¹ A i mukök na kine kulya, a Paulo kö ’yi Atenai a iti Korinto. ² A nye torumbe ko lele Yudayakityo nyu, ŋuto lo Ponto karin kanyit a Akwila. Lepeŋ pete po Italia se ko narakwan nanyit karin kanyit a Pirisikila, kogwon Kalaudio a saŋu adi ti Yudayaki liŋ wuddye wuddya Roma. A Paulo poŋdi ko lepeŋat ni. ³ Kilo ŋutu a katetenak ti kemialan; nyena kogwon kita na Paulo ko na kilo ŋutu a ŋo na geleŋ, a nye si ’dani ko se, a kitani ko se i pirit na geleŋ. ⁴ A nye jambi i kadi momoret na Yudayaki temba i Sabata, yöŋö löpukuŋdyö Yudayaki se ko Giriki. ⁵ A Sila se ko Timoteo ŋine Makedonia, a ’dure Korinto, a Paulo joŋgi diŋit nanyit liŋ i tokujö na ŋilo kulyaet, tokurukiŋdyö Yudayaki adi Yesu a Masia. ⁶ A lepeŋat renyani lepeŋ, a momoroji lepeŋ. Nyena a Paulo nanaji boŋgwat kanyit kune, a kulyani ko se adi, Ti rima kasu gwe kasu i kusik! Nan a loke. Soŋinana nan lo iti i ŋutu ti kulye jurön. ⁷ A nye ŋine ŋien nyu a iti ko Tito Yusito mede. Ŋilo ŋuto a kakwakwasanit lo Ŋun, a mede nanyit diŋöni ko kadi momoret na Yudayaki. ⁸ A Krisipo duma lo kadi momoret se ko mede nanyit liŋ iŋge yubbö Matat. A ŋutu jore ti Korinto yiŋge kulya na jam Paulo kune, a se yubbe yubbö a iŋge batisa. ⁹ A i lele tukwaje a Matat kulyani ko Paulo gwoso i rudwe adi, Ko kujönö; kölumbö jambi jambu, an do ko yiŋa taliŋ; ¹⁰ kogwon nan gwon ko do, a lele ŋuto mo gwe ’bayin lo domba do anyen konakiŋdya do arabat. Nan gwon ko ŋutu jore i ŋina köji. ¹¹ Nyena a Paulo iŋge si ’da nyu kiŋa geleŋ ko yapala buker, todinikindyö ŋutu kulyaet lo Ŋun. ¹² A na gwoŋdi Galiŋ a mödir lo Akaya nu, a Yudayaki momori momora, a morgi Paulo, a joŋgi lepeŋ i ri. ¹³ A se kulyani adi, Lo ŋuto ’dek löpukuŋdyö ŋutu anyen kwakwaddu Ŋun, ti gwon gwoso i saresi. ¹⁴ Ama a nagon Paulo ’deke jambu nu, a Galiŋ kulyani ko Yudayaki adi, Ko ködyö ta Yudayaki ’dek jambu putet lo kulya narok kode lo toron duma, ködyö a na ’but ko nan poŋga taliŋ ko ta i yiŋga na kulya kasu; ¹⁵ ama ko ta gwon i rerenya i kulya ti tokuruki na kulyaesi, kode na karin, kode na saresi kasu ti keri, a ti ta ko ’börik lo meddi kine kulya. Nan ti ’bön gwon a ka ’dupönit lo kine kulya. ¹⁶ a nye riköddi se kaŋo i ri. ¹⁷ A ŋutu liŋ morgi Sosetene duma lo kadi momoret, a ’biddye lepeŋ i komor na ri. Ama a Galiŋ tine yeye kine kulya. ¹⁸ A i mukök na ŋina a Paulo karaki nyu ko kulye perok jore, a rome ko luŋasirik lo yubbö kulo, a lepeŋ suluje tu ko ki ’bo Suria, a Pirisikila se ko Akwila moraddi ko lepeŋ. A i ŋerot na tu nase, a Paulo ’barinuni kwe Kepkuria yu kogwon milye logon nye milyekin Ŋun lo. ¹⁹ A na ’durökiŋdye se Epeso nu, a Paulo kölökiŋdye Pirisikila ko Akwila i si ’da nyu, a nye ko mugun nanyit luŋoni i kadi momoret i jambu na kulya ko Yudayaki. ²⁰ a Yudayaki pije lepeŋ anyen mönuŋdyö ko se ko nene diŋit, ama a nye iŋge renya, ²¹ a kölumbö i piörö nanyit, a nye takiŋdye lepeŋat adi, Ko Ŋun ’de ’dekan nan mo yiyitwe kasu ni. A kirut lepeŋ kö ’yi Epeso, a lwöpöddi ŋerot ko ki ’bo. ²² A na ’durökiŋdye nye Kaisaria a kiyuŋdye kaŋo nu, a nye iti Yerusalema i roman ko kanisa, a kirut lepeŋ iti Antlokia. ²³ a nye ko joŋgi nene diŋit yu, a nye piörö piörö, a wöröjine i jur lo Galatia se ko lo Purugia totŋgoloddu ŋutu liŋ logon a kajujumuk. ²⁴ A lele Yudayakityo karin kanyit a Apolo, ŋuto lo Alesaŋduria i yuŋwe nanyit, iŋge ’dur Epeso. Lepeŋ a kajamanit lotolok ko a lokoŋ i kulya ti Ŋun na wurö kune. ²⁵ Lepeŋ köju a todiniki kiko lo Matat, a gwe ko pusök a duma i jambu ko i todiŋdyö na kulya ti Yesu ’bura, ma ’di nagon nye tuŋ deŋdya kulya ti batisimo na batiddye Yoane nu. ²⁶ a lepeŋ suluje jambu a purutat i kadi momoret na Yudayaki, ama a na yiŋge Pirisikila se ko Akwila lepeŋ i jambu nu, a se joŋgi lepeŋ, a se tokurukiŋdye lepeŋ kiko lo Ŋun ’bura bia parik. ²⁷ A nagon nye ’deke lapaddu tojo Akaya nu, a luŋasirik lo yubbö kulo togo ’yi lepeŋ, a se wurökiŋdye ŋutu logon a kajujumuk lo gwon Akaya yu kulu waraga, adi ti se wuji lepeŋ ’bura. A na ’durökiŋdye nye nu, a nye parakiŋdye ŋutu logon Ŋun a won konyen ko se ko a tiŋdu lepeŋat i yubbö kulo, ²⁸ kogwon lepeŋ jambu ko riŋit, a nye te ’yi Yudayaki ko ŋutu liŋ i komor, a kwekiŋdye se adi kulya ti Ŋun na wurö kune tuggö adi Yesu a Masia.