¹ A ĩ bĩniɛ le ĩ lon a ĩ man le Donbeeni tonkara a a lo le waani lee lii. A ɓuan ho kɔ̃hũ na nayilo ɲii miɛ man zũaɲii wonza, a ɓuan ho zuakuari na ɓuaa. ² A tonkaro mu wiira a wiɛ wabeeni. A wiɛ mu le a haa na wi bĩn haari. Ɓa lee ve o naa Nibakalo taa Setãni. A wiira a can le ho zuakuari a a miɛ dã hã loliɓa ƙĩɛpiru. ³ A can wo liera do ho kɔ̃hũ na nayilo ɲii miɛ yi, a do ɲii, a bo le Donbeeni fĩimini wan. A wo bũn buona a ni, a a wãa yi bĩni yi dan ƙa ɓa niviɛ vĩini ka hã loliɓa ƙĩɛpiru mu yi ƙĩina. Ka hãn ƙii ƙĩina, a a ko a len lee fie diɛ a a we ho pãnza diɛ. ⁴ A ĩ bĩniɛ le ĩ lon a ĩ man bazamu kanɓoni. Biɛ kara hã wan a le bɛɛni diro panka nan yi. Ĩ mun man biɛ ɓa kuiera ɲuna manakãɓa. Ɓa kuiera ɓa ɲuna lebii ɓa zeeniɛ ho tũiɛ na a Yeezu ma, a buera le Donbeeni biini. Ban yi ɓuaania a wiɛ, a yi ɓuaaniɛ a kansi. A fĩimini mun miɛ ɓa ɓuraa le ɓa nini wan. Ɓa viera a a paani a di le bɛɛni naa yiɛ le Donbeeni man lera a a dã hã loliɓa ƙĩɛpiru. ⁵ Bũn le ho ninyiɛni veero. Ɓa lihiiɓa naka ban man vie ka hã loliɓa ƙĩɛpiru ɲii a yi tun. ⁶ Biɛ ninyiɛni viera ban ɲuna sĩ, ɓa buo sã le Donbeeni yi. Mu cua ɲun nii humu man yi panka ban wan. Ɓa a we le Donbeeni naa yiɛ le man lera yankaroɓa. Ɓa a di le bɛɛni naa wa a dã hã loliɓa ƙĩɛpiru. ⁷ Ka hã loliɓa ƙĩɛpiru mu ƙĩina, a ɓa a len a Setãni a lee fee a a diɛ, ⁸ a a tĩn i hĩni we e ƙa ho dĩmiɲa kãna ɓuenɓuen niviɛ a a vĩini. Hãn kãna so ɓa lee ve naa Kooki naa Makooki, a a ve ɓa a kuee min wan hã hĩɛ tara buo yi. Ɓa a we boo le ũ hãani na mu yamuɲumu ɲii buosii. ⁹ Ĩ man ɓa a ɓa lo ho dĩmiɲa kuaraa ɓuenɓuen yi ɲaana ɓɛrɛ a ɓuee do kĩriɛ ho loho na le Donbeeni wa naa soobiɛ yi, hiɛ le nipomu wi yi. Ka dɔ̃hũ donso mahã lo le waani a lii ɓo ɓa ɲuhũ. ¹⁰ A Setãni na la lee ƙa ɓa vĩini won ɓa wiira do ho kiribi dɔ̃bebeeni yi, hen na a ɓa kuaa a wiɛ naa yiɛ fɛɛra hã ɲicua na yi bon yi. Ɓa le a lo a be bĩn fuuu le wisoni le ho tĩnaahũ hã loliɓa na ɲii miɛ yi. ¹¹ A ĩ bĩniɛ le ĩ lon a ĩ man bazamu kanmui beeni daponi naa yiɛ kara le wan. Ho ta le le waani ɲuuna vũnun a yaho, a man bĩni man mi. ¹² A ĩ bĩniɛ le ĩ lon a ĩ man ɓa lihiiɓa, biɛ buo ɲuhũ wi naa biɛ buo ɲuhũ miɛ, a ɓa dĩn mu bazamu kanɓoni mu yaho. A donso hɛnkaa hã vãana na ɓa niviɛ boweniɛ tɔ̃nna yi. A donso mun la ho vãahũ donso hɛra. Hon a biɛ yu le mukɛ̃ni binbiri yennaa tɔ̃nna yi. A le Donbeeni fã le citii ɓa lihiiɓa wan a hehaa le ɓa boweniɛ na tɔ̃nna hã vãana mu yi. ¹³ biɛ hurũn mu ɲumu yi cera a mu ɲumu diɛ a ɓa lo. Hari mu humu le ho nihãnbo loho diɛ mi lihiiɓa a ɓa lo. A le Donbeeni citiɛ ɓa lihiiɓa ɓuenɓuen a hehaa naa bii ɓa nikeni keni wo. ¹⁴ A mu humu le ho nihãnbo loho ɓa dora kuaa ho dɔ̃bebeeni yi. Hon dɔ̃bebeeni so le mu humu cuaɲun nii. ¹⁵ Nive lee nive na yeni miɛ ho vãahũ na a biɛ yu le mukɛ̃ni binbiri yennaa tɔ̃nna yi, ban ɓuenɓuen ɓa mun dora kuaa ho dɔ̃bebeeni mu yi.