koussoube-marc-box-x-dedougou_rev_text

Bosankaniɛ 15

¹ A ĩ bĩniɛ le ĩ lon a ĩ man yereke bobeeni donso le waani na wo mi coon. Ĩ Miɛ Donbeeni tonkaroɓa numa heɲun, a ɓuanka mu bosũman buo heɲun. Bũn bosũman so lebii a a tii le Donbeeni tĩcĩile ɲii. ² A ĩ bĩniɛ le ĩ lon a ĩ man buo donso le ũ saaho na ɲumu lee ce werewere le ũ makãdũuhũ a ho dɔ̃hũ mun wi yi. Biɛ danna a wiɛ le ũ kansi le ho milo ɲii na man le a yeni, le ban dĩn ho saaho mu wan. Ɓa ɓuan hã koncoɓa na le Donbeeni nan ɓa yi, ³ a lee sii le Donbeeni tonta *Mɔyiize le a Piiza leni: «Ɲuhũso Donbeeni na da mu buo ɓuenɓuen, bii fo lee we ɓuenɓuen le mu bobeera, mu lee we ɓa niviɛ coon. Dĩmiɲa kãna ɓuenɓuen biɛ, bii fo lee we ɓuenɓuen a terenna, mu dĩn ho tũiɛ poni wan. ⁴ Yiɛ man kãnbi fo won miɛ. yiɛ a a pĩ man ɓuaani fo won miɛ. Fo le le Donbeeni ũdon, ũ sii miɛ. Ho dĩmiɲa kãna niviɛ ɓuenɓuen a ɓuee ɓuaani fo lebii a fo lee we bii terenna a ɓa mi». ⁵ Bũn man a ĩ man a le zĩbeeni na le waani ɲii hɛra. A hã pantoni buku na lee zeeni le le Donbeeni wi le ũ nipomu a zoo diɛ lee mi. ⁶ A le Donbeeni tonkaroɓa numa heɲun mu na ɓuan mu bosũman buo heɲun a zoo lo le zĩbeeni mu yi. Ɓa zã hã baka tua bopoa pũiapũia, a canka miten le hã ninkenaa na tã le ho sɛ̃nu . ⁷ A ɓa baa baa naa na kĩrikaa mu bazamu kanɓoni yi yakeni a nan hã lanpora buo heɲun na wo le ho sɛ̃nu le waani tonkaroɓa numa heɲun mu yi. Hã lanpora mu tu le le Donbeeni na wi fuuu hã loliɓa na ɲii miɛ yi tĩcĩile. ⁸ A le *Donbeeni zĩbeeni wãa tu le le yiri. Le yiri mu lee zeeni le Donbeeni cuku le le danlo buo. A nive yi da man bĩni man zo le, ka mu bosũman buo heɲun na ɓa tonkaroɓa mu ɓuan a yi ƙĩina.