¹ Ĩ bĩniɛ le ĩ lon, a ĩ man a yiɛ kara mu bazamu kanɓoni wan ɓuan vãahũ donso le ũ nintĩɛni. Ho vãahũ mu yaho le ho mani ɓuenɓuen a ho tɔ̃nno wi wan, a bun. Ho ɲii lan le ho tomanu hã zen cua heɲun. ² Ĩ mun man waani tonkara donso na panka wi, a a lee bii biikɛ pãnpãn : «yiɛ ko le ho tomanu na lan le ho vãahũ mu ɲii fira bɛn ho le a yɛn?» ³ Ka yiɛ mahã ko le ho bɛnlo karanlo yi lo. Manso miɛ le waani, o mun miɛ ho ta wan, a ho ta fĩkɔ̃hũ a a mun miɛ yi. ⁴ A ĩ mɛntĩn yiicaa lo mu buo yi naa soobiɛ, lebii a yiɛ ko le ho bɛnlo karanlo yi lo. ⁵ A ɓa nikĩɛ ɓoni naa numa naa nikeni donso a lee bii naa mi: «Yi wa buo wa. Lon, yiɛ ɓa lee ve le a Zudaa zĩɲuhũ niviɛ kuden, a biɛ *Daviide manmanin, a faa ho fũuhũ. Won le yiɛ ko le ho tomanu na lan le ho vãahũ mu ɲii fiero, a bɛn ho». ⁶ Ĩ bĩniɛ le ĩ lon, a ĩ man Piiza donso naka le ũ yiɛ na ɓa fã yan naa muini, ka a dĩn le bɛɛni kanɓoni tĩni yi, ɓa baa baa naa, le ɓa nikĩɛ ɓoni naa numa tĩɛhũ. A Piiza mu wãa le a yii le mu buo heɲun heɲun. Hãn yii so le hã hakiira buo heɲun na le Donbeeni tonkaa ho dĩmiɲa kuaraa ɓuenɓuen yi. ⁷ A Piiza mu va vaa ɓo yiɛ kara mu bazamu kanɓoni wan, a a fo ho vãahũ na a won ɓuan le ũ nintĩɛni. ⁸ Bii a a fo ho ɓuan, a ɓa baa baa naa le ɓa nikĩɛ ɓoni naa numa nan a ɓuee ɓura a Piiza mu yaho. Ɓa ɓuenɓuen ɓuan hã koncoɓa, a mun ɓuan hã nanpora na wo le ho sãnu, na mu buo donso na sãmu sĩ tu a lee cĩ yi. Bũn buo so lee zeeni bii buo sã le Donbeeni yi fiiro buo. ⁹ A ɓa baa baa naa le ɓa nikĩɛ ɓoni naa numa nan lee sii le lenfĩnle nakɛ : «Ũnɛ le fo ko le ho vãahũ mu fero. Fo ko le ho vãahũ mu fero fie ho tomanu na lan ho ɲii. lebii ũnɛ lee fo ɓa yan le le muini. Ũ cɛ̃ni le dii ya ɓa niviɛ a ɓa buo sã le Donbeeni yi. Ɓa le ho dĩmiɲa kãna niviɛ le ũ siiɓa ɓuenɓuen yi, hari ɓa we laho lee laho, hari ɓa bii biini le biini. ¹⁰ Fo wo ɓa le wan *Donbeeni yankaroɓa nipomu, a ɓa we ta na le yi. Ɓa a di le bɛɛni ho ta wan». ¹¹ Ĩ bĩniɛ le ĩ lon, a ĩ ɲa le waani tonkaroɓa sã. Ɓa ka cɛrɛcɛrɛcɛrɛ, a kiriɛ mu bazamu kanɓoni , le ɓa baa baa naa, le ɓa nikĩɛ ɓoni naa numa nan yi. ¹² Biikɛ lebii ɓa lee bii pãnpãn : «A Piiza na ɓa la fã a ho danlo, le ho naforo, le mu bozũnlo, le ho panka a buo sã yi. A ko le le kanbiĩ. A ko le ho cuku. A ko le le ƙoonii». ¹³ A mu bolenniɛ ɓuenɓuen, bii wi le waani naa bi wi ho ta yi, bi wi ho ta fĩkɔ̃hũ, naa bii wi mu ɲumu yi, mu ɓuenɓuen na wi hã kuaraa ɓuenɓuen yi, a ĩ ɲa sã a mu lee bii biikɛ : «Le ƙoonii, le le kanbiĩ, le ho cuku, le ho panka a buo sã yiɛ kara mu bazamu kanɓoni wan, le a Piiza yi fuuu hã loliɓa na ɲii miɛ yi». ¹⁴ A ɓa baa baa naa le: Amin na! A ɓa nikĩɛ ɓoni naa numa nan mɛn lii ɓura a ɓa ɓuaania ɓa.