koussoube-marc-box-x-dedougou_rev_text

Bosankaniɛ

¹ A ĩ bĩniɛ le ĩ lon a ĩ man le waani fĩnle le ho ta fĩnle. Le waani le ho ta na la wi le ha yaho ɲuuna vũnun. Mu yamuɲumu wãa miɛ. ² A ĩ man ho Zeruzalɛɛmu loho dafĩnle, hiɛ buo sã le Donbeeni yi. Ho lo le waani le Donbeeni cãn lee lii. Ho se naa soobiɛ lon hãfĩɛ na wiikaa ũten ũ yaamu buo yi. ³ A mu tãbeeni donso sã ɲa le mu bazamu kanɓoni cãn a bii : «Mi lon, biikɛ wan a le Donbeeni paaniɛ kara le ɓa niviɛ. Le paaniɛ kara naa ba, a ɓa le le nipomu. Le Donbeeni ũ küire wi naa ba. ⁴ Le niɛkaa ɓa yiicaa ɓuenɓuen. Mu humu le le yiviɛ le le wiɛ, le le lonben a wãa vo, lebii a mu bokĩɛ ɓuenɓuen vo». ⁵ A yiɛ kara mu bazamu kanɓoni wan wãa bii : «Mi lon, ĩ wo mu buo ɓuenɓuen le mu bofĩɛ». A bii : «Tɔ̃n bii ĩ bi, lebii hã biini mu le ho tũiɛ poni a naa yii wi». ⁶ A a bĩniɛ bii : «Mu ɲii wãa tun. Le Ĩnɛ a ɓua mu buo ɓuenɓuen ɲuhũ, a le Ĩnɛ mun a veeni mu buo ɓuenɓuen. Ĩ le mu buo ɓuenɓuen ɲuhũ ɓuɛɛnii, a mun le mu veenii. Yiɛ le ɲuhãni da, a mu ɲumu na lee le le mukɛ̃ni binbiri ɲundɛ̃ni yi a Ĩnɛ na manso yi naa kãaman a a ɲu. ⁷ Bũn ɓuenɓuen le hã kĩɛ na bii a sĩ yiɛ faa ho fũuhũ yi. A ĩ wãa a we manso man Donbeeni, a manso wãa a we ĩ za. ⁸ Ka ɓa zãnloɓaa, naa biɛ pã le Donbeeni buo, le hã yiraweroɓa, le ɓa niɓueɓa, naa biɛ lee we ho hãfenlo le ho bafenlo le ũ siiɓa, le ɓa nicĩwa, le ɓa wɔ̃nhãɓa, le ɓa sabefũaloɓa, ban ɓuenɓuen a a kuee ho kiribi dɔ̃bebeeni yi a bũn mɛn awe ban buo na sã ɓa yi. Bũn le mu humu cua ɲun nii». ⁹ A le Donbeeni tonkaroɓa numa heɲun na ɓuan hã lanpora buo heɲun na mu bosũman wi yi nikeni a ɓuee bii nan min : «Ɓuen le ĩ zeeni a Piiza man hãfĩɛ naa fo». ¹⁰ A le Donbeeni Hakiiri panka kɛra ĩ wan a a tonkaro mu la mi yuoraraa le ɓuee donso na ɓuaa a dãn naa soobiɛ wan. A zeeniɛ ho Zeruzalɛɛmu loho na buo sã le Donbeeni yi naa mi ka ho lo le waani le Donbeeni cãn lee lii. ¹¹ Ho loho mu lee ɲiika kũiakũia le le sankueseni na yawa here na ɓa le zasipu buosii. Ho lee ce werewere le ũ makãdũuhũ. Bii ho lee ɲiikaraa lee zeeni le Donbeeni cuku. ¹² Ho loho mu danda na banbaa ha ɓuaa, a mun dãn. Hã zũkãɲini na wi ho danda mu yi a lee piru ɲun. A hã le ũ dakeni keni a le Donbeeni tonkaroɓa nikeni keni pan yi. A a *Isirayɛɛle zĩɲuna piru ɲun yennaa tɔ̃nna hã zũkãɲini mu mi dakeni keni wan. ¹³ Hã zũkãɲini buo tĩn wi le le wii hɛɛnii, buo tĩn wi le mu yamulenni, buo tĩn wi le ho worokolenni kãna fɛni, ka hã buo tĩn wi le le wii teenii. ¹⁴ Ho danda mu ɲuhũ bara hã sankuebobeera piru ɲun wan. A Piiza tonkaroɓa piru ɲun yennaa tɔ̃nna hã sankuebobeera mu dakeni keni wan. ¹⁵ A a tonkaro mu na lee bii naa mi a ɓuan le diɛ donso na lee maaza le mu buo. Le wo le ho sɛ̃nu . Den le dii a a maaza le ho loho, le ho zũkãɲini, le ho danda. ¹⁶ Ho loho mu sãa lee buo naa, a man min. A a tonkaro mu wãa maaza a ho loho mu a ho yu mu buo maaza nii cua muaasie piru ɲun na a yi hã kilomɛɛterewa muaasie ɲun naa ƙĩɛnaa sii. Ho dãamu a mun man min le ho sɛ̃nu dakeni tontomu. ¹⁷ A mun maaza a ho loho mu dɛnda naa bii ɓa niviɛ lee maaza le mu bii ho yu ninkokoni cua ɓuara heɲun naa buo naa. ¹⁸ Ho dɛnda mu son le hã *sankueseni donso na ɓa le zasipu. Ho loho ũ küire hon son le ho sɛ̃nu binbiri, a lee ce werewere le ũ makãdũuhũ. ¹⁹ Hã sankuebiera piru ɲun na ho danda ɲuhũ bara wan a donƙueekaa le hã sankueseni piru ɲun. Le ninyiɛni sakuebobeeni a donƙueera le le sakueseni na ɓa le zasipu. Le ɲun nii donƙueera le le sakueseni na ɓa le safiire. Le tĩn nii donƙueera naa dii ɓa le kaliseduana. Le naa nii donƙueera naa dii ɓa le emɛroode. ²⁰ Le honu nii donƙueera naa dii ɓa le saaduana. Le hezĩn nii donƙueera naa dii ɓa le koronaliina. Le heɲun nii donƙueera naa dii ɓa le korisoliite. Le hetĩn nii donƙueera naa dii ɓa le beeriile. Le denu nii donƙueera naa dii ɓa le topaaze. Le piru nii donƙueera naa dii ɓa le korizoparaze. Le piru don nii donƙueera naa dii ɓa le turikuaaze. Le piru ɲun nii donƙueera naa dii ɓa le amitisiite. ²¹ Hã zũkãɲini piru ɲun na lenkaa ho loho mu danda yi wonna le ũ dakeni keni a wo le hã sakuepoa donso sii beseni dakeni keni na yawa here. Ho loho mu wãbeeni hon wo le ho sɛ̃nu , a lee ce werewere le ũ makãdũuhũ. ²² Ho loho mu a ĩ yi man *Donbeeni zĩbeeni yi. Ho makoo miɛ le yi, lebii a a Ɲuhũso Donbeeni na da mu buo ɓuenɓuen le a Piiza le ban ten a wi bĩn. ²³ Ho loho mu makoo miɛ le wii le ho pĩihũ ƙoomu yi. Le Donbeeni cuku ka le ũ ƙonbobeeni a do ho wan. A a Piiza mun do ũ ƙoomu ho wan. ²⁴ Lebũn ƙoomu so ho dĩmiɲa kãna niviɛ a a kɛn yi. A ho dĩmiɲa bazaɓa a a ɓua mi nii buo a ɓuennaa ho yi. ²⁵ Ho loho mu danda zũkãɲini a man bĩni man ti le wisoni yi. Mu bon. Hã man bĩni man ti, lebii a ta man bĩni man hĩ. ²⁶ Ho dĩmiɲa cuku le ho boseni ɓuenɓuen a ɓa we e ɓua a ɓuennaa ho loho mu yi. ²⁷ Bii na yi man ce le Donbeeni yaho man zo ho loho mu huuu. Hã yirawera weroɓa le ɓa sabefũaaloɓa mun man zo ho loho mu huuu. Biɛ yennaa tɔ̃nna biɛ yu le mukɛ̃ni binbiri yennaa vãahũ yi, hiɛ a a Piiza to, le ban midon zoo kɛɛni ho loho mu yi.