1 Asuma, ya awulad, le towjihad ta abu , wa kutu balak yala inta bi arufu ilim huwo sunu. 2 Ana bi wodi le inta towjihad al kwes; mata sibu dirasa tai. 3 Zaman ana kan weled ta abu tai, jena wahid bes al uma tai bi hibu, 4 huwo derisu ana wa kelimu le ana, Kede geliba taki amsuku kalam tai gowi; hafisu wosiya ta wa ish. 5 Aksib hikma wa ilim; mata nesitu wa mata aba kalam ta kasuma tai; 6 mata sibu hikma wa huwo aiynu inta; hibu huwo wa huwo bi hafisu inta. 7 Hikma huwo haja mohim shedid, yala aksib hikma wa istamilu kulu hajat al inta indu yala inta bi ligo ilim. 8 Hibu hikma wa huwo bi arfa inta; huwo bi ihterim inta kan inta gabilu huwo. 9 Huwo bi kutu zuhur ta ihtiram fi ras taki; huwo bi wodi le inta taj jemil." 10 Asuma , weled tai, wa kutu balak le kalam tai, wa inta bi indak sinin ketir le haya taki. 11 Ana bi wosifu le inta sika ta hikma; Ana bikudu inta le sika al adil. 12 Kan inta bi douru, mafi zol bi wogif fi sika taki wa izakan inta bi jere, inta ma bi waga. 13 Amsuku towjihad, mata sibu kede ruwa; harisu huwo, de haya taki. 14 Mata tabi sika nas sheririn wa mata ruwa fi sika ta del al bi amulu shar. 15 Aba huwo, mata ruwa fogo; sibu sika dak wa ruwa fi sika tani. 16 Umon ma bi num lahadi umon bi amulu shar wa nyakamu umon min num lahadi umon kutu zol bi waga. 17 Fa umon bi akulu rakif ta shar wa asrubu kamur ta unf. 18 Lakin sika ta nas al salihin huwo ze nur al awel al tala abiad shedid; huwo bi wala shedid wa shedid lahadi sabah kan ja. 19 Sika ta nas sherir ze duluma- umon ma arufu haja al sedimu umon. 20 weled tai kutu balak le kalam tai; Adana taki kede asuma kalam tai. 21 Mata sibu kede melesu min uyun taki; hafisu umon fi geliba taki. 22 Kalam tai haya le del al ligo umon wa saha le jisim tomon kulu. 23 Hafisu geliba taki wa aresu huwo be kulu jediah, fa min kalam dehaya al rebi bi defig minu. 24 Sibu wanasat al kaab wa wanasat al fasid. 25 Kede uyun taki ainu adil gidam wa aiynu adil gidam inta. 26 Sala sika kwes le kura taki; baad dak sikat taki bikun tamam. 27 Mata agilib le yemin au le shamal; aglibu kura taki min sika al shar