¹ Bũn man, a ĩ ɲa tãmu donso sã le waani lon zãama kuii na lee bii: «Mi ƙooni le Donbeeni. Lelɛ le dii lee feni ɓa niviɛ. Ho cuku le ho panka a buo sã wɛ̃n Donbeeni yi. ² Bii le lee fĩ le le citii a terenna, mu dĩn ho tũiɛ poni wan. Mu bon, lelɛ le dii tiiniɛ a hãa mu na soobaa lee yiɛ ũten ɲuhũ, yiɛ wa ho dĩmiɲa niviɛ paaniɛ naa wa yaaranaa ɓa. Le Donbeeni tontaɓa na humu buo la nii yi a le du yuaa». ³ Mu tãmu pa bĩniɛ bii : «Mi ƙooni le Donbeeni! Ho lobeeni mu cĩlo dɔ̃hũ man hi man mi. Ho yiri a a le fuuu hã loliɓa na ɲii miɛ yi!» ⁴ A ɓa nikĩɛ ɓoni naa numa nan, le ɓa baa baa naa a lii ɓura le Donbeeni na kãna mi bazamu kanɓoni wan yaho, a ɓa lee bii: «*Amin na! Mi ƙooni le Donbeeni!» ⁵ A ĩ ɲa tãmu donso sã le mu bazamu kanɓoni cãn a mu biɛ : «Miɛ na le le Donbeeni tontaɓa na lee kãnbi le, biɛ buo ɲuhũ wi naa biɛ buo ɲuhũ miɛ, mi ƙooni wan Donbeeni». ⁶ A ĩ bĩniɛ ɲa tãmu donso sã le waani lon zãama kuii tãmu. Mu sã ɲa le ũ ɲunbeeni vãnalo, mu sã ɲa le ũ viiho na na le ũ panka buosii, a bii biikɛ : «Mi ƙooni le Donbeeni lebii a wa Ɲuhũso Donbeeni na da mu buo ɓuenɓuen a wi mi bɛɛni yi. ⁷ Mi le wa tĩɛ wa, mi wa zãmaka, mi wa de ho cuku le yi, lebii a a Piiza yaamu sɛ̃nu diro dãn. Man fũaale won wiikaa ũten vo. ⁸ Le Donbeeni nan hã tĩzĩnia boseni bopoa pũiapũia a yi». hãn tĩpoasa buo lee zeeni bii terenna na a bii buo sã le Donbeeni yi wo. ⁹ A le Donbeeni tonkaro wãa bii nan min : «Tɔ̃n biikɛ : biɛ ɓa von a Piiza yaamu sɛ̃nu diinii mɛntĩn ɲuna sĩ». A a bĩniɛ bii : «Bii bii le le Donbeeni tũiɛ na a le ma». ¹⁰ A ĩ wãa lii ɓura a ta le ĩ ɓuaani a, ka a mahã bii nan min : «Ebe! Yi we bũn. Ĩnɛ lee ta le Donbeeni tonlo le ũnɛ le min zaɓa le min hĩnni buosii, miɛ na bo ho tũiɛ poni na a Yeezu zeeniɛ yi. Le Donbeeni le dii a ũ ɓuaani. Mu bon, ho tũiɛ poni na a Yeezu zeeniɛ, le hon a le Donbeeni ɲicuafɛɛroɓa ɲicua fara wan». ¹¹ A ĩ bĩniɛ le ĩ lon, a ĩ man a le waani ɲii hɛra. A ĩ le ĩ lon a lee conponi na. Yiɛ yuora a yeni ɓa le «yiɛ naa yii wi a le ho tũiɛ poni manso». A lee tiini ɓa niviɛ ɲuna, a ta hã hĩɛ naa bii terenna. ¹² A yii ka le ũ dɔ̃hũ diɛre. Mu bazamu ƙãnluezaa cɛrɛɛ a ɓura a ɲuhũ yi. Yeni donso a tɔ̃nna a wan. Nive yi zũ le ka mu yinan alɛ midon. ¹³ A kanɓun na a a zã a ziira le cɛ̃ni yi. A yeni donso ɓa le «Donbeeni biini». ¹⁴ Ɓa hĩntaɓa na lo le waani a yuora ɓa conponi ba yi. Ɓa zã hã tĩponi boseni pũiapũia. ¹⁵ Ƙatoni yara ɲunso na ɲiɛ wi a lee le a ɲii yi. Hon ƙatoni so le hiɛ a a firana le ho dĩmiɲa kãna niviɛ, a a dan ɓa. A a suwani mi panka ɓa wan naa soobiɛ. A a fi ɓa naa bii ɓa lee finaa ho Erezɛ̃n buo a ɲaa buosii, a zeeninaa le Donbeeni na da mu buo ɓuenɓuen tĩcĩile. ¹⁶ Biikɛ lebii tɔ̃nna a kanɓun le a buzoohũ wan: «Bazaɓa ɓuenɓuen biɛ, Ɲunasa ɓuenɓuen Ɲuhũso». ¹⁷ A ĩ bĩniɛ le ĩ lon, a ĩ man le Donbeeni tonkara donso a a zoo dĩn le wii yi, a lee bii biikɛ pãnpãn le ɓa ɲinzaɓa na lee ƙĩi yuo diɛ firicirii le waani : «Mi ɓuee kuee min wan a mi di ho sɛ̃nu , hiɛ le Donbeeni wiikaa buo. ¹⁸ Biɛ ɓuenɓuen na hurũn a mi ɓuee di sĩniɛ : Ɓa ba zaɓa, ɓa dasiɓa ɲunasa, ɓa cuaɓa naa biɛ lee yuo ɓa, ɓa niviɛ na wi miten le ɓa wobaani, biɛ buo ɲuhũ miɛ naa biɛ buo ɲuhũ wi». ¹⁹ A ĩ bĩniɛ le ĩ lon a ĩ man o yiɛ, le ho dĩmiɲa bazaɓa le ũ hĩntawa, a ɓa kuaa min wan a firaa naa yiɛ yuora a conponi le ũ hĩntaɓa. ²⁰ A ɓa wiira a wiɛ mu, a wiira yiɛ fiɛra hã ɲicua na yi bon na wo mu yereke buoɓa a wiɛ mu yaho. A wo kɛsii a ƙaraa ɓa niviɛ vĩinia, ban na a a yiɛ mu fĩimini bo wan, ban na ɓuaania o kansi. A yiɛ mu le a ɲicuafɛɛro mu a ɓa kuaa ho kiribi dɔ̃bebeeni yi le ũ yenveeni. ²¹ A a yiɛ mu hĩntaɓa nakɛ ban a wiɛ yuora a conponi ɓo le ho ƙatoni na lee le a ɲii yi, a ɓa ɲinzaɓa ɓuenɓuen ɓuee du ɓa sĩniɛ, a tu.