¹ A ĩ bĩniɛ le ĩ lon, a ĩ man le Donbeeni tonkara donso na panka wi, a a lo le waani lee lii. Le dindiire ɓura a yi le ũ dazĩniɛ. A le bonƙãnle banbaa a ɲuhũ. A yaho lee ɲiika le ũ wii, a zerii ka le ũ dɔ̃hũ boroboroɓaa. ² Vãnza donso na hɛra a a ɓuan. A nintĩɛni zie a a bo mu yamu ɲumu wan, ka a ninkaaho zen a a bo ho ta wan, ³ a a bera pãnpãn le ũ kuden. Bii a a bera kɛsii, a ho viiho namakaro sã ɲa ho bɛkɛmu heɲun. ⁴ Bii hon viiho so namakaa ƙĩina, a ĩ wi a ĩ tɔ̃n bii ho namakaro mu buo, a ĩ ɲa tãmu donso sã le waani a mu bii : «Ho viiho mu namakaro man ɲicua a ũ ɓua ũdon. Yi tua mu». ⁵ A a tonkaro na a ĩ man a a dĩn mu yamuɲumu le ho ta wan, a hooniɛ ũ nintĩɛni nii da le waani, ⁶ a a baaniɛ ũten le le Donbeeni, dii wi bĩn fuuu hã loliɓa na ɲii miɛ yi, na lera le waani naa bii wi ho yi ɓuenɓuen, le ho ta naa bii wi ho yi ɓuenɓuen, le mu yamu ɲumu, naa bii wi mu yi ɓuenɓuen. A bii : «Mu wãa man bĩni man miɛ. ⁷ Nan zon na a heɲun nii tonkara a wĩ mi bũaani yi, bũn zon ka le Donbeeni buo na le la le ũ i we na sa yi a a we a ɲii i ti, naa bii le manaa mu nan mi tontaɓa na le le ɲicuafɛɛroɓa yi». ⁸ A mu tãmu na a ĩ la ɲa sã le waani a tĩn bĩniɛ bii biikɛ nan min : «Vaa fe ho vãahũ na a tonkaro na dĩn mu yamuɲumu le ho ta wan ɓuan». ⁹ A ĩ mɛn vaa ɓo a yi, a fiira a le a ni ho vãnza mu min. A a bii nan min: «Nin hiɛ, wãa fe ho la. Ho lii we hɛn ũ piiho yi hari ka ho la ka le ũ tuo ũ ɲii yi». ¹⁰ A ĩ fo ho vãnza mu a la. Ho yen ɓoɓo le ũ tuo buo. Bii ĩ la ho vo, a ho wo mu bohɛɛniɛ ĩ piiho yi. ¹¹ A ɓa bii biikɛ nan min : «Fo ko ũ pa bĩni bue bii le Donbeeni le ũ i we le ho dĩmiɲa kãna niviɛ le ũ siiɓa cɛrɛɛ, hari ɓa bii biini le biini, le ɓa bazaɓa cɛrɛɛ».