¹ Rə̀myɛ́ kwã nɛ́, Dəvyidi bú ǹdə́ Shilisəti lyì bí n ŋwɛ̀nɛ́ bɛ, n ce be cìzhìlə̀. N zwẽ Gaatɛ cɔ w ǹd'ô gə́ cǐ má nyí rí bə̀ jɔ̃̀ wa. ² N bú n ŋwɛ̀nɛ́ Mɔwaabɛ myɛ, Mɔwaabɛ lyì bí jǐrh ń yómə́, bə̀ n'ê pɛ mɔ myə̌l-kwǎndɛ. ³ Dəvyidi bú n ŋwɛ̀nɛ́ Sɔba pyɔ̌ Adadəzɛɛrɛ, Amaatɛ səta, Adadəzɛɛrɛ gə́ zhə̀l n zwẽ Efǝraatɛ bù-fwɛ̀lɛ̀ y nyí rí n cìní yi ní. ⁴ Dəvyidi zɛ̃̀ n zwẽ Adadəzɛɛrɛ búlə́ eshərh-vwə̃tura mɔ̀rhɔ̀ (1 000) ǹdə́ eshə-jòmnə mɔ̀ɔ̀rhɛ̀ tàlpyɛ̀ (7 000) e súlí shə̀dɛ́ɛ́sɛ shɛ̀bɛ́ sə̀ n'ê zhə̀l tɛ̃́ búlə́ bú yi ní mɔ̀ɔ̀rhɛ̀ shí-èlyè (20 000). Dəvyidi gõ̀ vwə̃tur rí eshesé nə̀-gwěsé, n zɛ̃̀ n yẽ̌ sə̀myɛ́ zɔ̌m sásá. ⁵ Siri lyì bí bə̀ jě Damaasɛ nɛ́ mɔ́ bə̀ bə sɛ̃ Sɔba pyɔ̌ Adadəzɛɛrɛ nɛ, sə Dəvyidi gu bə̀ nunə mɔ̀ɔ̀rhɛ̀ shí-èlyè ǹdə́ rə̀lyè (22 000). ⁶ Dəvyidi cír yó-cìnə́ n cĩ́ Siri lyì bí tənà è wɔ Damaasɛ nɛ́ mɔ́. Siri lyì bí jǐrh ń yómə́, bə̀ n'ê pɛ mɔ myə̌l-kwǎndɛ. Cinu Yi ce Dəvyidi jí bɛlɛ ń gə́ zhə̀l mə̀gã̌ gakó. ⁷ Dəvyidi zwẽ sánə́má nə̀kwə̀r ré rə̀ y'à wɔ Adadəzɛɛrɛ yìlnə bé sõ mó n mə n bə̀ Zhərəzalɛm. ⁸ N súlí n zwẽ kàmmɔ ò y'à búl ò já dɛ̃́dɛ̃́, Adadəzɛɛrɛ tənà y cɛmɛ nə̀lyè, Təbaatɛ ǹdə́ Kuuni ne. Saləmɔ tú n bə̀ n zə kàmmɔ w òmyɛ́ n mə n zùrhì Zhǎ nánfwɛ̀lɛ̀ y ǹdə́ yə né e súlí è kàmmɔ nə̀zhẽ̌ né. ⁹ Amaatɛ pyɔ̌ Towu tú n bə̀ n nyɛ̀ɛ̀ bə̀ Dəvyidi bú n ŋwɛ̀nɛ́ Sɔba pyɔ̌ Adadəzɛɛrɛ shə̀dɛ́ɛ́sɛ́ gakó. ¹⁰ Rə̀myɛ́ yó, ń twĩ̀ ń byǐ Adɔram Dəvyidi sõ mùnì ga n vò n ce mo sə n súlí n ji ń yə̀-bya ń gə́ bú ǹdə́ Adadəzɛɛrɛ n ŋwɛ̀nɛ́ mɔ mɔ́ yilə, bə̀ Adadəzɛɛrɛ yà ń wɔ́ Towu zù-bal. Adɔram yà ń zɔ wẽ̀ rə̀ zùrhì ǹdə́ sánə́má ǹdə́ sə̀byǐ e súlí kàmmɔ n bə̀ n pə Dəvyidi ne. ¹¹ Pyɔ̌ Dəvyidi pə wẽ̀ ré rə̀myɛ myɛ Cinu Yi ni, e súlí sə̀byǐ mú ǹdə́ sánə́má mɔ́ ń yà ń zwẽ dwə́ né dwã bɛ́ sõ mó, Edɔm lyì bí ǹdə́ Mɔwaabɛ lyì bí ǹdə́ Amɔ̃ byǎ bɛ́ ǹdə́ Shilisəti lyì bí ǹdə́ Amalɛɛkɛ lyì bí sõ mó. ¹² Səruyə byǐ Abyəshəyi ŋwɛ̀nɛ́ Edɔm lyì bí nunə mɔ̀ɔ̀rhɛ̀ shí ǹdə́ lyɛlɛ (18 000) Nə̀kwə̃̌ y jə́ y wə. ¹³ N zɛ̃̀ n cír lyì n cĩ́ Edɔm tənà y yé né. Edɔm lyì bí gakó jǐrh Dəvyidi yómə́. Cinu Yi yà ń nə́ ń ce Dəvyidi jí bɛlɛ ń zwə̀ bé gakó yó wə, ń gə́ nə́ ń zhə̀l mə̀gã̌ gakó. ¹⁴ Dəvyidi jú pyɛ̀lɛ̀ Esərayɛl púlə́púlə́ yó wə. Ń yà ń nə́ ń zal ń lyì bí gakó zhə̀n ǹdə́ cángá tũ̀twĩ̀ĩ̀ rí gə́ y'à n'ê yǎl nɛ́. ¹⁵ Səruyə byǐ Zhɔwaabɛ yà ń wɔ́ shə̀dɛ́ɛ́sɛ́ yó-cə́bal; Ayəluudi byǐ Yɔshafaatɛ yà ń wɔ́ pyɔ̌ mɔ́ nyí-zwennə; ¹⁶ Ayətuubi byǐ Sadɔɔkɛ ǹdə́ Abyataarɛ byǐ Abyəməlɛɛkɛ y'à wɔ́ vwĩ̀-zwə́lnə; Shavəsha yà ń wɔ́ sá-kanna; ¹⁷ Yɔyada byǐ Bənaya yà ń wɔ́ Kərɛɛtɛ lyì bí ǹdə́ Pəlɛɛtɛ lyì bí yó-cə́bal; sə Dəvyidi byǎ bɛ́ y'à wɔ́ lyì-yə́ə́ bé ń yala nɛ.