¹ Kuraiin taki bi beinu jemil fi jesma taki, beniya ta amiir! harakat ta jamba taki al meyilu bi geni ze mujuhurat, geni ze sukul ta rasam al shatir. ² Surra taki geni ze kubaya al muduwar, al ma dearo khamra al mulakbat. Batna taki ze komm ta gemeh al lifo be zuhur ta suson. ³ Sudur taki temaniya ta Gazelle. ⁴ Ragabtu taki ze buruj ta aaj; uyon taki geni ze birka ta moya al fi Heshbon al fi buwaba ta bett Robbim. Anafa taki ze buruj al fi Lebanan al bi itejih le Dimashq, ⁵ Ras taki ze Carmel; Shar taki geni ze arjuwan al duluma. Melik tala abit bi gefil ta shar taki. ⁶ Gudur shunu inta giyafa wa gudur shunu inta mahbub, yah bib tai, be farah. ⁷ Tul taki ze shejera nakha wa sudur taki ze mujumua kutula ta fawaki ⁸ Ana kelim inu ana deiru arkab shejera nakhil de, ana bi amsuku furu tou, keli sudur taki geni ze mujuma ta enab, wa keli riha ta nefes taki geni ze asiir ta tufah. ⁹ Keli kasuma taki geni ze Khamra al tamam, bi jere dufogu adil le babib tai, bi muroru tuwali fi shafaif ta de al bi num. ¹⁰ Ana le habib tai, wa huwo mushtak le ana, ¹¹ Taal, ya hahibi, keli nina ruwa bara min medina, keli nina ruwa num fi beled. ¹² Keli nina gum bediri ashan bi ruwa fi ginena ta inab keli nina ainu kan sei nabat ta inab de boda raba. Kan sei zuhurot tou tala. Wa kan sei Ruman tala zuhur. Hinak ana bi wodi le inta muhaba tai. ¹³ Shejera bi tala riha tou, fi bab al nina bi geni fogo fi kulu anwa ta fawakih, jedid wa gedim, al ana hafizo le inta, ya habibati.