koussoube-marc-lee_1ch_text

Kǝ̀kàl-fwɛ̀lɛ̀ 12

¹ Nyǐ lyì bí byɛ̀bɛ́ bə̀ tú bə jòm Shəkəlaagɛ nɛ́ ǹdə́ Dəvyidi, ń gə́ yà ń dùr Ciishi byǐ Səyuuli yé né mùnì n lú mú yi ní. Bə̀ y'à wɔ́ kàndar bə̀ n'ê tó bə̀ zhə̀l búlə́ jàà wa. ² Bə̀ y'à lyɛ̃̀ twerh, bə̀ y'à wɔ̌ bə̀ dul nə́kulə, bə súlí bə tə cama ǹdə́ bə̀ jə̀-jĩ́ ǹdə́ bə̀ jə̀-gwã̀ ga. Nyǐ lyì bí byɛ̀bɛ́ bə̀ shí Bɛ̃zhamɛ kwálá y wa, Səyuuli cìcì kwálá y w bə bə̀ mɔ́: ³ Ayəzɛɛrɛ, bə̀ yó-cə́bal mɔ́ ǹdə́ Jəbəya lyì bal Shəma byǐ Yɔwaashɛ; Azəmavɛɛtɛ byǎ Yəzhɛl ǹdə́ Pɛlɛɛtɛ; Bəraka ǹdə́ Anatɔɔtɛ lyì bal Yəwu; ⁴ ǹdə́ Gabaɔ̃ lyì bal Yəshəmaya, ń wɔ́ kàndɔ nunə Shə́-ètɔ̀ w wẽ́, ǹ jà ń súlí ń wɔ́ bə̀ yó-cə́bal mɔ́; ⁵ ǹdə́ Yərəməya, ǹdə́ Yazhɛl ǹdə́ Yɔwanã ǹdə́ Gədəra lyì bal Yɔzabaadɛ ⁶ ǹdə́ Eluzəyi ǹdə́ Yərəyəmɔɔtɛ ǹdə́ Bəyalya ǹdə́ Shəmarəya ǹdə́ Aruufi lyì bal Shəfaca; ⁷ ǹdə́ Kore dwí rí lyì Eləkana, ǹdə́ Yəshəyəwu ǹdə́ Azarɛl ǹdə́ Yɔwɛzɛɛrɛ ǹdə́ Yashɔbam; e súlí Gədɔɔrɛ lyì bal Yərɔwam byǎ Yɔwɛla ǹdə́ Zəbaja. ⁸ Gadɛ lyì wẽ́ búlǝ́ kã̀dar zɛ̃̀ rǝ vò pǝ rǝ̀ cìn Dǝvyidi ni jàà ń ŋwɛ́nɛ́ è wẽ́ gɔ-e-lũ èpòlò w w mó wǝ, bǝ̀ yě búlǝ́ tum rí, bǝ̀ zhe búlǝ́ yé né cǝ̌r wẽ̀, bǝ̀ zhe swǝ́, bǝ̀ nyɛ̌ ǹdǝ bwaarɛ ta, bǝ̀ n'ê dur là là ǹdǝ nɛ̀msɛ ta pyàr yó né. ⁹ Ezɛɛrɛ yà ń wɔ́ bə̀ yó-cə́bal mɔ́, Obaja zɛ̃̀ ń yà ń wɔ́ bə̀lyè nyǎn mɔ́, Eləyaabɛ yà ń wɔ́ bə̀tɔ̀ nyǎn mɔ́, ¹⁰ Myəshəmana yà ń wɔ́ bə̀na nyǎn mɔ́, Yərəməya, yà ń wɔ́ bə̀nu nyǎn mɔ́, ¹¹ Atəyi, yà ń wɔ́ bwə̀ldù nyǎn mɔ́, Elyɛl yà ń wɔ́ bwàlpyɛ̀ nyǎn mɔ́, ¹² Yɔwanã yà ń wɔ́ lyɛlɛ nyǎn mɔ́, Eləzabaadɛ yà ń wɔ́ nə̀bɔ́ nyǎn mɔ́. ¹³ Zheremyi shí nyǎn mɔ́, Mǝkǝbǝnǝyi shí ǹdǝ́ mǝ̀dù nyǎn mɔ́ ¹⁴ Bǝ̀myɛ́ y'à wɔ́ Gadɛ byǎ, shǝ̀dɛ́ɛ́sɛ yó-cìnǝ́; bǝ̀ nàmpɔ́lɛ́ y y'à wɔ̌ è bwí ǹdǝ́ nunǝ zɔ̌m, sǝ náncɛ y y'à wɔ̌ e è bwǐ ǹdǝ́ nunǝ mɔ̀rhɔ̀. ¹⁵ Wɔ́ bǝ̀myɛ́ bǝ̀ byɛrhɛ Zhɔrdɛ̃ bwǐ y ǹdǝ́ nɛ̃̌ mɔ́ y'à sú y mǝ bɔrh cànà y nã́yǝ́ǝ́ y wẽ́ mó, bə jì è lyì bí byɛ̀bɛ́ bə̀ y'à jě bwǐ y vwaalɛ́ yi-púrhí sõ ǹdə́ yi-zùr sõ mó w mó. ¹⁶ Bɛ̃zhamɛ byǎ ǹdə́ Zhəda byǎ jàlà myɛ twèlé bə b'e nə Dəvyidi ń shòò jàà y wa. ¹⁷ Dəvyidi du n jəl be n wɔ̀: «E gə wɔ́ yə̀-zùlə́ yil á tú à sõ mùnì ga á sɛ̃ nɛ, à m'a shɛ̀nɛ́ a ce dwã yó ǹdə́ ába; sə á gə tú á la nɛ myìnù á ce à zwə̀ bé jɔ̃̀ wa, e jà à yə̀ lwɛlɛ twĩ̀, sə nə́ dabá Yi rí nyǐ sə rə kə́ bùrsí!» ¹⁸ Rə̀myɛ́ yi ní, Yi Eshirhə j'a zù Aməsəyi, ń wɔ́ shǝ̀dɛ́ɛ́sɛ́ yó-cə́bal, n zɛ̃̀ n wɔ̀: «Nə́ wɔ́ ǹmyɛ́ lyì, Dəvyidi, nə́ ŋwɛ́nɛ́ ǹdə́ ǹmyɛ́ Ezǝyi byǐ! Yə̀-zùlə́ dúdú, yə̀-zùlə́ dúdú yál nɛ́ ǹdə́ mɔ́, sə yə̀-zùlə́ yə̀ nɛ́ ǹdə́ lò mɔ̀bɔ́ ń nə́ ń sɛ̃ mɔ́ mɔ́! Bə̀ wɔ́ ǹ Yi rí rə̀ n'ê sɛ̃ mɔ́!» Dəvyidi zwẽ be, n zɛ̃̀ n pə bɛ yó-cìnə́ jààsɛ ń shə̀dɛ́ɛ́sɛ́ wẽ́. ¹⁹ Manasɛ kwálá lyì jàlà myɛ y'à zù Manasɛ kwálá lyì jàlà myɛ y'à zù Dəvyidi ń gə́ yà ń tú n tó Shilisəti lyì bí ni bə̀ la m'e bú ǹdə́ Səyuuli yi ní mú. Sə lyì bə̀myɛ́ y'à yə̀ ŋwɛ̀nɛ́ bə sɛ̃ mɔ yé, bə̀ Shilisəti lyì bí yó-cìnə́ bé jòm bə zhərh ǹdə́ dwã bə zɛ̃̀ bə ce ²⁰ Dəvyidi kwɛ̃̀ bə̀ kwã, bə̀ y'à zhe: «È wɔ́ nə́ ywẽ́ né ń la góm n ló tɛ̃́ mɔ́ dɛnnɛ ń mà n kə́ n tó né n ce dwã yó ǹdə́ ń yó-cə́bal Səyuuli!» Dəvyidi gə́ tú ń la Shəkəlaagɛ yi ní, Manasɛ kwálá y lyì jàlà y'à zù mu, è yàl: Adəna ǹdə́ Yɔzabaadɛ ǹdə́ Yəjayɛl ǹdə́ Myəkayəə ǹdə́ Yɔzabaadɛ ǹdə́ Elyəwu ǹdə́ Shələtəyi, bə̀ y'à wɔ́ shə̀dɛ́ɛ́sɛ́ mɔ̀rhɔ̀ mɔ̀rhɔ̀ yó-cìnə́ bé Manasɛ kwálá y wẽ́. ²² Wɔ́ bə̀myɛ́ bə̀ sɛ̃ Dəvyidi ǹdə́ ń shə̀dɛ́ɛ́sɛ́ nɛ, bə̀ bə̀ gakó y'à wɔ́ kàndar, sə bə̀ jǐrh yó-cìnə́ Dəvyidi shə̀dɛ́ɛ́sɛ́ wẽ́. ²¹ Dɛ̃ gakó lyì y'à n'ê twí bə̀ súlí Dəvyidi ni bə̀ la m'e sɛ̃ mɔ, rə̀myɛ́ ce zulə́ jàà y lyì bí tú bə jǐrh nánzhəzhɔ̌ ǹdə Yi zulə́ jàà lyì ta. ²³ Nyǐ lyì bí byɛ̀bɛ́ bə̀ y'à wɔ̌ búlə́ bə̀ la bú mú, bə̀ tú bə twèlé Dəvyidi Ebərɔ̃ nɛ́, mùnì ga bə zwẽ Səyuuli pyɛ̀lɛ̀ rɛ́ bə pɔ̃, kɔn tó Cinu nyí rí ń yà ń pɔ mɔ́, yó wə́: ²⁴ Zhəda kwálá y byǎ bɛ́, bə̀ y'à zhe nə̀kò ǹdə́ swé y'à wɔ́: nunə mɔ̀ɔ̀rhɛ tə̀ldù ǹdə́ zɔ̃̌-lyɛlɛ (6 800) bə̀ co bə̀ cìn shə̀dɛ́ɛ́sɛ́ wẽ́; ²⁵ Shəmənyɔ̃ byǎ bɛ́ wẽ́, lyì mɔ̀ɔ̀rhɛ tàlpyɛ̀ ǹdə́ zɔ̌m (7 100) bə̀ y'à wɔ́ kàndar co bə̀ cìn shə̀dɛ́ɛ́sɛ́ wẽ́; ²⁶ Levyi kwálá y byǎ bɛ́ wẽ́ è yàl: nunə mɔ̀ɔ̀rhɛ rə̀na ǹdə́ zɔ̃̌-nyə̀ldù (4 600), ²⁷ e súlí Yɔyada, Aarɔ̃ jì y yó-cə́bal mɔ́, ǹdə́ nunə mɔ̀ɔ̀rhɛ rə̀tɔ̀ ǹdə́ zɔ̃̌-nyàlpyɛ̀ (3 700) bə̀ y'à tó mo; ²⁸ ǹdə́ Sadɔɔkɛ, ébɔ́-dǎl ń yà ń wɔ́ kàndɔ, ǹdə́ ń cìcì dwí rí yó-cìnə́ shí-èlyè ǹdə́ bə̀lyè. ²⁹ Bɛ̃zhamɛ kwálá y byǎ bɛ́, Səyuuli da-byǎ bɛ́ wẽ́, è yàl: nunə mɔ̀ɔ̀rhɛ rə̀tɔ̀ (3 000), bə̀myɛ́ nánzhəzhɔ̌ y'à gwẽ̌ n'ê twĩ̀ Səyuuli kɛ̀lɛ́ y lyì bí yil kɔn b'e yí dɛ̃ rɛ́ rə̀myɛ́ mɔ́. ³⁰ Efərəyim kwálá y byǎ bɛ́ wẽ́, è yàl: nunə mɔ̀ɔ̀rhɛ shí-èlyè ǹdə́ zɔ̃̌-lyɛlɛ (20 800) bə̀ y'à wɔ́ kàndar, lyì bə̀ yilə y'à du bə̀ dwə́ né wẽ́. ³¹ Manasɛ kwálá y kə̀kàlà yá, yi-zùr sõ mó, byǎ bɛ́ wẽ́, è yàl: nunə mɔ̀ɔ̀rhɛ shí ǹdə́ lyɛlɛ(18 000) bə̀ j'a cír mùnì bə vò bə ce Dəvyidi jǐrh pyɔ̌. ³² Yəsakaarɛ kwálá y byǎ bɛ́ bə̀ y'à yě ywẽ̀ kùr pyǎ mùnì bə lwar kɔn rɛ́ tɛ̀bɛ́ Esərayɛl lyì byǎ bɛ́ gə́ y'à mə̌ sə bə wɛ̀rhɛ́ mɔ́ wẽ́, è yàl: nunə zwã̌-àlyè 200, yó-cìnə́ ǹdə́ bə̀ da-byǎ bɛ́ byɛ̀bɛ́ gakó bə̀ y'à cǐ. ³³ Zabyəlɔ̃ kwálá y byǎ bɛ́ wẽ́, è yàl: nunə mɔ̀ɔ̀rhɛ shí-ènu (50 000) bə̀ y'à tɛnɛ bə zhɛ̀ bə̀ zhǐ ǹdə́ bə̀ búlə́ wẽ̀ ré rə̀ wɔ́ dúdúmə́ dúdúmə́ mó, sə bə̀ y'à la vò bə bú ǹdə́ bə̀ wun gakó. ³⁴ Nəfətəlyi kwálá y wẽ́, è yàl: yó-cìnə́ mɔ̀rhɔ̀ (1 000), e súlí shə̀dɛ́ɛ́sɛ mɔ̀ɔ̀rhɛ shə́-ètɔ̀ ǹdə́ tàlpyɛ̀ (37 000) sə̀ y'à zhe nə̀kwə̀r ǹdə́ swə́. ³⁵ Dan kwálá y byǎ bɛ́ wẽ́, è yàl: shə̀dɛ́ɛ́sɛ mɔ̀ɔ̀rhɛ shí-èlyè ǹdə́ lyɛlɛ ǹdə́ zɔ̃̌-nyə̀ldù (28 600) sə̀ y'à wɔ̌ sə̀ m'a vò búlə́ jàà wa. ³⁶ Asɛɛrɛ kwálá y byǎ bɛ́ wẽ́, è yàl: shə̀dɛ́ɛ́sɛ mɔ̀ɔ̀rhɛ shə́-èna (40 000) sə̀ y'à tɛnɛ sə̀ wɔ̌ sə̀ m'a vò búlə́ jàà wa. ³⁷ Zhɔrdɛ̃ bwǐ y yi-púrhí sõ mó, Orɔbɛn kwálá y ǹdə́ Gaadɛ kwálá y ǹdə́ Manasɛ kwálá y kə̀kàlà y byǎ bɛ́ wẽ́, è yàl: nunə mɔ̀ɔ̀rhɛ zɔ̌m ǹdə́ shí-èlyè (120 000), bə̀ y'à zhe búlə́ wẽ̀ dwí gakó. ³⁸ Shə̀dɛ́ɛ́sɛ́ sə̀myɛ́ gakó, sə̀ y'à wɔ̌ búlə́ jàà w sə̀ m'a vò né mó, y'à tú Ebərɔ̃ ǹdə́ wu-põ̀ bə̀ la ce Dəvyidi jǐrh Esərayɛl púlə́púlə́ pyɔ̌. Esərayɛl lyì byǎ bɛ́ dwã bɛ́ gakó myɛ y'à tú ǹdə́ wu òdù bə̀ la ce Dəvyidi jǐrh pyɔ̌. ³⁹ Bə mɛ̃ gàà dwã nə̀tɔ̀ ǹdə́ Dəvyidi bə̀ n'ê jí bə̀ n'ê nywɛ̀, bə̀ bə̀ da-byǎ bɛ́ y'à tɛnɛ bɛ. ⁴⁰ Gàà nyí rí lyì bí, kɔn m'e yí Yəsakaarɛ ǹdə́ Zabyəlɔ̃ e súlí Nəfətəlyi lyì bí myɛ y'à n'ê zhĩ kùjú ǹdə́ bə̀nərh ǹdə́ yómde ǹdə́ bə̀nərh dwí dwã ǹdə́ nɛ̃ bə̀ m'ê twí bə̀ pɛ bɛ: è y'à wɔ́ mún ǹdə́ épyìlə́ búrú ǹdə́ də̀vɛ̃́-cèmé byǎ nánkùlə̀ ǹdə́ də̀vɛ̃́ ǹdə́ nwə̃̌ ǹdə́ vwàmá nánfwààlɛ e súlí və̌-ywàálɛ rə sú cɛ, bə̀ wu-nyɔ̃̀ y'à ŋwɛ́nɛ́ Esərayɛl nɛ́.