koussoube-marc-box-x-dedougou_rev_text

Bosankaniɛ 18

¹ VBũn man a ĩ bĩniɛ man le Donbeeni tonkara donso a a yuo lo lee lii. A yu ho panka beeni a cuku ƙonbeeni lii kuara ho dĩmiɲa kuaraa ɓuenɓuen yi. ² A tonkaro mu bii biikɛ pãnpãn : «Ho *Babiloona beeni buo yaara loo! Ho buo yaara! Ho wãa le ɓa cĩnaɓa loho. Ɓa cĩnaɓa le ũ siiɓa kana ho yi. Ɓa ɲinzaɓa na yi man la na ɓa niviɛ ɲina, ban ɓuenɓuen wi ho yi. ³ Ho diɛra ho dĩmiɲa niviɛ ɓuenɓuen le ho bafenlo le ho hãfenlo le ũ siiɓa naa soobiɛ le ũ divɛ̃n na ho ɲuiina naa ba. Ho ka le ũ hãa na lee yiɛ ũten a ho dĩmiɲa bazaɓa lee fe. Ɓa dɔ̃nloɓa wo ho naforo mansoɓa mu minika buo na a ho loho mu ta tĩɛ lee va yi buo yi». ⁴ A ĩ bĩniɛ ɲa tãmu donso sã le waani a mu bii : «Miɛ na le ĩ nipomu, mi le ho loho mu yi, bona a ni a mi nini yi kɛn mu bokora na ho lee we yi, a mu bosũman na a yi ho yi yi miɛ. ⁵ Mu bosũman a a yi ho lebii mu minika bokora na ho lee we a ɲa min wan yuo ɓo le Donbeeni yi, a le yi cera hã yi diɛ. ⁶ Hã wenkora na ho wo le ɓa niviɛ le hãn mansii a mi mun we naa ho. Bii ho wo lebũn mansii cua ɲun a mi we naa ho. Ho wenkora nakɛ le ũ *divɛ̃n a ho ɲuiina le ɓa niviɛ le hon herelo mansii cua ɲun a mi mun ɲuii naa ho. ⁷ Hen na ho ɓuaaniɛ ũten vaa ɓo yi, le mu minika beseni na ho wiɛra le ũ tĩni, le kɛsii a mi mun bee le ho la vɛɛni ho yi. Ho lee bii mi yi le ũ le a biɛ, le ũ yinan mahãa a mi yi man va man mi huuu. ⁸ Lebũn nan a wizonkeni donso ka mu bosũman a a yi ho. Bũn le mu humu, le le yiviɛ, le le ɲinsũmui. Holɛ ũ küire a a cĩ ho dɔ̃hũ yi bukubukubuku. Lebii a a Ɲuhũso Donbeeni na tiiniɛ ho ɲuhũ a panka wi». ⁹ Mu nan zon a ho dĩmiɲa kãna bazaɓa na le ho loho mu liɛra ho bafenlo le ho hãfenlo le ũ siiɓa le ho minika boseni na wiɛna ho tĩni yi a a mi ho cĩlo yiri. Ka ɓa man le a ɓa a wa a kuara ha bii yi. ¹⁰ Mu zon ka ɓa a ƙɛn a a dĩn le le zãnii bii lee we ha yi buo yi, ka ɓa a bii biikɛ : «Yereke loo, yereke! Ho *Babiloona beeni na la yi man sĩ yi, ninhiɛ ɲuhũ dɛnniɛ a tu ho pãnza diɛ yi». ¹¹ Ɓa dɔ̃nloɓa ɓuenɓuen mun a ta le wiri le ũ yumu wo ɓa wan lebii a yiɛ we e ya ɓa biɛ wãa miɛ. ¹² Bũn buoɓa so le ho sɛ̃nu , le ho dãɲan, le hã *sankoseni le ũ siiɓa na yawa here, le hã pãntoseni bopoa, le hã pãnsomuna na yawa here le hã sũuna, le hã ɓuɛɛni donso siiɓa na yawa here. Ɓa mun lee yiɛ hã donƙuetĩɛ le ũ siiɓa. Hã donso wo le ɓa sãmawa ɲiɛ, hã donso le hã ɓuɛɛni donso siiɓa na yawa here, hã donso le ho hãn lo, hã donso le ho dãɲan, hã donso le hã *sankoseni donso sii. ¹³ Ɓa mun lee yiɛ mu buoɓa na sãmu sĩ a yawa here. Bũn le le vĩndiɛ donso donkuaa, le hã vãnzaɓa donso, le ho ɲilo na sãmu sĩ, le ho miire. Ɓa mun lee yiɛ ho divɛ̃n le ho ɲilo, le mu dũmu le ho dĩnlo le ũ siiɓa. Ɓa mun lee yiɛ ɓa nama, ɓa piiɓa, ɓa cuaɓa le ũ wotoroɓa. Ɓa mun lee yiɛ ɓa niviɛ. ¹⁴ Ɓa we e wa ka ɓa a bii biikɛ : «Mu minka boseni na ũ yii la lee le a yaara vo ɓuenɓuen. Ũ naforo le ũ semu ɓuenɓuen vo. Fo man bĩni man yi mu huuu». ¹⁵ Ɓa dɔ̃nloɓa na dɔ̃nna ho yi woraa ho naforo manso wa a a ƙɛn a a dĩn le le zãnii bii lee we ho yi buo yi. Ɓa a ta le wɛɛ lon yumu wo ɓa wan ¹⁶ ka ɓa a bii biikɛ : «Yereke loo, yereke! Ho lobeeni yaara vo! Ho la ka le ũ hãa na lee ni hã pãnnsoseni bopoa , le hã pãnsomuna na yawa here, a lee zĩ mu buoɓa na wo le ho sɛ̃nu , le hã *sankoseni le ũ siiɓa na yawa here. ¹⁷ Ho lobeeni mu naforo ɓuenɓuen dɛɛniɛ yaara vo ho pãnza diɛ yi». Hã wonbiera ɲunasa, naa biɛ lee pa hã, naa biɛ lee zo hã, naa biɛ lee yi mi ɲii dĩnlo mu yamuɲumu wan, ¹⁸ ban ɓuenɓuen, ka ɓa man ho lobeeni mu cĩlo yiiri a ɓa a ƙɛn a a dĩn, a bii biikɛ pãnpãn : «Ho lobeeni mu mansii la miɛ». ¹⁹ Ɓa a ta le wiɛ a we e ƙuii le tĩni a a kuee mi wan le ũ yumu wo ɓa wan, ka ɓa a bii biikɛ pãnpãn : «Yereke loo, yereke! Le ho lobeeni mu minika naforo buo yi a hã wonbiera manso wo a naforo winaa. Lebũn ɓuenɓuen dɛɛniɛ yaara vo ho pãnza diɛ yi». ²⁰ Miɛ na wi le waani, mi zãmaka ho yaara buo yi. Miɛ na buo sã le Donbeeni yi, le a Yeezu tonkaroɓa le le Donbeeni ɲicuafɛɛroɓa, miɛ mun zãmaka. Lebii le Donbeeni tiiniɛ ho ɲuhũ bii ho wo naa miɛ buo yi. ²¹ A le waani tonkara donso na panka wi wãa la le sankuebebeeni donso a leeraa do mu yamuɲumu yi a a bii : «Le kɛsii a ɓa ƙii leeraa ho lobeeni *Babiloona le ũ panka cuokuen wan, a nive yere man bĩni man da ho wan. ²² Ũ konco ɓuaɓa, le ũ lenbeɓa, le ũ poropĩ wĩɓa, le ũ bũaa wĩɓa a sã man bĩni man ɲi huuu. Ũ nii tontaɓa a nive yere man bĩni man da wan. Ũ buo nilo sã man bĩni man ɲi. ²³ Ƙoomu man bĩni man de fon. Yaamu man bĩni man ca fon. Bũn ɓuenɓuen a a we fon, lebii a ũ dɔ̃nloɓa buo wi po ho dĩmiɲa dɔ̃nloɓa ɓuenɓuen. Fo mun ƙa ho dĩmiɲa niviɛ ɓuenɓuen vĩinia le ũ ninsimu wera. ²⁴ Le Donbeeni ɲicuafɛɛroɓa, naa biɛka na buo sã le yi na ɓa ɓo, le ɓa niviɛ na ɓa ɓo ɓuenɓuen, bũn ɓuenɓuen ɲa ho lobeeni mu ɲuhũ yi. Lebũn to bii le Donbeeni a a tiininaa ho ɲuhũ».