¹ A na gwoŋdi Apolo Korintonu, a Paulo lopaddi swöt lo lobot a ’dure Epeso. A lepeŋ ryeji kulye ŋutu logon a kajujumuk nyu, ² a nye pije se adi, Ta ŋona a wuju Mulökötyo Loke na yubbe ta nu le? A se waddi adi, ’Bayin, yi kwöŋ a ko yiŋ adi kode ŋona Mulökötyo Loke gwon kata. ³ A Paulo pije lepeŋat adi, Batisimo na batisari ta na a nyo? A se waddi adi, Yi a batisa ko batisimo na batiddye Yoane nu. ⁴ a Paulo takiŋdye se adi, Yoane batiddya ko batisimo nagon kweja adi ŋutu a löpuggö töilyet, takiŋdya ŋutu adi ti se yubbe ŋuto logon mo popo kanyit i mukök lo, kweja adi a Yesu. ⁵ A na yiŋge se kine kulya nu, a se batisani i karin ti Matat Yesu. ⁶ A nagon Paulo aje sopakiŋdya könisi kanyit kase loki nu, a Mulökötyo Loke poki ko lepeŋat, a se suluje jambu ko kutusen ka ’de ka ’de a tokuje tokujö. ⁷ A lepeŋat liŋ gwe gwoso ŋutu puök wot murek. ⁸ A Paulo yeŋe wörö i kadi momoret na Yudayaki yapala musala i jambu ko ŋutu a purutat; lepeŋ jajambu ko se a ga ’yi löpukuŋdyö se i kulya ti Tumatyan na Ŋun. ⁹ Ama a kulye kase tiŋge tiŋga, a tine ’bön yubbö, a jambi kulya ti lo Kiko arabat ko ŋutu i komŋo, nyena a Paulo joŋgi kajujumuk kulo a wuddye wuddya kase kata, a jambi perok liŋ i kadi todinet nagon a na Turano. ¹⁰ A kine kulya yeŋe gwon sona kiŋajin murek, nyena a ŋutu liŋ Yudayaki se ko ŋutu ti kulye juron lo si ’da i jur lo Asia kulo iŋge yiŋ kulyaet lo Matat. ¹¹ A Ŋun tiŋdi Paulo i koŋdya na sörösi temejik; ¹² nyena ma ’di möŋdiliet nagon nye a kitari se ko boŋgwat nagon lepeŋ a pitakin kanyit i mukök kune a yekaki ŋutu lo gigilötu, a twana kölökiŋdye se, a mulökö lorok poŋdi kaŋo kase i mugunya. ¹³ Ama a kulye Yudayaki logon a ’bunuk karikök ti mulökö lorok ko a kajölök kulo, mirakiŋdye ’diŋdya karin ti Matat Yesu i ŋutu logon a moka ko mulökö lorok, karikönit jambu ko mulökö lorok adi, Nan saŋu ta i karin ti Yesu logon Paulo tokujö kulya kanyit lo, adi poŋdi ta kaŋo. ¹⁴ A kulye kase logon a ŋwajik buryo ti lele koane duma lo Yudayaki karin kanyit a Sekewa kulo gwe i koŋdya sona köti. ¹⁵ Ama a mulökötyo loron waddi lepeŋat adi, Nan deden Yesu, nan köti deden ko Paulo a ŋa, ama ta kilo a koŋa? ¹⁶ A ŋuto logon a moka ko mulökötyo loron lo labaki kase loki, a ro ’yi lepeŋat parik, a te ’yi lepeŋat liŋ, a se wöku kaŋo i ŋinu kadi ko mugunya kana ko ’dikasin. ¹⁷ a ŋutu liŋ Yudayaki ko ŋutu ti kulye jurön lo si ’da Epeso kulo iŋge yiŋ kine kulya; a se liŋ iŋge moka kujönö, a karin ti Matat Yesu iŋge bula parik. ¹⁸ a jore kase logon aje yubbö kulo poni po, a tuŋge tuggö adi se a koŋdya to ’bunun, a kweji ŋo nagon se a kon kune. ¹⁹ a ŋutu jore logon köju a ’bunuk kulo momoruŋdye bukön kase ti to ’bunun kune i pirit na geleŋ, a ’yuŋe se ko ŋutu liŋ i komor. A se galuŋdye kaŋo ko kine bukön na ’yura kune ködyö a tugwörö a ködyö gurut gwöriesi gwe a pödöjin aliŋan merya mukanat. ²⁰ Nyena a kulyaet lo Matat ’duŋe ’duŋö ko riŋit a te ’yi te ’ya. ²¹ A i mukök na kine kulya, a Paulo yeyeji kanyit i töili anyen tiri lo Makedonia se ko lo Akaya tojo Yerusalema, kulya adi, I mukok nagon nan aje tu nyu nu, a nan agu ködyö ’yö ’yi Roma köti. ²² Nyena a Paulo soŋdi kaŋarak kanyit murek Makedonia yu logon a ko Timoteo se ko Erasito, a nye lepeŋ iŋge mönuŋdyö diŋit a najo madaŋ i jur lo Asia. ²³ A i ŋinu diŋit a ŋutu ŋiki i woŋon parik Epeso yu kogwon kulya ti ŋutu lo kebbu Kiko lo Matat kulo. ²⁴ Lele kanitönit lo pödö kata nyu karin kanyit a Demeturio, lepeŋ niddyö pödö teteŋdya nyömuejin ti kadi kwakwaset na ŋun nase nagon a Diana, a bodwat jore kitakiŋdye lepeŋ a ryeji ’bulit kata. ²⁵ Nyena a Demeturio lupundye lepeŋat liŋ i pirit na geleŋ se ko kulye ŋutu logon kita gwoso lepeŋat kulo, a takiŋdye se adi, Yakulo, ta deden adi na kita na jakiŋdya yi tukwörien. ²⁶ Ta a met ko a yiŋ adi ŋilo Paulo a löpukuŋdyö ŋutu jore ko a togiraddu se, kulya adi nyömuejin logon ŋutu lo teteŋdya a ŋunyen kase kulo ti gwon a ŋunyen kwoŋ. Lepeŋ jambu kine kulya ti gwon ni Epeso ka ’de, ama i Asia ’bukuluŋ yöŋgi piritön ku ’dik nagon nye a ko jambu kata. ²⁷ Yi kukujönö kode ŋona kita nikaŋ mo lalawe, ama lwölwöŋ ŋina yi kukujonö kode ŋona kadi kwakwaset na ŋun nikaŋ duma Diana mo luŋu a ŋo kana. Ŋutu liŋ ti Asia se ko ti kak ’bukuluŋ twötwö lepeŋ, nyena kode lepeŋ mo ririkö i todumalan nanyit. ²⁸ Nyena a na yiŋge lodir lo ŋutu kine kulya nu, a se iŋge woran a timönik, a woŋoro ki adi, Diana na Epeso na gwon a duma! ²⁹ a woŋon iŋge rekin i köji ’bukuluŋ, a ŋutu liŋ wöki i pirit na geleŋ i pirit metet na biryeesi, dudukaddu Gayo se ko Aristaruko ŋutu ti Makedonia logon jölö ko Paulo i pirit na geleŋ kulo. ³⁰ Ama a Paulo ko mugun nanyit ’deke tu ko ŋutu i komor, ama a ŋutu kajujumuk tine kölörö lepeŋ; ³¹ köti a kulye temejik ti miri lo Asia logon a julin kanyit kulo iŋge sunyukin lepeŋ lore, mo ’yu adi ti nye gwe ti kwekin mugun i pirit metet na biryeesi. ³² Nyena a ŋutu lo momora kulo woŋoro ki, ŋutu wopon ka ’de ka ’de, kogwon lojore a ko den ko se momoruŋdya i nyo. ³³ A Yudayaki iŋge dukara Alesaŋöero ŋerot, a kulye ti lodir nyonyökökiŋdye ko po a nyo nagon a pokin, a nye nanaji könin anyen ŋutu yiŋa taliŋ anyen nye bubulö tokurukiŋdyö kulya ko ŋutu i komor. ³⁴ Ama a nagon se aje gwulu ’yu adi lepeŋ a Yudayakityo nu, a se pu ’dökine i wopon ko gworo geleŋ gwoso saalan murek adi, Diana na Epeso na gwon a duma! ³⁵ A kawurönit lo kulya na jama ko momoret na köji lo suŋge lodir, a kulyani adi, Ta ŋutu ti Epeso, ŋutu ’bayin logon a ko den adi köji nikaŋ na Epeso a katiyunit na kadi kwakwaset na Diana duma, ko a katiyunit na ŋurupit na rurwan na ’duruun kak ki yu. ³⁶ Nyenagon kogwon lele ŋuto ’bayin lo renya kine kulya, ta ködyö yiŋa taliŋ a ta ködyö tine nyoŋga koŋdya nene ŋo. ³⁷ Kulo ŋutu logon ta a jon ni kulo a ko ryaggu kadijik kwakwasesi, a gwe a ko ’dö ’döju ŋun nikaŋ. ³⁸ Perok jamesi ti putesi kata ko mödirön kata lo yiŋga putesi, nyenagon ko Demeturio se ko bodwat lo gwon ko lepeŋ kulo gwon ko kulya ko lele ŋuto, a ti se iti i tupökin ko ’börik. ³⁹ Ama ko ta kata ko kunie kulya, a ti se jamani i momoret nagon yeŋ kona köji na. ⁴⁰ Kogwon ’diri ŋutu ŋona bubulö pökiŋdyö yi adi yi a mörö i lo lor, kogwon yi ’bak kwe na kulya nagon yi nyönyöggi kulya ti ŋina wopon. A nagon nye aje kulya sona nu, a nye torekiŋdye ŋutu lo momora kulo.