koussoube-marc-lee_1ch_text

Kǝ̀kàl-fwɛ̀lɛ̀ 11

¹ Esərayɛl lyì byǎ bɛ́ gakó tú bə nə dwã Dəvyidi sõ, Ebərɔ̃ nɛ́, bə̀ y'à n'ê wə̀lə̀: «Nyǐ, nə́myɛ̌ ǹdə́ ǹmyɛ́ ga wɔ́ jal mə̀dù. ² Shãã ga, ǹdə́ Səyuuli yà ń wɔ́ pyɔ̌ yi ní ga, wɔ́ ǹmyɛ́ ǹ yà ǹ nə́ ǹ zal Esərayɛl lyì byǎ bɛ́ ǹ mə́ ǹ shə́r ǹ zhə̀l búlə́ jàà wa, ǹ ká ǹ zə bɛ ǹ kwɛ̃̀ ǹ twí jè. Sə Cinu ǹ Yi rí wə̀l mó: ‹Wɔ́ ǹmyɛ́ ǹ m'ǎ yə̀ à dwí, Esərayɛl lyì byǎ bɛ́ nə̀nɔ̀n mɔ́, wɔ́ ǹmyɛ́ ǹ m'ǎ súlí ń yə̀ rə̀ yó-cə́bal mɔ́.› » ³ Esərayɛl náncɛsɛ́ myɛ gakó zɛ̃̀ sə bə̀ sə nə Dəvyidi Ebərɔ̃ nɛ́, sə Dəvyidi bwəl se nyí Cinu yé né Ebərɔ̃ nɛ́, kɔn rɛ́ tɛ̀bɛ́ sə̀ n'ê yǎl mɔ́ shò kwã nɛ́. Sə zɛ̃̀ sə tútǔ mu ǹdə́ pyɛ̀lɛ̀ nwə̃̌ n jǐrh Esərayɛl lyì byǎ bɛ́ pyɔ̌, ǹdə Cinu gə́ yà ń tó Saməwəə dɛnnɛ ń byili ní mú. ⁴ Rə̀myɛ́ yó, Dəvyidi ǹdə́ Esərayɛl lyì byǎ bɛ́ púlə́púlə́ zhə̀l bə̀ la Zhərəzalɛm cɔ w pú, è n'ê yàl e wɔ̀ Zhəbuusi, sə wɔ́ Zhəbuzhitəbá bə̀ y'à jě tənà y èmyɛ́ mɔ́ wẽ́. ⁵ Zhəbuzhitəbá wɔ̀ Dəvyidi ni: «Ǹ tá ǹ la nyɔ̀nɔ̀ zú yé.» Sə Dəvyidi bú n zwẽ Səyɔ̃ cɔ w bə̀ y'à lù bə kə́kɛ́lɛ́ mɔ́. Bə̀ co ò yil rə̀myɛ́ mɔ́ kwã nɛ́ bə̀ Dəvyidi Pyə̀-cɔ. ⁶ Dəvyidi gaga mɔ́ yà ń wə̀lə̀: «Lò mɔ̀bɔ́ ń nə́ ń yàl nã́yə́ə́ mó ń gwi Zhəbuzhitəbá mə̀dù, mà n yə̀ shə̀dɛ́ɛ́sɛ́ gakó yó-cə́bal.» Səruyə byǐ Zhɔwaabɛ yàl nã́yə́ə́ mó n ji búlə́ né kùrə̀, n já n jǐrh shə̀dɛ́ɛ́sɛ́ gakó yó-cə́bal. ⁷ Dəvyidi tú n bə̀ n jòm jàà y kɛ̀bɛ́ bə̀ y'à lù bə kə́kɛ́lɛ́ mɔ́ wẽ́; wɔ́ rə̀myɛ́ e ce bə̀ co ò yil bə̀ Dəvyidi Pyə̀-cɔ. ⁸ Rə̀myɛ́ kwã nɛ́ ń lù cɔ w n mə n kə́kɛ́lɛ́, kɔn zhì Myəlo e m'e yí jààsɛ́ ò yala nɛ mɔ́. Sə wɔ́ Zhɔwaabɛ ń kwɛrhɛ n lù cɔ w nyí rí rə̀ y'à dàl mɔ́ n cĩ́ dɛ̃̌. ⁹ Dəvyidi jàn rɛ́ y'à j'â n'ê súlí, sə Cinu Yi, jàn-bə-swɛ̃́-zhe cə́bal mɔ́, yà ń ŋwɛ́nɛ́ ǹdə́ mɔ. ¹⁰ Nyǐ Dəvyidi kàndar rɛ́ yó-cìnə́ bé bə̀ mù dwã nɛ ǹdə́ Esərayɛl lyì byǎ bɛ́ púlə́púlə́ bə kwɛ̃́ mɔ zhə̀n zhə̀n ń pyɛ̀lɛ̀ rɛ́ jú yi ní mú, mùnì ga n jí pyɛ̀lɛ̀ rɛ́ kɔn tó Cinu Yi zɔ̀mɛ̀ rɛ́ ń yà ń zɔ̀m Esərayɛl shò kwã nɛ́ mɔ́ nɛ. ¹¹ Nyǐ Dəvyidi kàndar rɛ́ yilə né: Akəmoni byǐ Yəshəbɔshɛɛtɛ, kàndar rɛ́ rə̀tɔ̀ y yó-cə́bal mɔ́; wɔ́ ńmyɛ̌ ń zə ń swé ré n mə n gu nunə zwã̌-ètɔ̀ púlə́púlə́ twər rə̀dù. ¹² Ńmyɛ̌ kwã nɛ́, wɔ́ Awəwa lyì bal Dodo byǐ Eləyazaarɛ, ń yà ń wɔ́ kàndar rɛ́ rə̀tɔ̀ w lò mə̀dù. ¹³ Wɔ́ ńmyɛ̌ ń yà ń ŋwɛ́nɛ́ ǹdə́ Dəvyidi Pasɛ-Də̃myim ní, Shilisəti lyì bí gə́ y'à tú dwã yó gàà yi ní búlə́ né bú yil mú; Esərayɛl lyì shə̀dɛ́ɛ́sɛ́ y'à zɛ̃̀ sə̀ n'ê dùr Shilisəti lyì bí yé né sə̀ la m'e lú. E jà Orəzhɛ kɛ́lɛ́ y'a wɔ gàà; ¹⁴ Eləyazaarɛ ǹdə́ ń lyì bí zhə̀l bə vò bə zhì kɛ́lɛ́ y cəcəl wə, bə bú bə zwẽ y bə súlí bə gu Shilisəti lyì bí; Cinu Yi ce Esərayɛl lyì byǎ bɛ́ j'a búl bə jí bɛlɛ. ¹⁵ Dɛ̃ rə̀dù, yó-cìnə́ bé shə́-ètɔ̀ y nunə bə̀tɔ̀ zhə̀l bə̀ nə Dəvyidi nə́kulu w nyí ni, Adəlam myèlé ré yala nɛ. Shilisəti lyì bí shə̀dɛ́ɛ́sɛ y'à cĩ́ sə̀ zulə́ jàà èdù Erəfəyitəbá vɔlɔ w wẽ́. ¹⁶ Rə̀myɛ́ yó, Dəvyidi yà ń wɔ ń shòò jàà y wa, ǹdə́ Shilisəti lyì bí shə̀dɛ́ɛ́sɛ́ kùkùl y'à ŋwɛ́nɛ́ Bɛtələyɛm nɛ́. ¹⁷ Nə̀nyɛ̀lsɛ̀ zɔ Dəvyidi n zɛ̃̀ n wɔ̀: «Mɔ̌ ń mà n pɛ̃ gɔ́rɔ́ w kɔ̀bɔ́ ò wɔ Bɛtələyɛm cɔ w bwə̀rə̀ y nyí ni mú nɛ̃̌ mɔ́ à la nyɔ̀?» ¹⁸ Kàndar rɛ́ rə̀tɔ̀ w j'a jàr jàr rə vò rə zù Shəlisəti lyì bí zulə́ jàà y wẽ́, rə tɛ̃́ nɛ̃̌ mɔ́ nɛ̃̌ gɔ́rɔ́ w kɔ̀bɔ́ ò wɔ Bɛtələyɛm cɔ w bwə̀rə̀ y nyí ní mú wə, rə bə̀ rə pə Dəvyidi ni. Sə Dəvyidi cẽ mə̀ nyɔ́ yò; n kwè mo n ló tɛ̃́ n pə Cinu Yi ni. ¹⁹ N zɛ̃̀ n wɔ̀: «À Yi rí bə̀k'a shɛ̀nɛ́ a wɛ̀rhɛ́ tɛ̀bɛ́ yé! À gə nyɔ̀ nɛ̃̌ mɔ́ è m'a yə̀ ǹdə à gə nyɔ̀ bə̀ jal ta, bə̀ bə̀ zhɔ̃̀ bə̀ myə̀lə́ né bə vò bə m'e zə mɔ bə b'e pɛ̃.» N cẽ ń yə̀ mɔ nywɛ̀ yé. Wɔ́ kɔn rɛ́ tɛ̀bɛ́ kàndar rɛ́ rə̀tɔ̀ w wɛ̀rhɛ́ mɔ́. ²⁰ Zhɔwaabɛ da-byǐ Abyəshəyi, yà ń wɔ́ nunə shə́-ètɔ̀ w yó-cə́bal. Wɔ́ ńmyɛ̌, ń zə ń swé ré n mə n gu nunə zwã̌-ètɔ̀. Sə ń yil ré yə̀ dwi kàndar rɛ́ Rə̀tɔ̀ w cəcəl w yé. ²¹ Ń yil du rə dwini nunə shə́-ètɔ̀ wá, n jǐrh bə̀ yó-cə́bal, sə ń yà ń yə̀ nunə Bə̀tɔ̀ w kùr ni yí yé. ²² Yɔyada byǐ Bənaya, Kabəsəyɛl lyì bal mɔ́, ń yà ń wɔ́ kàndɔ mɔ́ byǐ, twĩ̀ tũ̀-fwààlɛ nánzhəzhɔ̌. Wɔ́ ńmyɛ̌ n gu Mɔwaabɛ kàndar rɛ́ rə̀lyè yə́; wɔ́ ńmyɛ̌ ń zù n gu bɔrɔ w nɛ̃̌ gɔ́rɔ́ w bə̀ kù nɛ̃̌ cə̌r yil mú wẽ́, dɛ̃ rɛ́ tɛ̀bɛ́ wàr rɛ́ nyɔ̀ ǹdə dwà ta mɔ́ yù wə; ²³ wɔ́ ńmyɛ̌ myɛ ń gu Ezhibti lyì bal mɔ̀bɔ́ ń dwɛ̀lɛ̀ rɛ́ y'à wɔ́ jə̀-tórhó yírhə́ nə̀nu mú; Ezhibti lyì bal mɔ́ yà ń zhe swé ń jɔ̃̀ w rə̀ dɔ̌ w y'à kwər ǹdə sɔ́rá y dɔ̌ ta. Bənaya zhə̀l n vò n jəl mo ǹdə́ də̀-dɔ̀lɔ̀, n zə swé ré Ezhibti lyì bal mɔ́ jɔ̃̀ w n vwǎrh n zɛ̃̀ n yə́yɛ́lɛ́ n zə rə̀ cìcì mú n mə n gu mu. ²⁴ Wɔ́ tũ̀-fwààlɛ́ tɛ̀bɛ́ Yɔyada byǐ Bənaya twĩ̀ mú èta; rə̀ ce ń yil du kàndar rɛ́ shə́-ètɔ̀ w cəcəl wə; ²⁵ Ń nɔ zùwə́ dwini nunə shə́-ètɔ̀ wá, sə ń yə̀ nunə bə̀tɔ̀ w kùr ni yí yé. Dəvyidi cír mu n ce lyì bí byɛ̀bɛ́ bə̀ n'ê yìlì mu mú kùkùl ré wẽ́. ²⁶ Lyì bí byɛ̀bɛ́ bə̀ y'à wɔ́ kàndar shə̀dɛ́ɛ́sɛ́ wẽ́ mó y'à wɔ́: Zhɔwaabɛ da-byǐ Asayəə ǹdə́ Bɛtələyɛm lyì bal Dodo byǐ Elanã ²⁷ ǹdə́ Arɔɔrɛ lyì bal Shamɔɔtɛ ǹdə́ Palɔ̃ lyì bal Elɛɛsɛ ²⁸ ǹdə́ Təkɔwa lyì bal Yəkɛɛshɛ byǐ Yəra ǹdə́ Anatɔɔtɛ lyì bal Abyəzɛɛrɛ ²⁹ ǹdə́ Ushə lyì bal Səbəkəyi ǹdə́ Awəwa lyì bal Yələyi ³⁰ ǹdə́ Nətɔfa lyì bal Mərəyi ǹdə́ Nətɔfa lyì bal Baana byǐ Elɛɛdɛ ³¹ ǹdə́ Jəbəya lyì bal Erəbəyi, Bɛ̃zhamɛ tənà y w mɔ́, byǐ Yətəyi ǹdə́ Pyəratɔ̃ lyì bal Bənaya, ³² ǹdə́ Gaashɛ nə̀-gwààlɛ́ yó lò Urəyi ǹdə́ Bɛtɛ-Araba lyì bal Abyɛl, ³³ ǹdə́ Bəwurim lyì bal Azəmavɛɛtɛ; ǹdə́ Shaaləbɔ̃ lyì bal Elyaba, ³⁴ ǹdə́ Jəzɔ̃ lyì bal Ashɛm byǎ bɛ́ ǹdə́ Araarɛ lyì bal Shaagɛ byǐ Yɔnatã ³⁵ ǹdə́ Araarɛ lyì bal Sakaarɛ byǐ Ayəyam ǹdə́ Uri byǐ Elyəfwal, ³⁶ ǹdə́ Məkəra lyì bal Efɛɛrɛ ǹdə́ Palɔ̃ lyì bal Ayəya ³⁷ ǹdə́ Karəmɛl lyì bal Esəro ǹdə́ Ezəbəyi byǐ Nəərəyi ³⁸ ǹdə́ Natã da-byǐ Zuwəə, ǹdə́ Agəri byǐ Myəbaarɛ ³⁹ ǹdə́ Amɔ̃ lyì bal Səlɛɛkɛ ǹdə́ Bɛɛrɔɔtɛ lyì bal Nərəyi, Səruyə byǐ Zhɔwaabɛ búlə́ wẽ̀ ré zhinnə mó, ⁴⁰ ǹdə́ Yətɛɛrɛ dwí rí lò Yəra ǹdə́ Yətɛɛrɛ dwí rí lò Garɛɛbɛ ⁴¹ ǹdə́ Uri Yititi mú ǹdə́ Aləyi byǐ Zabaadɛ ⁴² ǹdə́ Shəza byǐ Adəna, Orɔbɛn kwálá y pyǎ bɛ́ mə̀dù, shə̀dɛ́ɛ́sɛ shə́-ètɔ̀ sə̀ y'à ŋwɛ́nɛ́ ń kwã nɛ́; ⁴³ ǹdə́ Maaka byǐ Anã, Mətɛ̃ lyì bal Yɔshafaatɛ ⁴⁴ ǹdə́ Ashətarɔɔtɛ lyì bal Uzə ǹdə́ Arɔwɛɛrɛ lyì bal Otam byǎ Shama ǹdə́ Yəyəə ⁴⁵ ǹdə́ Shəməri byǐ Yəjayɛl e súlí ń da-byǐ Yɔwa, Tiisi lyì bal mɔ́ ⁴⁶ ǹdə́ Maava lyì bal Elyɛl ǹdə́ Elənam byǎ bɛ́ Yərəbəyi ǹdə́ Yɔshabya ǹdə́ Mɔwaabɛ tənà y lyì bal Yətəma ⁴⁷ e súlí Sɔba lyì bala Elyɛl ǹdə́ Obɛɛdɛ ǹdə́ Yashəə.