¹ «Hã ɲicua nakɛ a ĩ tɔ̃n a na le Donbeeni tonkaro yi, yiɛ lee pa ho Efɛɛze loho keretĩɛɓa kuure yi: «yiɛ ɓuan hã mabiɛ buo heɲun le ũ nintĩɛni, na lee varaka hã fĩntãcuaawa buo heɲun na wo le ho sãnu tĩɛhũ, le won lee bii biikɛ : ² Ĩ zũ bii mi lee we, mi ta le lonben yi mu buo yi, a mun lee hĩ mi tĩɛ mu yi. Ĩ zũ le biɛ le ɓa nisũman a mi pã buo. Ɓa donso na le a *Krista tonkaroɓa a mu yi bon, a mi ƙɛra kuara, a zũ le ɓa le ɓa sabefũaaroɓa. ³ Mi lee ta hĩ mi tĩɛ, a ta le lonben yi ĩ buo yi, mi yi man tie mi bara. ⁴ Ɛɛ ka ĩ mahã a za naa miɛ buo donso na a ĩ man miɛ a mu yi se buo yi. Bii mi wa naa mi pãahũ na mi ɓuakaa do mi tĩɛ min a mi diɛ. ⁵ Awa! A mi wɛ̃n va mi yiɓa bii mi fi karaa wan, a zũn le ũ lo le ho man. Mi wɛ̃n yerema mi yilera le mi wera a we naa bii mi fi karaa buo. Ka mi yi yereman, a ĩ ɓuee la mi fĩntɛ̃cuaa a a len bĩn. ⁶ Ka ĩ mahã mun lee ɓua miɛ. Lebii a bii ɓa Nikolayiiteɓa lee we a mi ɲina, naa bii ĩnɛ mun ɲinanaa mu. ⁷ «Yiɛ lee ɲi buo, a manso ɲi bii le Donbeeni Hakiiri lee bii ni ɓa keretĩɛɓa kura yi. Yiɛ danna ho fũuhũ faa, a le Donbeeni vĩntĩɛ ɓuaho vĩndiɛ na lee ni le mukɛ̃ni ɓa niviɛ yi, a manso a ĩ den man biire diro nii yi». ⁸ «Hã ɲicua nakɛ a ũ tɔ̃nna a ni le Donbeeni tonkaro yi, yiɛ lee pa ho Simin na loho keretĩɛɓa kuure yi: «yiɛ ɓua mu buo ɓuenɓuen ɲuhũ, a mun ƙii veeni mu buo ɓuenɓuen, yiɛ la hurũn a viera, le won lee bii biikɛ : ⁹ Ĩ zũ mi lobeero buo, a zũ mi ƙemu buo, a ho naforo binbiri ɲan wi ũ cãn. A biɛ le mi le ɓa *zuifuɓa a ɓa yinan, ɓa zuifuɓa binbiri, bii ɓa lee yaa le ũ yeni a ĩ mun zũ. Ɓa niviɛ mu kuure buo sã a *Setãni yi. ¹⁰ Le lonben na a le miɛ a mi yi zãn. Mi lon, a Setãni a a we a midonsua a ɓa a kuo ho kaso yi a a ƙɛnnaa mi kuara. Le lonben a a yi miɛ hã wizooni buo piru yi. Mi faradĩn mi tĩɛdero mu wan, hari ɓa ɓue miɛ, a ĩ ni le mukɛ̃ni binbiri miɛ. ¹¹ «Yiɛ lee ɲi buo, a manso ɲi bii le Donbeeni Hakiiri lee bii ni ɓa keretĩɛɓa kura yi. Yiɛ danna ho fũuhũ faa, won manso a mu humu cua ɲunnii man yi». ¹² «Hã ɲicua nakɛ a ĩ tɔ̃nna a ni le Donbeeni tonkaro yi, yiɛ lee pa ho Pɛɛkaamu keretĩɛɓa kuure yi: «yiɛ le ho ƙatoni na ɲiɛ wi yara ɲunso a ho ɲii wi, le won lee bii biikɛ : ¹³ Ĩ zũ le ho loho na fo wi yi le a *Setãni bɛɛni diinii. Mi yi bĩniɛ ĩ man, a mi faradĩn mi tĩɛdero mu wan. Hari Ãntipaasi pãahũ a mi yi yeremaa mi tĩɛdero, a mi pa wiikaa do mi tĩɛ min. A Ãntipaasi mu le won ma ho tũiɛ ĩ ɲii binbiri, hen a a Setãni wi yi. ¹⁴ Ɛɛ ka ĩ mahã a za naa miɛ cĩinu bii ĩ man miɛ a mu yi se buo yi. Ɓa tɔ̃n wi naa miɛ, a ɓa mun kura can a nii na ɓa le *Balaamu karanlo yi. Won na zeeniɛ a *Isirayɛɛle nipomu ƙa vĩinilo le a nuu na le a biɛ, yiɛ ɓa le Balaaki a ban la hã wãnna taa, a wo ho hãfenlo le ho bafenlo le ũ siiɓa. ¹⁵ Le kɛsii ɓa donso mun wi naa miɛ a boraa ɓa Nikolayiitewa karanlo yi. ¹⁶ A mi bũn yerema mi yilera le mi wera. Ka mi yi yereman, a hen naa cĩinu ka ĩ ɓuen, a ɓuee fi le ban niviɛ so le ho ƙatoni na lee le ĩ ɲii yi. ¹⁷ «Yiɛ lee ɲi buo, a manso ɲi buo le Donbeeni Hakiiri lee bii ni ɓa keretĩɛɓa kura yi. Yiɛ danna ho fũuhũ faa, a ho *mannɛ na ɓa sankaa a ĩ i na a yi a a la. Ĩ mun a ni le hueponi manso yi. Le huee mu a ĩ wɛ̃nci le yenfĩnle wan a a ni manso yi. Nibĩni yi da man zũn le yeni mu ka yinan yiɛ le hueponi mu nan yi». ¹⁸ «Hã ɲicua nakɛ a ĩ tɔ̃n a na le Donbeeni tonkaro yi, yiɛ lee pa ho Tiatiire loho keretĩɛɓa kuure yi: «yiɛ le le Donbeeni Za, na yii ka lon dɔ̃hũ dɛnle, a zeni lee ɲuiika lon tɔ̃ɲan, le won lee bii biikɛ : ¹⁹ Bio mi lee we a ĩ zũ. A le wamini na lee mi miɛ, laa bio mi yi man bĩni ĩ man, laa bio mi lee we na ɓa niviɛ yi, laa bio mi lee hĩnaa mi tĩɛ, mu ɓuenɓuen a ĩ zũ. Ĩ mun zũ le hã laa nakɛ wan, a bio mi lee we a pa bii mi wo pãahũ na mi ɓuakaa do mi tĩɛ a Yeezu yi. ²⁰ Ɛɛ ka ĩ mahã a za laa miɛ biɛ donso na ĩ man miɛ a mu yi se bio yi. O hãa Zezabɛɛle, yiɛ le ũ le le *Donbeeni ɲicua fɛɛra mu yi bon a mi lee diɛ a a ƙa ĩ tontaɓa vĩini. O lee ɲaa ɓa de ho ba-fenlo le ho hã-fenlo le ũ siiɓa wero yi, le hã wãnna taa laro yi. ²¹ A ĩ nan ho pãahũ wo yi, a a yerema mi yilera le ũ wera, ka a mahã yi ta le ũ i diɛ mi koomu wera. ²² Awa! Ĩ i we a a o te mu vãmu a biɛ laa wo lee paani ɓuenɓuen a ĩ bee la naa soobiɛ, se ɓa mɛn yereman, a diɛ a koomu wera. ²³ biɛ ba yi ɓuenɓuen a ĩ i ɓue. Ka mu wo ka, a ɓa keretĩɛɓa kuio ɓuenɓuen a a zũn le Ĩnɛ le yiɛ a zũ a nive yilera, laa bia a o tĩni va yi. Ĩ i saani mi nikeni keni yi a a heha laa bio mi lee we. ²⁴ «Ka miɛ Tiatiire keretĩɛɓa kuire niviɛ nakɛ, na yi ta yi bo ho karanlo mu yi, a mun yi wi mi zũn bio ɓa lee ve la a *Setãni bio na sa yi, ban a ĩ i bii biikɛ a a na yi: Ĩ man bĩni man heni biɛ donso wero man na miɛ, ²⁵ ka bii mi do mi tĩɛ min lebũn mi faradĩn wan naa bii mi lee weraa mu fuaa ĩ bĩni ɓuenlo. ²⁶ «Yiɛ danna fa ho fũuhũ, a ba bii a ĩ lee zeeni yi fuaa mu veenii, won a ĩ ni ho panka yi a a we hã siiɓa ɓuenɓuen ɲuhũ wan ²⁷ naa biɛ ĩnɛ mun yuraa ho panka ĩ Miɛ cãn buosii. ²⁸ A a suwani mi pankaɓa wan naa soobiɛ, a we e fi ɓa le ũ tĩɛ na ma laa coro. Manso a ĩ ni hã tatĩɛ mabiɛ yi. ²⁹ «Yiɛ lee ɲi bio, a manso ɲi bio le Donbeeni Hakiiri lee bii na ɓa keretĩɛɓa kura yi».