¹ A ĩ ɲa tãmu donso sã pãnpãn zoo le *Donbeeni zĩbeeni yi a mu biɛ biikɛ nan ɓa tonkaroɓa numa heɲun mu yi: «Le Donbeeni tĩcĩile na wi hã lanpora mu yi a mi konko kuora ho ta wan». ² A a ninyiɛni tonkaro konkuaa ũ lanpoho yi buo kuara. A mu hĩnan wo hã caka sũman biɛ ɓuenɓuen na, a a yiɛ fĩimini wi wan, biɛ lee ɓuaani a wiɛ mu kansi. ³ A a ɲun nii tonkaro konkuaa ũ lanpoho yi buo kuara mu yamuɲumu yi, a mu yereman ka lon lihii cɛ̃ni. A ɓa baa na wi mu yi ɓuenɓuen hurũn. ⁴ A a tĩn nii tonkaro konkuaa ũ lanpoho yi buo kuara hã vũna le hã ɲundãa yi, a hã ɲumu yereman wo le cɛ̃ni. ⁵ A ĩ ɲa a a tonkaro na mu ɲumu buo wi nii yi a bii : «Ũnɛ na wi fuuu a wi ka buo donso dĩn yi lera, ũ sii miɛ. Bio fo fã le ũ citii a terenna. ⁶ Ɓa niviɛ kuara ũ ɲicuafɛɛroɓa cɛ̃ni naa biɛ buo sã fon nakɛ cɛ̃ni, a fo mɛn nan le cɛ̃ni ɓa yi le ɓa ɲu. Mu yu ɓa». ⁷ A tãmu donso lo ho *ãnsãn cĩinii, a ĩ ɲa. Mu bii : «Mu bon, Ɲuhũso Donbeeni na da mu buo ɓuenɓuen, bii fo lee fĩ le ũ citii a terenna, mu dĩn ho tũiɛ poni wan». ⁸ A a naa nii tonkaro konkuaa ũ lanpoho yi buo kuara le wii wan. A le wii yu le nii lee cĩikaraa ɓa niviɛ le ũ dɔ̃hũ, ⁹ a le cĩikaa ɓa naa soobiɛ. A ɓa lee la le Donbeeni, den na panka wi mu bosũman mu wan. Ɓa yi ta a yerema mi yilera le ũ wera a deraa ho cuku le Donbeeni yi. ¹⁰ A a honu nii tonkaro konkuaa ũ lanpoho yi buo kuara a wiɛ bazamu kanɓoni wan. A hã kãna na a a wi ɲuhũ wan a le tibiri cĩncoon a do wan. A ɓa niviɛ lee cũaaka mi dɛraa lebii ɓa lo lee benaa. ¹¹ A ɓa lee la le Donbeeni lebii hã cakawa lee bienaa ɓa lo, ɓa pa yi ta yi yereman yi diɛ mi wenkora wero. ¹² A a hezĩn nii tonkaro konkuaa ũ lanpoho yi buo kuara ho muhũ na ɓa le Efaraate yi, a ho ɲumu vã bona a ni a ɓa bazaɓa na lo le le wii hɛɛnii ɓuee dan ƙĩi. ¹³ A ĩ bĩniɛ le ĩ lon a ĩ man cĩnaɓa baa tĩn donso a ɓa lee le ɓa baa baa tĩn ɲini yi. Ɓa ka le ũ benɓoɓa. A yakeni lee le a wiɛ wabeeni ɲii yi, ka a donso lee le a wiɛ na lo mu ɲumu yi ɲii yi, ka a yakeni lee le yiɛ na lee fuɛ hã ɲicua na yi bon ɲii yi. ¹⁴ Ɓa le a *Setãni tonkaroɓa na lee we mu yereke buoɓa. Ɓa a hĩni a te ho dĩmiɲa ɓuenɓuen bazaɓa yi a a ve, a ɓa ɓuee ta hã hĩɛ le le Donbeeni, den na da mu buo ɓuenɓuen, le Donbeeni mu wizenbeeni zon. ¹⁵ A a Ɲuhũso bii : «Mi lon! Ĩ ɓuee yuoka mi wan le a kãnlo buo. Yiɛ faniɛ mi yii, a lee zĩ mi tĩɛ fuuu bona a ni a yi vara mi biri ĩ ɓuenlo pãahũ a hã nibii di, won manso ɲuhũ sĩ». ¹⁶ Ɓa cĩnaɓa mu von ho dĩmiɲa bazaɓa ɓuenɓuen kuaa min wan ho laho na ɓa le Haamakedon le mu heberemu yi. ¹⁷ A a heɲun nii tonkaro konkuaa ũ lanpoho yi buo kuara ho pĩnpiro yi. A tãmu donso lo mu bazamu kanɓoni yi zoo le *Donbeeni zĩbeeni yi, a bii pãnpãn : «Mu wãa vo». ¹⁸ Ho viiho ɲuiikaa a namakaa, a ho ta dikonna le ũ panka. A la ɓa niviɛ lenlo ɲii wan ɓuee ɓue ho pãahũ mu yi a ho ta dikonkaro mu mansii dĩn yi wo yi man. ¹⁹ A ho lobeeni benkaa le hã cua tĩn, a ho dĩmiɲa kãna lora ɓuenɓuen fu. Le Donbeeni yi cera ho lobeeni *Babiloona yi diɛ. A ho divɛ̃n na lee zeeni le le Donbeeni tĩni cã le ũ soobiɛ biɛ le kĩkãa ho yi a ho ɲun. ²⁰ Hã kãna na mu ɲumu kĩrikaa yi le hã ɓuaa ɓuenɓuen vũnun, a nive yi man mi. ²¹ Ho viiho ɓobiri beera to lii ɓa niviɛ wan. Le ɓobiire dakeni liro da a yi kilooɓa ɓuaraɲun naa piru sii. A ɓa niviɛ la le Donbeeni le le minika lonben na yu ɓa hã ɓobiɛ mu buo yi. Le lonben mu mansii miɛ.