¹ Weled tai, kan inta akudu kilmat tai wa kazinu wasaya tai ma inta, ² kede adana taki kutu bal le hikma wa nezilu gulub takum le fihim. ³ Kan intum kore le fihim wa arufa sot takum fogo, ⁴ kan intum fetisu ze intum bi fetisu fidah wa fetisu fihim ze intum bi fetisu kinz al dusu, ⁵ baad dak intum bi fahimu makhafa ta Yahwa wa intum bi ligo marafa ta Allah. ⁶ Yahwa bi wodi hikma; fihim wa marafa bi tala min kasuma tou. ⁷ Huwo bi kazinu hikma selim le del al bi kutu huwo farhan; huwo daraga le del al bi douru fi istakhama; ⁸ huwo bi aresu sika ta adala wa huwo bi hafisu sika ta nas tou al muominin. ⁹ Baad dak inta bi fahimu hagiga, adala, wa musawa, wa ai sika al kwes. ¹⁰ Hikma bi ja fi geliba taki, wa marafa bi kun kwes le roho taki ¹¹ Huria tosrufat bi aiynu inta; fihim bi aresu inta. ¹² Umon bi ankizu inta min sika ta shar, min del al bi wonusu hajat al kaab, ¹³ al sibu sika al hagiga wa douru fi sika t al duluma. ¹⁴ Umon farhanin kan umon bi amulu shar wa hajat batal ta shar. ¹⁵ Umon bi tabau sikat al kaab, wa bi istakdimu kidib ashan khati wara sikat tomon. ¹⁶ Hikma wa huria tosurufat bi ankizu inta min mara ta zina, min mara al ma indu aklak wa kilmat tou al ma kwes. ¹⁷ Hiya bi sibu rajil tou wa bi nesitu tifagaiya ta Allah tou. ¹⁸ Bet tou bi katis tehet le mut, wa sika tou bi shilu inta le del al fii fi turba. ¹⁹ Kulu nas al bi ruwa le hiya ma bi rija tanimara wa umon ma bi ligo sikat ta haya. ²⁰ Yala inta bi douru fi sika ta nas al kwesin wa tabau sikat ta nas al hagigiyin. ²¹ Del al bi amulu hagiga bi abinu bet fi ard, wa del be istikhama bi fadul fogo. ²² Lakin nas al sheririn bi gatau. Umon bara min ard, wa nas al kufar bi gatau bara min fogo