¹ Rə̀myɛ́ kwã nɛ́, Amɔ̃ byǎ bɛ́ pyɔ̌ Naashɛ tú n bə̀ n cì, ń byǐ mú zɛ̃̀ n jǐrh pyɔ̌ ń jàà wa. ² Rə̀myɛ́ yó, Dəvyidi zɛ̃̀ n wɔ̀: «À m'a zə Naashɛ byǐ Anuuni ǹdə́ wu-bɔ̀nɔ̀ bə̀ ń da zɔ nɛ ǹdə́ wu-bɔ̀nɔ̀.» Dəvyidi twĩ̀ lyì ń sõ mùnì bə zə ń wu ni ń da mɔ́ cu mú shò kwã nɛ́. Sə Dəvyidi tùntùnnə bé ń twĩ̀ mú gə́ yú Amɔ̃ byǎ bɛ́ tənà y wa, Anuuni sõ bə̀ la ń wu ni zal yi ní, ³ Amɔ̃ byǎ bɛ́ yó-cìnə́ bé wə̀l Anuuni ni: «Ǹ nə́ ǹ bùl bə̀ Dəvyidi wɔ́ ǹ da mɔ́ nyɔ̀mɔ̀ è ce n twĩ̀ lyì ǹ sõ bə̀ la b'e shíshéré ǹ wu ni? È də̀ cɔ w bə̀ la zə surhə bə byɛ́lɛ́ mùnì ga bə lwar ò yé shò sə bə b'e m'e zõ w yilə?» ⁴ Anuuni já n zɛ̃̀ n zə Dəvyidi tùntùnnə bé, n fɔ̃̀ bə̀ tama nɛ́, n súlí n gõ̀ bə̀ kàmə̀zwǐsí tɛ̃́ mɔ́ bə m'e yí bə̀ nə̀kùr-byǎ bɛ́ nɛ, n zɛ̃̀ n kwɛ̃̀ bɛ. ⁵ Lyì zhə̀l bə vò bə cĩ́ Dəvyidi ne kɔn rɛ́ tɛ̀bɛ́ bə̀ wɛ̀rhɛ́ ń lyì bí ni mú. Dəvyidi zɛ̃̀ n twĩ̀ lò n vò n jəl be, bə̀ cìzhìl y'à n'ê yǎl rə gu bi. Dəvyidi ce bə wɔ̀ bɛ: «Mɛ̃-na Zheriko né kɔn m'e yí á tama nɛ́ k'a lyĩ. Rə̀myɛ́ kwã, á m'ǎ zɛ̃̀ á kwɛ̃̀ á bà.» ⁶ Amɔ̃ byǎ bɛ́ púrí bə̀ tó kɔn rɛ́ tɛ̀bɛ́ bə̀ wɛ̀rhɛ́ mɔ́ dɛnnɛ bə pyà zùùri ǹdə́ Dəvyidi bə pə bə̀ cìn ni. Rə̀myɛ́ ce, Anuuni ǹdə́ Amɔ̃ byǎ bɛ́ twĩ̀ bə vò bə yè búlə́ eshərh-vwə̃tur ǹdə́ eshə-jòmnə wár-kùlsì cəə́le mɔ̀ɔ̀rhɛ shə́-ètɔ̀ Siri lyì bí bə̀ ŋwɛ́nɛ́ Məzopotəmyi ǹdə́ Maaka nɛ́ mɔ́ e súlí Sɔba nɛ́ mɔ́ sõ. ⁷ Bə yè búlə́ eshərh-vwə̃tur mɔ̀ɔ̀rhɛ̀ shə́-ètɔ̀ ǹdə́ rə̀lyè, bə súlí bə kɔ̃̀ Maaka cɔ w pyɔ̌ mɔ́ ǹdə́ ń shə̀dɛ́ɛ́sɛ́, bə bə̀ bə zul Mɛdəba yé y wə. Amɔ̃ byǎ bɛ́ shí bə̀ cɛmɛ nɛ́ wẽ́ bə du bə bə̀ dwã yó, bə zɛ̃̀ bə bə̀ búlə́ né jàà wa. ⁸ Dəvyidi lwar rɛ, n zɛ̃̀ n twĩ̀ Zhɔwaabɛ ǹdə́ shə̀dɛ́ɛ́sɛ́ sə̀ y'à wɔ́ kàndar mɔ́ gakó gàà. ⁹ Amɔ̃ byǎ bɛ́ du bə tɛnɛ bə zhì bə̀ cɔ w bwə̀rə̀ y nyí ni, búlə́ né yilə. Pyǎ bɛ́ byɛ̀bɛ́ bə̀ y'à tú bə̀ la bə sãɔ̃ mɔ́ y'à zhǐ jàà dõ w gɔ sõ. ¹⁰ Zhɔwaabɛ púrí ń mə̌ sə n bú ǹdə́ shə̀dɛ́ɛ́sɛ sə̀ y'à wɔ ń yé né ǹdə́ ń kwã nɛ́ ga mɔ́; n cír lyì Esərayɛl shə̀dɛ́ɛ́sɛ́ shɛ̀bɛ́ sə̀ y'à yě kɔn du sə̀ dwã bɛ́ mɔ́ gakó cəcəl wə, n ce sə zhì Siri lyì bí yé y wə. ¹¹ N zɛ̃̀ n ce ń da-byǐ Abyəshəyi nə́ ń nyǐ shə̀dɛ́ɛ́sɛ́ kùr ré yò, Abyəshəyi zɛ̃̀ n ce sə tɛnɛ sə zhì Amɔ̃ byǎ bɛ́ yé y wə. ¹² Zhɔwaabɛ zɛ̃̀ n wɔ̀: «Siri lyì bí jàn rɛ́ gə n'ê dwini ni, ǹ m'ǎ bə̀ ń sɛ̃ nɛ, sə Amɔ̃ byǎ bɛ́ jàn rɛ́ gə n'ê dwini mú, à m'a b'a sɛ̃ mɔ́. ¹³ Yál bal, sə nə́ bú ǹdə́ wu-jɔ̀ nə́ dwí rí ǹdə́ nə́ Yi rí cɛmɛ nɛ́ yilə. Sə Cinu Yi wɛ̀rhɛ́ kɔn rɛ́ tɛ̀bɛ́ rə̀ wɔ́ ń pùbùlə̀.» ¹⁴ Rə̀myɛ́ yó, Zhɔwaabɛ ǹdə́ ń shə̀dɛ́ɛ́sɛ́ zɛ̃̀ bə twẽ̌ bə yí bə̀ la bú ǹdə́ Siri lyì bí. Sə Siri lyì bí dùr ń yé né. ¹⁵ Amɔ̃ byǎ bɛ́ gə́ púrí Siri lyì bí n'ê dùr mùnì bə lú mú, bə̀myɛ zɛ̃̀ bə̀ n'ê dùr mùnì bə lú Zhɔwaabɛ da-byǐ Abyəshəyi yé né, bə j'a zù cɔ w wa. Zhɔwaabɛ ká n kwɛ̃̀ n bə̀ Zhərəzalɛm. ¹⁶ Siri lyì bí púrí Esərayɛl lyì bí ŋwɛ̀nɛ́ bɛ. Bə twĩ̀ lyì bə vò bə byẽ̀ Siri lyì bí bə̀ wɔ Efəraatɛ bù-fwɛ̀lɛ̀ y èpákɛ̀ mɔ́ bə bà. Adadəzɛɛrɛ shə̀dɛ́ɛ́sɛ́ yó-cə́bal Shɔfaakɛ yà ń wɔ bə̀ yé né. ¹⁷ Bə b'e cĩ́ ri Dəvyidi ni. N byẽ̀ Esərayɛl shə̀dɛ́ɛ́sɛ́ gakó n cĩ́ dwã yó, n byɛrhɛ Zhɔrdɛ̃ bwǐ yə́, n vò n bə̀ n yí bə̀ səta, n zɛ̃̀ n tɛnɛ n zhì ń la bú ǹdə́ bɛ. Dəvyidi tɛnɛ n zhì Siri lyì bí yé y wə, ń la mə n bú ǹdə́ bɛ. Sə Siri lyì bí tó yé bə zɛ̃̀ búlə́ né ne. ¹⁸ Siri lyì bí dùr Esərayɛl shə̀dɛ́ɛ́sɛ́ yé né. Dəvyidi gu bə̀ búlə́ eshərh-vwə̃tur rí jòmnə̀ bé nunə mɔ̀ɔ̀rhɛ̀ tàlpyɛ̀ (7 000) ǹdə́ shə̀dɛ́ɛ́sɛ́ shɛ̀bɛ́ sə̀ n'ê zhə̀l tɛ̃́ búlə́ bú yi ní mú nunə mɔ̀ɔ̀rhɛ̀ shə́-èna (40 000). N súlí n gu Siri shə̀dɛ́ɛ́sɛ́ yó-cə́bal Shɔfaakɛ. ¹⁹ Pyǎ bɛ́ byɛ̀bɛ́ Adadəzɛɛrɛ yà ń cǐ mú gə́ púrí Esərayɛl shə̀dɛ́ɛ́sɛ́ ŋwɛ̀nɛ́ bɛ, bə̀ co dwã yó ǹdə́ Dəvyidi, bə jǐrh ń yómə́ bə̀ n'ê twĩ̀ bə̀ pɛ mɔ. Siri lyì bí k'ê yə̀ shɛ̀nɛ́ bə b'e sɛ̃ Amɔ̃ byǎ bɛ́ nɛ yé.