gwẽ̌ yə̀l kaka yé. E jà bə̀ mə̌ sə bə zɔ̀m jì y kɛ̀bɛ́ bə̀ la lú Cinu Yi yil mú yò tənèsé gakó wẽ́, è jɛ́nɛ́ rɛ́ ǹdə́ è cɛ̀nɛ̀ rɛ́ yilə. Rə̀myɛ́ ce à m'a tɛnɛ è lú mú a cĩ́ mu.» Èta, Dəvyidi tɛnɛ wẽ̀ ré tɛ̀bɛ́ bə̀ la m'e lù jì y mú nánzhəzhɔ̌, ǹdə́ ń gwẽ̌ yə̀ cì yé. ⁶ Dəvyidi byẽ̀ ń byǐ Saləmɔ, n pɔ̃ nyí bə̀ ń lú jì Cinu, Esərayɛl Yi rí yilə. ⁷ 7 N wɔ̀ Saləmɔ nɛ: «À byǐ, à cìcì mú búl a bù jì lú bùlə̀ Cinu à Yi rí yil yilə. ⁸ Sə Cinu Yi yà ń zɔ̀m ǹdə́ nɛ n wɔ̀: ‹Ǹ ló jal tɛ̃́ dɛ̃́dɛ̃́, ń súlí ń bú búlə́ nánfwààlɛ. Ǹ gə́ ló jal tɛ̃́ dɛ̃́dɛ̃́ à yé né mó ce ǹ tá ǹ la jì lú àmyɛ́ yil ré còrhó yil yé. ⁹ Nyǐ, ǹ m'ǎ lù byǐ, ń mà n yə̀ yə̀-zùlə́ cə́bal, à m'a pɔ̃ yə̀-zùlə́ ń zwə̀ bé byɛ̀bɛ́ gakó bə̀ kə́kɛ́lɛ́ mɔ mɔ́ cəcəl wə, bə̀ ń yil ré m'a yə̀ Saləmɔ, sə à m'a ce Esərayɛl lyì byǎ bɛ́ jòm yə̀-zùlə́ wẽ́, wu-zɛ̃̀ɛ̃́ myɛ t'â la bɛ zal ń nyǔ mú yi ní yé. ¹⁰ Wɔ́ ńmyɛ̌ ń mà n lù jì à yil ré còrhó yilə. Ń mà n yə̀ byǐ à yilə, sə à m'a yə̀ da ń yilə, à m'a ce ń pyɛ̀lɛ̀ cĩ́ kùr Esərayɛl nɛ́ twéé twéé yilə.› ¹¹ Rə̀myɛ́ ce, èlǎsɛ̃́, Cinu yál nɛ́ ǹdə́ mɔ́, à byǐ, mùnì ga ń ŋwɛ̀nɛ́ ń lù Cinu ǹ Yi rí jì yə́, ǹdə ń gə́ bwəl nyí ní ǹ shò kwã nɛ́ mɔ́. ¹² Cinu wúrí n pɔ̃́ lárma ǹdə́ surhə ń gə tú ń ce ǹ jǐrh Esərayɛl pyɔ̌, mùnì ga ń zwẽ Cinu ǹ Yi rí Nyə́ né. ¹³ Ǹ gə zwẽ Cinu nyə́ né ǹdə́ ń cúcú mú ń pɔ Muyiisi ni Esərayɛl yil mú, ń wɛ̀rhɛ́ ǹdə nə̀ gə́ n'ê byili ní, ǹ kɔn gakó m'a zwẽ nyí. Zə wu-jɔ̀, sə́ yə̀ bal! bə̀ ywẽ dùr yé, ǹ wu bə̀k'a gə yé. ¹⁴ Nyǐ, ǹd'â nə̀mɔ̀ɔ̀rɛ́ ga, à tɛnɛ sánə́má mə̀ dùmì rí du cəə́le mɔ̀ɔ̀rh-fwààlɛ̀ rə̀tɔ̀ (3 000 000) ǹdə́ sə̀byǐ mə̀ du cəə́le mɔ̀ɔ̀rh-fwààlɛ̀ shə́-ètɔ̀ (30 000 000). È gə wɔ́ kàmmɔ w ǹdə́ lù w myɛ yilə, bə̀ wàr rə̀ dùmì rí bə̀ la jə̀ə̀le yé, bə̀ rə̀ j'â búl rə̀ pyě. À súlí a tɛnɛ dǎr ǹdə́ nə́kulə ga, sə ǹ gwẽ̌ m'ǎ pyà ń súlí. ¹⁵ Ǹ zhe tùntùnnə bə̀ búl bə̀ já, nə́kul-sə̀lnə ǹdə́ də̀-sə̀lnə, lyì dúdúmə́ dúdúmə́ bə̀ yě tumə dwí gakó cɛ̀nɛ̀. ¹⁶ È gə wɔ́ sánə́má mɔ́ ǹdə́ sə̀byǐ mú ǹdə́ kàmmɔ w e súlí ǹdə́ lù w yilə, bə̀ wàr rɛ bə̀ la jə̀ə̀le yé. Zɛ̃̀ dɛ̃̌ ń ji tum rí kùrə̀, sə Cinu yə̀ nɛ́ ǹdə́ mɔ́!» ¹⁷ Dəvyidi pə nyí Esərayɛl yó-cìnə́ bé ne, bə̀ bə̀ sɛ̃ ń byǐ Saləmɔ nɛ: ¹⁸ «Cinu á Yi rí tɛ̀nɛ́ ǹd'ába nà? Ń yə̀ ába shìrhə́ pɛ, cɛ y gə́ kə́kɛ́lɛ́ ába mɔ́ gakó nyí rí wẽ́ nà? Zhə̀nà ń co tənà y kɛ̀bɛ́ ńmyɛ̌ Cinu ǹdə́ ń dwí rí ŋwɛ̀nɛ́ mɔ́ lyì bí á jɔ̃̀ wa. ¹⁹ Rə̀myɛ́ ce èlǎsɛ̃́, ce-nə jàn nɛ́ á pyà Cinu, á Yi rí ǹd'á wun gakó, ǹd'á cìn námpúm. Zɛ̃̀-na dɛ̃̌ á lù Cinu Yi jì yə́, mùnì ga á vò á kwè Cinu Yi dɔbrɛ kùlkṍ w ǹdə́ wẽ̀ ré tɛ̀bɛ́ bə̀ pɔ Yi ni mú á b'ǎ cĩ́ jì y è lù Cinu Yi yil ré còrhó yil mú wẽ́.»