¹ Bũn man, a ĩ bĩniɛ man a le waani ɲii hɛra. A mu tãmu na la bii naa mi le ho yaho, na sã lee ɲi le ũ bũaani, lebũn tĩn lee bii naa mi: «Ɓuee yuo hen, a ĩ zeeni bii ɓuee we naa fo». ² Mi laho yi, a le Donbeeni Hakiiri panka kɛra ĩ wan, a ĩ man mu bazamu kanɓoni donso le waani a donso kara le wan. ³ Manso semu ka le hã *sakueseni donso na ɓa le zasipu naa saaduana cĩɛcĩɛkaro buosii, a lee ɲiika pũiɛpũiɛ. Le bonƙãnle mun lo kĩnia mu bazamu kanɓoni mu yi a lee ɲiika lon *sakueseni na ɓa le emɛroode. ⁴ Mu bazamu kanɓoni mu mansii ɓoni naa bua naa kĩnia le yi, a ɓa nikĩɛ ɓoni naa numa nan kara wan. Ɓa ɓuenɓuen zã hã sĩ-poa, a ɓura mu bazamu ƙɔ̃nluaa na wo le ho sãnu. ⁵ Mu bazamu kanɓoni mu a ho viiho ɲuiikaro lee le yi, a ho namakaro sã mun lee ɲi le yi. Hã fĩntãcuaaɓa buo heɲun zãniɛ yɛɛn bara le yaho. Hãn le hã hakiira buo heɲun na buo sã le Donbeeni yi. ⁶ Biɛ donso le ũ saaho na ɲumu lee ce werewere le ũ makã dũuhũ a mun wi mu bazamu kanɓoni mu yaho. Buaa baa naa donso mun dĩn kĩniɛ le kanɓoni mu yi. Ɓa yara le ɓa man ɓuenɓuen lee yii. ⁷ A ninyiɛni wiɛ ka le ũ kuden. A ɲun nii yiɛ ka lon dãa-za. A tĩn nii wiɛ yaho ka le ũ nive yaho. A naa nii wiɛ won ka le ũ duio na diɛra wa. ⁸ Ɓa mi baa naa ɓuenɓuen a miɛ buo hezĩn hezĩn wi. Hã ɓuenɓuen vo le hã yii. Biikɛ lebii ɓa lee bii le wisoni le ho tĩnaahũ fuuu : «A Ɲuhũso Donbeeni mansii miɛ. A da mu buo ɓuenɓuen. A wi ka buo donso dĩn yi lera. A wi fuuu, a ba a ɓuen». ⁹ Hen ka ɓa baa mu sansan lee bii yiɛ kara mu bazamu kanɓoni wan biemu biɛ lee ƙooni a, a lee de a baraka, won na wi fuuu hã loliɓa na ɲii miɛ yi, ¹⁰ a ɓa nikĩɛ ɓoni naa nuna naa lii ɓura yiɛ kara mu bazamu kanɓoni wan na wi fuuu hã loliɓa na ɲii miɛ yaho ɓuaani a. Ɓa lee we hɛn mi sãnu ƙãnluaa lii kuora mu bazamu kanɓoni yaho ka ɓa a bii biikɛ : ¹¹ «Ɲuhũso, wa Donbeeni, fo ko le ho cuku. Fo ko le le ƙoonii. Ho panka ɓuenɓuen buo sã fon. lebii ũnɛ le yiɛ lera mu buo ɓuenɓuen. Ũnɛ le yiɛ le mu kɛn, a mu mɛn wi ».