¹ Nyena a Yesu ko tutuŋge jambu kilo kulyaesi, a nye kö ’yi Galilaya, a iti i kak na Yudaya, i nu pele na Yardene. ² A ŋutu jore parik kepoddi lepeŋ, a nye toke ’yi lepeŋat nyu. ³ A Parusijin poŋdi ko lepeŋ ni a tembi lepeŋ ko piyet adi, Saret ŋona a ruk adi ŋuto bubulö yaŋdu nakwan nanyit kogwon kulya liŋ? ⁴ A Yesu köti pije adi, Ta ŋona a ko keŋdya le adi, suluja i suluet Kagweyanit a gweja ŋutu ko lalet ko nakwan? ⁵ a nye kulyani adi, Ko ŋina kwe a ŋuto lalet mo kö ’yi monye ko ŋote, a mo mori ko narakwan nanyit, a se murek mo gwe a mugun geleŋ. ⁶ Nyena a se tine gwon a ŋutu murek, ama a se gwe a mugun geleŋ. Nyenagon ŋo nagon ŋun aje tomor a geleŋ na, ti lele ŋuto gwe ti koŋa se. ⁷ A se pije lepeŋ adi, Ko nyo Mose a sarakiŋdya adi ŋuto ködyö tiŋdu nakwan nanyit waraga yanyet, a soŋdi lepeŋ? ⁸ A nye waddi adi, Mose a ’burukiŋdya ta i yaŋdu na wate kasu kogwon töilyet kasu a Iŋgo, ama i suluet ti gwon sona. ⁹ Nyena nan takiŋdya ta adi, ŋuto logon yaŋdu nakwan nanyit, ake yaŋdu ko kulya ti lupö, a ko nye a yemba nene, lepeŋ a luŋ nye. ¹⁰ A ŋutu kajujumuk kulyani ko Yesu adi, A ko kulya ti lalet ko nakwan nanyit gwon sona, a bia ti ŋutu gwe ti yemba. ¹¹ Ama a nye waddi se adi, Ŋutu liŋ ti bulö wuju lo kulyaet, ake se logon ŋun a wulökin kilo. ¹² Kogwon kulye ŋutu ti bulö yemba kogwon se a yuŋwe a ’baŋin, kulye ti bulö yemba kogwon ŋutu lo koŋdya se a ’baŋin, a kulye tine yemba kogwon kulya ti Tumatyan na Ki. Nye logon bubulö wuju kine kulya lo ti nye wuji. ¹³ A kulye ŋutu joŋdi lupudiet ko Yesu ni anyen lepeŋ böŋö sopakiŋdya könisi kanyit ko lepeŋat loki ko kwakwaddu. A ŋutu kanyit kajujumuk riŋge se. ¹⁴ Ama a Yesu kulyani adi, Kölu ta kilo lupudiet ti poŋdi köyö ni, an ta ko teŋ ta lepeŋat; kogwon Tumatyan na Ki a na ŋutu logon gwoso kulo lupudiet. ¹⁵ A nye sopakiŋdye könisi kanyit ko lepeŋat loki, a lepeŋ iti tu. ¹⁶ Nyena mete, a lele ŋuto poŋdi ko Yesu ni, a pije adi, Katodinönit, nan ködyö koŋdya nan ŋo na ’but anyen wuju ru na yeŋ nyiŋ? ¹⁷ a Yesu waddi pija lepeŋ adi, Nyo do pija nan i kulya ti ŋo na ’but? Lele geleŋ kata logon a lo ’but. Nyena ko do ’de ’dekan lupö i ru, ’depe ’dep saresi ¹⁸ A nye pije adi, Kulon saresi? A Yesu waddi adi, Do ködyö ti tatuja ŋuto; Do ködyö ti lubbö; Do kodyö ti koko ’ya; Do ködyö ti lipikiŋdyö; ¹⁹ guje bu munyi se ko ŋuti; Do ködyö nyanyar marate ilot gwoso mugun inot. ²⁰ A titinti lo waddi lepeŋ adi, Nan aje ’dep kilo saresi liŋ; nan nyuŋ yöŋgi nyo? ²¹ A Yesu kulyani ko lepeŋ adi, Ko do yöŋo gwon a lo ’but i ŋo liŋ, iti, tugwore tugwör ŋo kunök, ko ’doggi ŋutu lomerika, a do mo gwe ko tukwörien ki yu; a kirut poŋdi ko kipuŋdye nan. ²² a na yiŋge titinti lo kine kulya nu, a nye iti tu dedelyaji, kogwon nye a kworinit parik. ²³ A Yesu kulyani ko ŋutu kanyit kajujumuk kulo adi, ’Diri nan takiŋdya ta adi, a nago i ŋuto kwörinit i lupö i Tumatyan na Ki. ²⁴ Köti nan takiŋdya ta adi, Gwon pölilyö ko kamilo i lupö i dili na libira lwölwöŋ lupö na ŋuto kwörinit i Tumatyan na ŋun. ²⁵ A na yiŋge ŋutu kanyit kajujumuk kine kulya nu, a se söŋi söŋu parik a pije adi, A kirut ŋa logon bubulö lwökö? ²⁶ Ama a Yesu diŋe lepeŋat, a kulyani adi, Ŋutu ti bulö, ama Ŋun bubulö koŋdya ŋo liŋ. ²⁷ Nyena a Petero nyobbi pija lepeŋ adi, Mete, yi aje kö ’yu ŋo liŋ anyen kebbu do, a yi mo gwe ko nyo? ²⁸ A Yesu waddi lepeŋat adi, ’Diri nan takiŋdya ta adi, Na si ’dari nan ŋuro lo ŋuto i si ’daet nio na minyo yu, i gwiliŋit ludukötyo nu, ta köti logon aje kipuŋdyö nan kilo mo sisi ’da i si ’daesi puök wot murek ti tumatyan, i Iŋgö na kulya ti kötumitön puök wot murek ti Yisaraele. ²⁹ ŋutu liŋ logon aje kö ’yu midijik, kode luŋasirik, kode kiasirik, kode komonye, kode ko ŋote, kode ŋwajik, kode kak jin kogwon karin kwe kulo, mo wuju jore köti gwoso daŋin mia geleŋ, a molu wuji ru na yeŋ nyin. ³⁰ Ama ŋutu jore logon a ti kokwe mo gwe a ti ’dutet, a ti ’dutet mo gwe a ti kokwe.