¹ Yahwa wonusu le Musa fi Sahara ta Sinai al awel ta sena nimira itnin baad ma umon tala min ardi ta masir Huwo gal, ² ” keli shab ta Israel hafisu id-ta paska fi zaman bi tou al sabit fi sena. ³ Fi yum nimira arba tasar ta shahar de, ashia, lazim intum bi hafisu, wa tabi kulu toujihat, wa asuma kulu kararat al endu ilaka ma huwo.” ⁴ Ashan kida, Musa kelim le shab ta Israel inu lazim umon bi hafisu id ta paska. ⁵ Ashan kida, umon hafisu id ta paska fi shahar ta Sinai. Shab kan asuma le kulu hajat al kan Yahwa kelim le Musa ashan bi amulu. ⁶ Kan fi nas al waskanu nufus tomon ashan umon habisu zol al mutu. Umon ma hafisu id-ta paska fi yom dak. Umon ruwa gidam Musa wa Harun fi nefsu yom. ⁷ Nas de kelim le Musa”, nina biga waskanin ashan nina habisu jisim ta zol al mutu. Malu inta abusu nina min gedimu zebiha le Rabuna fi yom al sabid ta sena fi nus ta shab ta Israel?” ⁸ Musa kelim le umon, "istena takum ana ashan asuma tosiya min Yahwa an intum.” ⁹ Yahwe kelim le Musa. Huwo gal, ¹⁰ ”wonusu le shab ta Israel. Kelim,’ izakan fi zol min intum, au jil takum al waskan ashan habisu zol al mutu, au huwo masi fi safar towil, huwo lisa bi agder hafisu id- ta paska le Yahwa. ¹¹ ”Fi shahar nimira itniin wa yom nimira arbatasar fi misah, umon bi akulu akil ta id-ta paska. Umon lazim bi akulu koruf ta id ta paska be esh al ma kutu fogo kemira wa Kaman jir-jir ¹² Keli umon ma sibu bagi tou lahadi sabah, wa ma kasuru ai adum tou. Umon lazim bi tabi kulu gawanin ta id ta paska. ¹³ Lakin zol nedif wa ma gi safir, lakin ma agder iktefil id ta paska, zol de lazim bi gatau bara min nas tou leanu huwo ma jibu tegdim al Yahwa der fi zaman al sabit fi sena. Zol de lazim bi arfa katiya tou. ¹⁴ Iza kan fi zol garib bi geni fi nas takum wa huwo de tabi id paska, lazim huwo bi hafisu ganun tou kamil. Lazim intum keli kutu ganun wahid le zol al difan, wa Kaman le zol al weledu fi ardi de. ¹⁵ Fi yom al kalas asisu Kema-al-ijtima, shihab ja kati kema-al-ijtima, kema ta tifigia ta kararat. Fi zaman ta misah shihab kan kati kema-al-ijtima. huwo kan zahir ze nar lahadi sabah. ¹⁶ Huwo istemir zede shihab kati al Kema wa beinu zei nar fi zaman ta lel. ¹⁷ Kulu ma kan shihab tala bara min ras al kema, shab bi bada harik. Izakan shihab wogif, nas Kaman bi asisu kema wa be geni fogo. ¹⁸ Hasab tosia min Yahwa, shab ta Israel bi douru, wa hasab amir, umon bi wogif. Izakan shihab wogif fi ras kema–al-ijtima, umon bi geni fi juwa kema tomon. ¹⁹ Izakan shihab fadulu fi ras kema-al ijtima le ayam ketir, shab ta Israel bi ishtakal be ganun ta Yahwa wa ma bi safir. ²⁰ Baad marat shihab de fi geni fi ras kema-al-ijtima le muda ayam. fi kalam dak, umon bi ishtakal bi amir ta Yahwa umon bi amulu kema wa bi safir tanimara hasab toushia tou. ²¹ Baad marat shihab bi geni fi ras kema min misah lahadi sabah. Izakan shihab arfa gisim tou, umon bi harik. Izakan istemir le nahar wahid wa bilel wahid, ile kan shihab arfa gisim tou fog yau umon bi bada saffariat. ²² Hata kan shihab geni fogo kenisa le itniin yom, shahar wahid, wale sena wahid, sala kan zaman towil ze sunu, lazim nas bi geni fi juwa kema wa bi harik. Lakin izakan shihab de shilu fog, umon bi bada musuwar tomon. ²³ Umon bi amulu kema hasab ganun ta Yahwa wa wa bi safir hasab ganun tou. Umon istakal hasab ganun ta Yahwa al wodi le Musa.