koussoube-marc-lee_1ch_text

Kǝ̀kàl-fwɛ̀lɛ̀ 10

¹ Dɛ̃ rə̀dù Shilisəti lyì bí zɛ̃̀ búlə́ ne ǹdə́ Esərayɛl lyì byǎ bɛ́; Sə Esərayɛl lyì byǎ bɛ́ dùr Shilisəti lyì bí yé né, bə̀ lyì nánzhəzhɔ̌ tu bə cì Jələbɔwa pyɔ̀ w yó. ² Shilisəti lyì bí j'a zɛ̃̀ bə̀ pyě Səyuuli ǹdə́ ń byǎ bɛ́ kùr nyí ni bə̀ n'ê jì. Bə gu Zhɔnatã ǹdə́ Abyənadaabɛ ǹdə́ Mələcishəwa, bə̀ y'à wɔ́ Səyuuli byǎ bɛ́ mɔ́. ³ Búlə́ né dùmì rí tú rə bə̀ rə jòm Səyuuli yó. Twərh cìnə́ bé lwar ń jàà shò. Ń gə́ nɔ bɛ, ywẽ nánfɔ̀lɔ̀ ce ń yala cəcɛnɛ. ⁴ Rə̀myɛ́ yó, Səyuuli wə̀l ń búlə́ wẽ̀ ré zhinnə mó ne: «À n'â lwə̀l mó bə̀ ǹ fwə̌rh ǹ búlə́ shù w ò pyá y w ń mə́ zò ne ń gu è gə də̀ rə̀myɛ́ lyì bí byɛ̀bɛ́ èta bə̀ yə̀ gòm* mó m'a zə búlə́ shù bə zò ne bə gu, bə súlí bə mɔ̀n nɛ.» Sə ń búlə́ wẽ̀ ré zhinnə mó cẽ, bə̀ ywẽ nánfɔ̀lɔ̀ y'à zhe mo. Rə̀myɛ́ yi ní, Səyuuli vùr ń búlə́ shù w n zɛ̃̀ n tu ò yó. ⁵ Sə Səyuuli búlə́ wẽ̀ ré zhinnə mó gə́ púrí Səyuuli cùwə̀, ńmyɛ vùr ń búlə́ shù w n zɛ̃̀ n tu ò yó ńmyɛ tó mo n cì. ⁶ Səyuuli ǹdə́ ń byǎ bɛ́ bə̀tɔ̀ y ga cùwə̀; ń kɛ̀lɛ́ y lyì bí gakó tó dwã bə cì. ⁷ Esərayɛl lyì byǎ bɛ́ bə̀ y'à wɔ jə́ y w mó gə́ púrí Esərayɛl lyì shə̀dɛ́ɛ́sɛ́ n'ê dùr sə̀ làà dɛ̃̌ mɔ́, Səyuuli ǹdə́ ń byǎ bɛ́ myɛ j'a cì mú, bə̀ shə́r bə yẽ̌ bə̀ cɛmɛ nɛ́ nɛ bə dùr. Sə Shilisəti lyì bí tú bə b'e jòm nə̀ wẽ́. ⁸ E zɛ̃̀ nəkɔkɔ́lɛ́ y Shilisəti lyì bí bə̀ bə vùr wẽ̀ ré tɛ̀bɛ́ rə̀ y'à wɔ cùùrí byẽ́ mó. Bə nə Səyuuli ǹdə́ ń byǎ bɛ́ cùùrí rə̀ pyě tɛ̃́ Jələbɔwa pyɔ̀ w yó. ⁹ Bə vùr Səyuuli wẽ̀ ré tɛ̀bɛ́ gakó rə̀ y'à wɔ ń byẽ́ mó, bə zə ń yó w ǹdə́ ń búlə́ wẽ̀ ré bə m'e lyɛ̃. Bə ce bə tó dɛ̃̌ Shilisəti lyì bí tənà y wa, bə m'ê cĩ́ yò-ècɔ̀nɔ̀ nyí rí rə̀myɛ́ mɔ́ bə̀ yə né ǹdə́ dwí rí lyì bí ni. ¹⁰ Bə cĩ́ Səyuuli búlə́ wẽ̀ ré bə̀ yi rí còrhó-jì* y wẽ́ bə zɛ̃̀ bə jele ń yó-kóló w Dagɔ̃ jì y wə. ¹¹ Yabɛɛshɛ lyì bí bə̀ wɔ Galaadɛ nɛ́ mɔ́ nyɛ̀ɛ̀ kɔn rɛ́ tɛ̀bɛ́ Shilisəti lyì bí y'à wɛ̀rhɛ́ Səyuuli ni mú. ¹² Búlə́ kàndar rɛ́ gakó j'a zɛ̃̀ rə kwè sɔ́má rə vò rə kwè Səyuuli ǹdə́ ń byǎ bɛ́ yala nɛ́, rə m'e kwɛ̃̀ rə bə̀ Yabɛɛshɛ. Rə ce bə̀ kúr rí cǒ òdù kùr wə, Yabɛɛshɛ Tərəbɛ̃́tɛ* y kùr wə, rə zɛ̃̀ rə lyẽ rə̀ nyí dwã nyàlpyɛ̀. ¹³ Səyuuli cùwə̀, ń gə́ dó Cinu Yi ni mú yilə, bə̀ ń yə̀ Cinu zɔ̀mɛ̀ rɛ́ zwẽ yé, ń súlí n vò n pár jɛ̃̀ jə̀pɛ́rɛ́ cə́bal sõ, ¹⁴ ń yẽ̌ Cinu bwə̌rh ne. Rə̀myɛ́ ce, Cinu Yi ce n cì, n zɛ̃̀ n pə pyɛ̀lɛ̀ rɛ́ Zhese byǐ Dəvyidi ni.