¹ Dəvyidi gə́ tú n bə̀ ń jě ń pyɔ̌-kɛ̀lɛ́ y w yi ní, dɛ̃ rə̀dù ń wə̀l Yi nyì-zwennə* Natã nɛ: «Nyǐ àmyɛ́ ŋwɛ́nɛ́ sɛ́ɛ́dərɛbá dǎr jì wẽ́, e jà Cinu Yi dɔbrɛ kùlkṍ* w wɔ gã̀-jɛ̀rh kòrhó* kùr wə.» ² Natã zɛ̃̀ n wɔ̀ Dəvyidi ni: «Wɛ̀rhɛ́ kɔn rɛ́ tɛ̀bɛ́ gakó ǹ nə́ ǹ yǎl ń wɛ̀rhɛ́ mɔ́, bə̀ Yi ŋwɛ́nɛ́ ǹdə́ mɔ́.» ³ Sə dɛ̃ rɛ́ rə̀myɛ́ cìcì cəcɛ̃ yá, Cinu zɔ̀m ǹdə́ Natã n wɔ̀: ⁴ «Zhəl ń vò ń wɔ̀ à tùntùnnə Dəvyidi ni: Nyǐ Cinu nyí rí: È də̀ ǹmyɛ́ ǹ m'ǎ lù jì ń pɛ̃ a jòm è wẽ́ yé. ⁵ Kɔn zhì dɛ̃ rɛ́ tɛ̀bɛ́ à ce Esərayɛl lyì byǎ bɛ́ shə́r Ezhibti ní mú e m'e yí zà dɛ̃ rɛ́, à yə̀ jì wẽ́ jòm gaga yé, à y'à n'â zhì jàà w à zhə̀l è dõ w sə wɔ́ kòrhó w à y'à ŋwɛ́nɛ́ nɛ́. ⁶ À gə́ zhə̀l mə̀gã̌ gakó, Esərayɛl lyì byǎ bɛ́ cəcəl w mó, à nə bwə̀rh Esərayɛl bù-kárna bɛ́ byɛ̀bɛ́ à pɔ bɛ nyí bə̀ bə̀ kál à dwí rí mú mə̀dù ga myɛ a wɔ̀: ‹Byè yil á yə̀ sɛ́ɛ́dərɛbá dǎr jì lwì á pɛ̃?› ⁷ Rə̀myɛ́ ce, ǹ m'ǎ zɔ̀m ǹdə́ à tùntùnnə Dəvyidi ń wɔ̀: Nyǐ lũ gakó Cinu mú nyí rí: Wɔ́ àmyɛ́ à kɔl mɔ́ vwàmá nɛ́ kwã nɛ́ mùnì ga ń jǐrh à dwí Esərayɛl lyì byǎ bɛ́ yó-cə́bal. ⁸ À yàl nɛ́ ǹdə́ mɔ́ ǹ gə́ zhə̀l mə̀gã̌ mɔ́ gakó, a gu ǹ zwə̀ bé gakó ǹ yé né, sə à m'a ce ǹ yil ré du ǹdə lũ w lyì-fwààlɛ́ yilə né gə́ du ní. ⁹ À m'a pyà jàà èdù a pə à dwí Esərayɛl nɛ, a zɛ̃̀ a ce rə̀ j'â jě gàà. Ywẽ k'ê t'â la rɛ zal yé, sə lyì-gurnə myɛ k'ê t'â la rɛ nɔ̀nɔ̀ ǹdə shãã ga, ¹⁰ à gə́ y'à ce bù-kárnabá cìní à dwí Esərayɛl mɔ́ yi ní ga mɔ́ ta yé. À ŋwɛ̀nɛ́ ǹ zwə̀ bé gakó, a zɛ̃̀ a byili mú bə̀ à m'a lù jì a pɔ̃́. ¹¹ Ǹ gə tú ǹ cɛ ǹ bwə́l cú yi ní, à m'a zhẽ̌ ǹ dwí rí yó dɛ̃̌, à m'a cír ǹ cìcì byǎ bɛ́ byɛ̀bɛ́ ǹ lùl mú mə̀dù n yə̀ pyɔ̌ ǹ jàà wa. Sə à m'a ce ń pyɛ̀lɛ̀ rɛ́ cĩ́ kùr zhə̀n zhə̀nà. ¹² Wɔ́ ńmyɛ̌ ń mà n lù jì n pɛ̃, sə à m'a ce ń pyɛ̀lɛ̀ rɛ́ cĩ́ kùr gaga yilə. ¹³ À m'a yə̀ da ń yilə, sə ńmyɛ mà n yə̀ byǐ à yilə; à wu-bɔ̀nɔ̀ w t'â la kwǎrh ń yil ǹdə à gə́ kwàrh w mɔ̀bɔ́ ń yàl ǹ yé né n yə̀ pyɔ̌ mɔ́ ta yil yé. ¹⁴ À m'a ce ń já ń ŋwɛ́nɛ́ nɛ́ gaga à jì y ǹdə́ à tənà y wẽ́, à m'a ce ń pyɛ̀lɛ̀ rɛ́ cĩ́ kùr gaga yilə.» ¹⁵ Natã cĩ́ Dəvyidi ni zɔ̀mà nɛ́ nə̀myɛ́ mɔ́ gakó ǹdə́ kɔn rɛ́ tɛ̀bɛ́ gakó Cinu co pwẽ̀ ne n byili mu mú. ¹⁶ Rə̀myɛ́ yó pyɔ̌ Dəvyidi zɛ̃̀ n bə̀ n jòm Cinu Yi yé né, n wɔ̀: «Àmyɛ́ wɔ́ mɔ̌, Cinu Yi? À dwí rí wɔ yẽ̀, ń mə́ kwè ne ń cĩ́ jàà y kɛ̀bɛ́ à zhǐ è wẽ́ zà mɔ́? ¹⁷ E jà rə̀myɛ́ y'à gwẽ̌ wɔ́ námpɔ́lɛ́ ǹ yírh wə, à Yi, ń zɛ̃̀ ń dámǎ ǹ nə́ ǹ bwəl nyí ǹ tùntùnnə mó dwí rí shò kwã nɛ́ ǹdə́ kɔn gwẽ̌ nyɛ. Ǹ nyǐ ni ǹdə lyì-fɔ̀lɔ̀ ta, Cinu Yi. ¹⁸ Bə̀kɔ́n Dəvyidi wɔ̌ ń mà n kə́ n wɔ̀ mɔ́ kə́dò, zùwə́ y kɛ̀bɛ́ ǹ nə́ ǹ pɛ ǹ tùntùnnə mó ne mɔ́ shò kwã nɛ́? Ǹmyɛ́ yě ǹ tùntùnnə mó párá. ¹⁹ Cinu, wɔ́ ǹ tùntùnnə mó yilə, ǹdə́ ǹ wu-bɔ̀nɔ̀ w ò ce ń twĩ̀ tũ̀-fɔ̀lɔ̀ w kɔ̀bɔ́ ǹ la mə́ byili ǹ zùwə́ y nánfɔ̀lɔ̀ w gə́ wɔ́ nɛ́. ²⁰ Cinu Yi, ǹ bə nyɛrh-dõ zhe yé, è gə wɔ́ kɔn rɛ́ tɛ̀bɛ́ gakó nə́ zhã̌ nyɛ̀ɛ̀ bə̀ n'ê zɔ̀m mɔ́, Yi dõ tɛ̀nɛ́ yé, è gə də̀ ǹmyɛ́ dúdú sásá. ²¹ Dwí rə̀dù myɛ cìcì wɔ lũ w yó rə̀ nyɛ̌ ǹdə Esərayɛl, ǹ dwí rí ta zhə̀nà? Dwí rí tɛ̀bɛ́ ǹ zhə̀l ń vò ń vwǎrh Ezhibti ní mùnì ga ń ce rə yə̀ ǹmyɛ́ dwí ń zɛ̃̀ ń jì dwə́ dwã rə̀ yé né ń mə́ ń ce ǹ yil ré du, ǹ yil ré ywẽ súlí rə̀ zhe lyì bí mú? ²² Ǹ cír ǹ dwí Esərayɛl ń pə ǹ cìn ni mùnì ga rə yə̀ ǹ dwí gaga yilə, sə wɔ́ ǹmyɛ́, Cinu Yi, ǹ jǐrh rə̀ Yi. ²³ Rə̀myɛ́ ce èlǎsɛ̃́ Cinu, ce ǹ nyí rí tɛ̀bɛ́ ǹ bwəl ǹ tùntùnnə mó ǹdə́ ń dwí rí shò kwã nɛ́ mɔ́ pyìrh. Wɛ̀rhɛ́ ǹdə ǹ gə́ wə̀l né! ²⁴ Ce rə pyìrh zhə̀n ga, sə ǹ yil ré nə còrhó gaga yilə, bə̀ m'a zɛ̃̀ bə wɔ̀: lũ gakó Cinu mú, Esərayɛl Yi rí, wɔ́ Yi Esərayɛl yilə; sə ǹ tùntùnnə Dəvyidi kɛ̀lɛ́ y cĩ́ kùr, e zhì kẽkẽ, ǹ yé né! ²⁵ Zhə̀n ga, wɔ́ ǹmyɛ́ cìcì, à Yi, ǹ pár ń byili ǹ tùntùnnə mó ne bə̀ ǹ m'ǎ lù kɛ̀lɛ́ ń pɔ̃. Wɔ́ rə̀myɛ́ rə̀ pɔ wu-jɔ̀ ǹ tùntùnnə mó ne ń mə́ ń lwə̀l mó lwə̀lə́ y kɛ̀bɛ́. ²⁶ Èlǎsɛ̃́, Cinu Yi, wɔ́ ǹmyɛ́ ǹ wɔ́ Yi, e jà ń zɛ̃̀ ǹ nə́ ǹ cĩ́ wu-nyɔ̃̀ nyí rí tɛ̀bɛ́ ǹ tùntùnnə mó ne. ²⁷ Shɛ̀nɛ́ ń cĩ́ bwəl ǹ tùntùnnə mó kɛ̀lɛ́ yó èlǎsɛ̃́ mùnì ga e yə̀ ǹ yé né gaga yilə, b'è gə wɔ́ ǹmyɛ́ Cinu Yi ǹ nə́ ǹ cĩ́ bwəl rə̀ yó, rə̀ m'a j'a nə bwəl gaga yilə!»