¹ Tumatyan na Ki gwon gwoso monye kak logon a dikara i kwökö anyen lupuŋdya ŋutu i kita kanyit i lukobi na kaden ti binyo ko ropet. ² A se iŋge torukökin i kita ko temet na gurut nagon yeŋ roparikin ŋuto i lor geleŋ kune, a nye soŋdi lepeŋat i kita kanyit i luköbi. ³ A nye köti iti kaŋo i saa buŋwan, a nye meddi kulye ŋutu gwogwo ’dan i pirit gwöriet ’bak kita; ⁴ a nye takiŋdye se adi, Ta koti, iti ta i kita i luköbi na kaden ti binyo, a nan de ropakiŋdye ta ropet na ’but. ⁵ Nyena a se iti tu. A nye köti iti kaŋo i saa puök wot murek, ko i saa musala, a nye koŋdi jojo. ⁶ A nye iti kaŋo nyona ko saa mukanat, a nye ryeji kulye ŋutu gwogwo ’dan kana. A nye pije lepeŋat adi, Nyo ta gwogwo ’dan ni kana tuparan liŋ? ⁷ A se waddi lepeŋ adi, Yi gwo ’dan kana kogwon lele ŋuto a ko gwörökiŋdyö yi i kita. A nye takiŋdye se adi, Ta koti, iti ta i luköbi na kaden ti binyo. ⁸ A i sömukö, a monye luköbi takiŋdye yumi lonyit adi, Luŋgi kakitak ko ropaki se ropesi kase, suluja ko se lo ’dur a ti ’dutet a ’duddye ko se logon a ti kokwe. ⁹ A ŋutu logon a gwöroki i kita i saa mukanat kulo lo poŋdi, a se liŋ geleŋ geleŋ ropakine gurut nagon roparikin ŋuto i lor geleŋ kune. ¹⁰ Nyena a ŋutu lo po a kokwe kulo ko poŋdi, a se yeyeji adi se ŋona de ropaki jore, ama a se liŋ geleŋ geleŋ köti ropakine gurut nagon roparikin ŋuto i lor geleŋ kune. ¹¹ A se ko wuji, a se woŋe ko monye luköbi adi. ¹² Ŋutu lo po i ’dutet kulo aje kita saa geleŋ ka ’de, kölumbö a do koŋdi lepepat jojo koyi logon a nigira tuparan liŋ i sala ko kolor kulo! ¹³ A nye waddi lele lose adi, Ju liŋ, nan a ko konakiŋdya do arabat. Yi ŋona a ko torukökin adi do ködyö kita ko gurut nagon roparikin ŋuto i lor geleŋ kune le? ¹⁴ Wuji po kunök, ko iti mede. Nan ’de ’dekan tiŋdu ŋuto lo ’dutet gwoso na tiŋdi nan do na. ¹⁵ ŋona nan ti bulö koŋdya po nagon nan ’de ’dekan ko gurut kwe le? Do yulön kogwon töili liŋ a lo ’but ko ŋutu le? ¹⁶ Nyena ŋutu logon a ti ’dutet mo gwe a ti kokwe, a ti kokwe mo gwe a ti ’dutet. ¹⁷ A na tiri Yesu Yerusalema nu, a i kiko a nye joŋgi ŋutu kanyit kajujumuk puök wot murek kulo a swöt, a kulyani ko lepeŋat adi, ¹⁸ Mete ta, yi kulo tu Yerusalema, a nan ŋuro lo ŋuto mo pakine i konisi ti koanejin temejik se ko i könisi ti katodinok ti Saresi ti Mose. A se mo ’duŋökiŋdye nan i tatua, ¹⁹ a mo pakiŋdye nan ko Lwaka i könisi anyen kwekweniarikin, ko anyen ’bi ’bitö ko kurubat logon a kwara, ko i ’bikiki i ködini na göro, a nan mo topiyuni topiyu i twan i lor tomusala lonyit. ²⁰ Nyena a ŋote ŋwajik ti Jebedayo se ko ŋwajik kanyit kulo poŋdi ko Yesu ni, a dulakine kak i twoju na lepeŋ, a piyuŋdye nene po ko lepeŋ. ²¹ A Yesu pije lepeŋ. adi, Do ’dek nyo? A ŋinu ŋuto waddi lepeŋ. adi, Sarakiŋdye kulo ŋwajik kwe murek anyen böpö sisi ’da lele konut i könin lutaten ko lele konut i kadoŋe i tumatyan inot. ²² Ama a Yesu waddi adi, Ta ti den po nagon ta mumulun na. Ta ŋona bubulö möju i kopo lo ŋoŋga logon nan mömöji lo? A se ruŋge adi, lye, yi bubulö. ²³ a nye kulyani ko se adi, Ta ’diri mo ŋoŋoŋga gwoso na ŋoŋgi nan na, ama ti gwon a kulya kwe i rukökiŋdyö na ta i si ’daki köyö i swöt lutaten kode köyö i kadoŋe, ama mo ruköki ŋutu logon kine piritön Baba aje tetenakin lepeŋat kune. ²⁴ A na yiŋge kulye kajujumuk puök kine kulya nu, a se wore woran ko kilo luŋasirik murek. ²⁵ Ama a Yesu lupuŋdye lepeŋat kanyit ni a kulyani adi, ta deden adi i kak ni kasarak tutumatyan ko ŋutu kase, a ŋutu temejik gwe ko kido saret na lepeŋat. ²⁶ Kine kulya ti gwe ti gwon sona kasu kiden; ko ŋuto logon ’de ’dekan gwon a duma kasu kiden ti nye ködyö gwe a kölipönit losu. ²⁷ Ko ŋuto logon ’dek gwon a lo kokwe kasu kiden, ti lepeŋ. ködyö gwe a ’dupiet losu; ²⁸ ma ’di gwoso nan ŋuro lo ŋuto a po i kitakiŋdya na ŋutu, ti gwon anyen nan kikitaki; nan a po i tiŋdu na mugun nio i daggu na ŋutu jore. ²⁹ A na kö ’yi se Yeriko nu, a ŋutu jore parik kepoddi Yesu. ³⁰ Mete, a ŋutu murek logon a mo ’dokeno gwe i si ’da i merete lo kiko, a na yiŋge se adi ŋilu a Yesu lo lwöpöddu nu, a se woŋoro ki adi, Do ŋuro lo Dawidi, wone konyen koyi! ³¹ A ŋutu kulo riŋge lepeŋat adi, Yiŋani ta taliŋ! Ama a se köti woŋoro ki bia parik adi, Pon duma, ŋuro lo Dawidi, wone konyen koyi.'' ³² A Yesu gwo ’de gwo ’dan a luŋgi lepeŋat, a pije adi, Ta ’dek ti nan konaki ta nyo? ³³ a se waddi lepeŋ adi, Pon duma, böŋö pane konyen kaŋ. ³⁴ A Yesu wone konyen ko lepeŋat, a ’bo ’yi konyen kase, a ’de ’de se bulöni bulö meddya, a moraddi ko lepeŋ.