¹ Dɛ̃ rə̀dù Shətana cìrh Dəvyidi e ce n gə̀ Esərayɛl lyì byǎ bɛ́ mùnì ga e tó rə̀ dɛnnɛ e zhìlì Esərayɛl yò. ² Dəvyidi wə̀l Zhɔwaabɛ ǹdə́ dwí rí yó-cìnə́ bé ne: «Zhəl-nə á vò á gə̀ Esərayɛl lyì byǎ bɛ́, kɔn zhì Bɛɛr-Shəba e m'e yí Dan sə á k'á b'ǎ byili ni mùnì a lwar bə̀ yó wə́.» ³ Zhɔwaabɛ zɛ̃̀ n wɔ̀ mɔ: «Bə̀ Cinu ce ń dwí rí pù twər zɔ̌m! Pyɔ̌ à yó-cə́bal, bə̀myɛ́ byɛ̀bɛ́ gakó də̀ à yó-cə́bal tùntùnnə nà? Byè yil à yó-cə́bal nə́ ń pyà bə̀ yó w lwar? Byè yil ń mà n ce Esərayɛl dó èta?» ⁴ Sə pyɔ̌ mɔ́ nyí rí y'à n'ê nyɛ́ɛ́ Zhɔwaabɛ. Zhɔwaabɛ já n shə́r n du n kwè sɔ́má n vò n ce Esərayɛl tənà y púlə́púlə́ ń yé né, n ká n kwɛ̃̀ n bə̀ Zhərəzalɛm. ⁵ Zhɔwaabɛ kwè dwí rí ń gàl mɔ́ yó w n byili Dəvyidi ni: Esərayɛl tənà y gakó y'à zhe bala mɔ̀rh-fɔ̀lɔ̀ òdù ǹdə́ mɔ̀ɔ̀rhɛ̀ zɔ̌m (1 100 000) bə̀ y'à wɔ̌ búlə́ bə̀ la bú, Zhəda tənà y zɛ̃̀ è y'à zhe bala mɔ̀ɔ̀rhɛ̀ zwã̌-àna ǹdə́ shə́-shàlpyɛ̀ (470 000) bə̀ myɛ y'à wɔ̌ búlə́ bə̀ la bú. ⁶ Zhɔwaabɛ yà ń yə̀ súlí n gə̀ Levyi kwálá y ǹdə́ Bɛ̃zhamɛ kwálá y lyì bí yé, bə̀ pyɔ̌ mɔ́ zɔ̀mɛ̀ rɛ́ y'à zhìlì ń wu ni dɛ̃́dɛ̃́. ⁷ Pyɔ̌ mɔ́ nyí rí rə̀myɛ́ yàl kɔ̀-bəlwɛ̀lɛ́ Yi yírh wə, rə̀myɛ́ ce Yi pə còrhò-tum Esərayɛl nɛ. ⁸ Dəvyidi zɛ̃̀ n wɔ̀ Yi ni: «Kɔn rɛ́ tɛ̀bɛ́ à wɛ̀rhɛ́ mɔ́ wɔ́ yə̀-bəlɔ̀lɔ́ nánfɔ̀lɔ̀. Sə èlǎsɛ̃́, à n'â lwə̀l mó bə̀ ǹ zə ǹ tùntùnnə mó dóó w ń mə́ cɛ̃́ mɔ, cɛ̃ b'à búl a twĩ̀ ǹdə nyə̀nyà ta!» ⁹ Cinu Yi zɔ̀m ǹdə́ Yi nyì-zwennə* Gaadɛ, Dəvyidi cícírnə mó, n wɔ̀: ¹⁰ «Zhəl ń vò ń wɔ̀ Dəvyidi ni: Nyǐ Cinu nyí rí: À n'â cĩ́ zwini kùrə̀ nə̀tɔ̀ ǹ yé né ǹmyɛ́ cìcì mú cír zwini kùr rə̀dù nə̀ wẽ́, à m'a zɛ̃̀ a pyìrh ri ǹ yilə.» ¹¹ Gaadɛ zɛ̃̀ n vò n nə Dəvyidi, n wɔ̀ mɔ: «Nyǐ Cinu nyí rí ń mə́ ń bwə̀rh mó: zwini tɛ̌ yò ǹ shɛ̀nɛ́? ¹² Byinə nə̀tɔ̀ nɔrh ráá cànsɛ̀ sə̀tɔ̀ ǹdə́ ǹ zwə̀ bé n'ê jí bɛlɛ ǹ yó, bə̀ pyě ǹ nə̀-kúlə́ yó ǹdə́ búlə́ shìmì ráá Cinu búlə́ shù w ǹdə́ cím-bəlwɛ̀lɛ́ wɔ tənà y wa, dwã nə̀tɔ̀ ǹdə́ Cinu màlɛ́ka y è n'ê gurhi lyə́m lyə́m mɔ́ wɔ Esərayɛl tənà y púlə́púlə́ wə? Èlǎsɛ̃́ tɛ́rɛ́ ń nyì wɔ́ bə̀kɔ́n à mə̌ s'a lyár lò mó mɔ̀bɔ́ ń twĩ̀ ni mú ni.» ¹³ Dəvyidi zɛ̃̀ n wɔ̀ Gaadɛ nɛ: «Wu-zɛ̃̀ɛ̃́ nánfɔ̀lɔ̀ zhe ne! À gə tu Cinu jɔ̃̀ w cɔ̃̀ à tu numbyínə́ bé jɔ̃̀ wa, bə̀ Cinu nɔ̀nɔ̀-dǔr mú já dɛ̃́dɛ̃́!» ¹⁴ Cinu já n twĩ̀ cím-bəlwɛ̀lɛ́ Esərayɛl tənà y wa, sə è gu nunə mɔ̀ɔ̀rhɛ̀ shə́-shàlpyɛ̀ (70 000). ¹⁵ Yi twĩ̀ màlɛ́ka Zhərəzalɛm nɛ́ mùnì ga e vò e cɔ̀ cɔ w e gùlí dwã nɛ. Sə è gə́ y'à n'ê cɔ̀ w è gùlí dwã nɛ yi ní, Cinu nyǐ, sə ń wu zhìlì lwɛlɛ rɛ́ rə̀myɛ́ mɔ́ yilə. N zɛ̃̀ n wɔ̀ màlɛ́ka y è y'à n'ê cɔ̀ w è gùlí dwã nɛ mɔ́ nɛ: «Kɔn mə̌ èta! Kwɛ̃̀ ǹ jɛ̃̀ y èlǎsɛ̃́!» E jà rə̀myɛ́ yi ní, ǹdə́ màlɛ́ka y'à zhǐ Zhəbuusi lyì bal Orənã tuwə y yala nɛ. ¹⁶ Dəvyidi kwẽ̌ ń la dɛ̃̌ nyǔ, n púrí Cinu màlɛ́ka y è ŋwɛ́nɛ́ cɛ y ǹdə́ dɛ̃̌-yi rí cəcəl wə, ǹd'ê búlə́ shù w ò fwə̌rh ò wɔ è jɔ̃̀ wa, e m'e zǎ Zhərəzalɛm. Dəvyidi ǹdə́ náncɛsɛ́ y'à zù ywə́ə́le gàndɛ, bə̀ j'a tu bə zə bə̀ yə́rh bə pú tɛ̃́. ¹⁷ Dəvyidi wɔ̀ Yi ni: «È də̀ àmyɛ́ à ce bə̀ gə̀ dwí rí nà? Wɔ́ àmyɛ́ à dówə́, a j'a twĩ̀ lwɛlɛ rɛ́. Sə pyììsí shɛ̀bɛ́ myɛ, bə̀kɔ́n sə̀ wɛ̀rhɛ́? Cinu, à Yi, pə còrhò-tum àmyɛ́ ǹdə́ à kɛ̀lɛ́ y lyì bí ne, sə ǹ bə̀k'á ce màbyóó zə ǹ dwí rí yé!» ¹⁸ Cinu màlɛ́ka y wɔ̀ Gaadɛ nɛ bə̀ ń zɔ̌m ǹdə́ Dəvyidi n wɔ̀: «Zhəl ń vò ń lù vwĩ̀-jùlú Zhəbuusi lyì bal Orənã tuwə y w n pə Cinu ni!» ¹⁹ Dəvyidi zhə̀lə̀, ǹdə Cinu nyí rí tɛ̀bɛ́ ń yà ń tó Gaadɛ dɛnnɛ n pɔ̃ mɔ́ gə́ y'à n'ê byili ní. ²⁰ Orənã yà ń nə́ ń mà ń bə̀lɛ́ y rə̀myɛ́ yi ní, ń gə́ pyìrhí ń la ń kwã nɛ́ nyǔ, n já n nə màlɛ́ka yá; ń byǎ bɛ́ bə̀na y bə̀ y'à ŋwɛ́nɛ́ ǹdə́ mɔ mɔ́ dùr bə shèè. ²¹ Dəvyidi zɛ̃̀ n vò ǹ bə̀ Orənã səta. Orənã gə́ nyǐ n púrí wɔ́ pyɔ̌ mɔ́, n zhǐr tuwə y w n bə̀ n tu n zə ń yé y n pú tɛ̃́ ń yé né. ²² Dəvyidi zɛ̃̀ n wɔ̀ Orənã nɛ: «Pɛ̃ ǹ tuwə y jàà yá, à la vwĩ̀-jùlú è wẽ́ lú a pə Cinu Yi ni, mùnì ga màbyóó w ò pú Esərayɛl lyì byǎ bɛ́ mɔ́ twẽ̌ bə̀ nyí ni o vò pyépyé. Yẽ̌ y ń pɛ̃, à m'a pɔ̃́ wɛ́rɛ́ e mɛrhɛ dwã ǹdə è gə́ mə̌ sə e yè né!» ²³ Orənã wɔ̀ Dəvyidi ni: «Zwẽ y ǹ cìcì yilə, sə pyɔ̌ à yó-cə́bal wɛ̀rhɛ́ kɔn rɛ́ tɛ̀bɛ́ ń nə́ ń yàlá. Nyì wé: à n'â pɛ nə̀-byesé, vwĩ̀ námpúm cɛ̃́ɛ̃́ rɛ́ yilə ǹdə́ vwə̃tur rí dǎr rɛ́, dǎr rɛ́ yilə e súlí bə̀lɛ́ y vwĩ̀ rí, pɛnɛ́ y yilə; à n'â pɛ rə̀ gakó!» ²⁴ Sə pyɔ̌ Dəvyidi wə̀l Orənã nɛ: «Ɔ̃́'ɔ̃! à m'a yè y ǹdə è gə́ mə̌ sə e yè né ǹdə́ wɛ́rɛ́. À t'â la ǹmyɛ́ kɔn rɛ́ kǒ a pə Cinu ni, a m'a zwə́l vwĩ̀ námpúm cɛ̃́ɛ̃́ tɛ̀bɛ́ bə̀ yə̀ kaka vùr rə̀ yil mú yé!» ²⁵ Dəvyidi zɛ̃̀ n kwè sánə́má wár-kùlsi zɔ̃̌-nyə̀ldù n pə Orənã nɛ n mə n yè jàà yá. ²⁶ Dəvyidi lù vwĩ̀-jùlú gàà n pə Cinu Yi ni, n zɛ̃̀ n zwə́l vwə̃̀ námpúmə́ cɛ̃́ɛ̃́ ǹdə́ yə̀-zùlə́ vwə̃̀. N byẽ̀ n ce Cinu ni, sə Cinu ce myǐn shí dɛ̃̌-yi w mə só vwə̃̀ námpúmə́ cɛ̃́ɛ̃́ vwĩ̀-jùlú w yó n mə n lyár mɔ. ²⁷ Rə̀myɛ́ kwã nɛ́, Cinu Yi pɔ nyí màlɛ́ka y nɛ b'è ce è búlə́ shù w ò pyá y wa. ²⁸ Rə̀myɛ́ yi ní, Dəvyidi gə́ púrí Cinu zwẽ ń co Zhəbuusi lyì bal Orənã tuwə y mó, ń zwə́l vwə̃̀ gàà n pɔ̃. ²⁹ E jà rə̀myɛ́ yi ni, Cinu Yi kòrhó w Muyiisi yà ń pú mú e súlí vwə̃̀ námpúmə́ cɛ̃́ɛ̃́ vwĩ̀-jùlú w y'à wɔ Gabaɔ̃ vwə̃̀ né zwə́l jàà y wa, ³⁰ Dəvyidi yà ń wàr ń la n vò n bwə̀rh Yi gàà mɔ́ yé, bə̀ Cinu Yi màlɛ́ka y búlə́ shù w ce ywẽ y'à zhe mo.