¹ Ana jaa fi jinena tai, yaakut tai, ya arusa tai; ana limu mur tai maa riha tai. Ana akul halawa tai maa aseel tai; Ana ashrab khamra tai maa leben tai . Sabihat le aris wa arusa; ashrab wa keli intum askar bi hub. ² Ana kan num, lakin gelba tai kan sahi. yahu dak sout ta habib tai bi dugu wa bi kelim, "Ukut tai, habiba tai, hamama tai, ahsen wahid le ana, fata le ana, ashan ras tai bilu be nada, shaar tai mublul be rutuba ta belel." ³ Ana agila ghumash tai; keli ana lebisu huwo tani mara? Ana kasulu kuraa tai; keli ana waskanu umon tani mara?" ⁴ Habib tai midu iden tou ashan bi fata gifl ta bab, wa geliba tai dugu le huwo. ⁵ Ana gum ashan bi fata bab le habib tai; iden tai kan bi naga mur, wa asabi tai mublul bi mur fi magbad ta bab. ⁶ Ana fata bab le habib tai, lakin habib tai rijaa wa huwo ruwa. Geliba tai karabu zaman huwo ruwa. Ana fetishu huwo, lakin ana ma ligu huwo; Ana nadi huwo, lakin huwo ma rudu. ⁷ Huras ligo ana fi zaman al umon bi amulu dowria tumon fi medina. Umon dugu ana wa auwgu ana; huras ta asuwar shilu eabaya tai min ana. ⁸ Ana der keli intum halifu, ya banat ta Ureshelim, inu kan intum ligu habib tai- intum bi wori le huwo shunu? Ana ayan bi hub. ⁹ Ya ajmal jemila min beina nusuwan, sei habib taki de afdal min habib tani? Le habib taki yao ahsiin min habib tani, ino inti bi asalu min nina halifa zi de? ¹⁰ Habib tai bi lamaa wa ahmar, muaalim min beina ashara - alfi. ¹¹ Ras tou dahab al safi; shaar tou fifil wa asued ze loun qhurab. ¹² Eyun tou ze itneen hamam al bi geni jambu majari ta moyo, kasulu be lebin, kutu zi jawahir. ¹³ Bangiri tou ze maratib min zuhur, bi tala riha ta bakhur. Shafaif tou ze zahrat ta suwsana, al bi nezil mur. ¹⁴ Iden tou kulu dahab mursus be jawahir; batna tou aaj kati be yaghut zahari. ¹⁵ Kuren tou amida ta rukham, asas tou min dahab al safi; shbih tou ze Lubnan, shab ze ashjar ta ruz. ¹⁶ kasma tou ahlla; huwo kulu hilu. De yao habib tai, wa de yao sabi tai, ya banat ta Ureshelim.