¹ Weled tai mata nesitu dirasa tai wa hafisu wosaya tai fi geliba taki, ² muda ta ayam taki wa sinin ta haya taki, umon bi zidu salam le inta ³ Mata sibu muhaba al sabit wa iklas kede sibu inta; robutu umon sawa fi ragbta taki; katibu umon fi juwa geliba taki. ⁴ Baad dak inta biligo gubul wa suma al kwes fi uyun ta Allah wa insan. ⁵ Kede inta indu siha fi Yahwa be kulu geliba taki wa mata teki fi fihim taki; ⁶ fi sikat taki kulu zekiru huwo wa huwo bi kutu sikat taki bi kun adil. ⁷ Mata kun negit be uyun taki; kafu Yahwa wa tala bara min shar. ⁸ Huwo bikun ilaj le jisim taki wa adum ⁹ Ihterim Yahwa be kulu mali taki wa bi kulu simar taki al awel ta kulu intaj taki, ¹⁰ wa makzan taki bi mala wa bermilat bi faga , malyan bi kumur jedid. ¹¹ Weled tai, mata alisu towjihad ta Yahwa wa mata karahu tobik tou, ¹² Yahwa bi adibu del al huwo bi hibu, ze abu bi adibu weled al huwo bi hibu. ¹³ Zol al ligo hikma mubarik; zol alkaman ligo ilim. ¹⁴ Haja al inta istefid min hikma aksan min haja al fida bi dafau wa maksab tou aksan min dahab. ¹⁵ hikma Kheima tou aksan min jowahir wa mafi haja al indak niya ashan bikarinu ma huwo. ¹⁶ Huwo indu muda ta ayam tou fi yemin tou; fi shimal tou fi ghina wa ihtiram. ¹⁷ Turuk tou yau turuk al teib wa sikat tou ta salam. ¹⁸ Huwo shejer ta haya le del albi amsuku; del al bi amsuku farahnin. ¹⁹ Be hikma Yahwa asisu ard; be ilim huwo asisu samawat. ²⁰ Be marafa tou hufra al towil fata wa sihaf nezilu nada. ²¹ Weled tai hafisu karar al selim wa temyiz wa mata sibu umon. ²² umon bikun haya le nefsak wa zina ta gubul ashan inta bi libisu fi ragbta taki. ²³ Baad dak inta bi douru fi sika taki be aman wa kura taki ma bi dugu hajer; ²⁴ Iza kan inta naim tehet, inta ma bi kafu; Iza kan inta naim tehet; num taki bikun kwes. ²⁵ Mata kafu min irhab au karaba al mufaja al sheririin yau sabab, ²⁶ zaman kan ja, Yahwa bikun jambu inta wa bi hafisu kura taki ashan ma amsuku fi sherek. ²⁷ Mata aba hajat al kwes min nas al bi istehik, kan fi tehet musulia taki. ²⁸ Mata kelimu le jiran taki, "ruwa wa taal tanimara, wa bukra Ana bi wodi ," kan inta indak gurus ma inta. ²⁹ Mata katitu ashan augu jiran taki- zol al bi geni jambu inta wa bi indu siha fi inta. ³⁰ Mata nakis ma zol bidun sabab, kan huwo ma amulu haja batal ashan augu inta. ³¹ Mata kutu zol al takiyan bi zalan au mesilu hajat al huwo bi amulu. ³² Yahwa bi karahu zol al ma muhtaram. lakin huwo bi jibu zol al wagif adil le nefsu. ³³ Laana ta Yahwa fi ras bet ta zol sherir, lakin huwo bi bariku bet ta nas al salehiin. ³⁴ Huwo bi tahamu nas al mutahamin, lakin huwo bi gabilu nas al bi nezilu nefsa tomon. ³⁵ Nas al hukama bi.warisu ihtiram, lakin nas al belitin bi arfau fok be fadiya.