¹ Ana bi itmana inu inta ze aku tai, al rada sudur ta uma tai, yala biga kulu ma ana ligo inta bara, ana bi agdeir gubla inta, wa ma fi zol al fi alisu ana. ² Ana bi shilu inta wa bi jibu inta fi beit ta uma tai, hiya al derisu ana. Ana bi wodi le inta khamra al mushakal ashan inta bi asharab wa juzu min asiir ta ruman, al mara wonusu le nefsa tou, ³ Ida tou ta shamal tehet ras tai wa ida tou ta yemin bi gubudu ana. ⁴ Ana deiru keli inta alifu, ya banat ta Urshelim, inu intum ma bi tauru wogifu muhaba lahadi ma huwo kalasu shokol tou. ⁵ De munu yao bi ja min sahara, bi teki fi habib ta tou? Ana sahi inta min tehet shejera ta tufah; hinak uma taki hamil ma inta fogo, wa hinak hiya weledu inta. ⁶ Kutu ana ze khatim fi geliba taki, ze khitim fi iden taki, leanu muhaba guwi ze mutu. Giera gowi ze jahanam; lahab tou bi tala bara; huwo lahab bi wala ze nor, lahab al sukun min ai nar. ⁷ Moya al ketir ma bi agdeir batilu muhaba, wa feidan bi agdeir kati, iza kan insaan wodi kulu mumtalakat ta bet tou ashan muhaba, hadiya tou de bi alisu. ⁸ Nina indu ukut ta nina al sukir al sudur tou lisa ma tala. Nina bi amulu shunu le ukut ta nina de fi yom al kalas deiru zuwju hiya? ⁹ Iza kan hiya heta nina bi abinu fi hiya buruj min fida. Iza kan hiya bab, nina bi jemilu hiya bi luha ta khashab ta urz. ¹⁰ Ana kan heta, lakin sudur tai hasa ze buruj; biga ana fi uyon tou ze zol al bi jibu salam. ¹¹ Seliman kan indu karma fi Baal Hamon. Huwo wodi karam le del al bi agdeir hafisu. Kulu wahid bi jibu1,000 fida ta samar de. ¹² Karam de tai wa le ana, huwo fi gedam tai; 1,000 feda de le inta, Seliman, wa 200 fida de le nas al bi hafisu simar tou. ¹³ Inta al bi geni fi jinenat, asdika tai bi asuma le sut taki, keli ana asuma. ¹⁴ Istaji, ya hobibi wa kun ze gazal aw gena ta tou al fi jubal ta riha al giyafa.