¹ Yahwa wonusu le Musa. Huwo gal, ² ”Amulu itniin buruji min fida. Lazim inta bi stagdimu buruji ashan bi nadi mujtama fi mahal wahid wa bardu nadi umon ashan bi harik kema tomon. ³ Kuhana lazim bi afuku buruji ashan bi nadi mujtama kulu sawa fi gidam taki fi bab kema-al-ijtima. ⁴ Izakan kuhana afuku buruji wahid bes, baad dak kiadad, mosulin ta asira ta Israel, lazim bi limu gidam taki. ⁵ Izakan inta afuku wahid shedid, gabail al fi tijah ta sherik bi bada harik. ⁶ Izakan inta afuku buruji le mara nimra itniin, gabail al fi tijah ta junub lazim bi bada douru. Umon lazim bi afuku buruji shedid ashan bi wori gali biga umon bad ruwa. ⁷ Izakan mujtama limu sawa, afuku buruji lakin ma be sot ali shedid. ⁸ Iyal ta Harun, Kuhana, lazim bi afuku buruji de. De yau daiman bikun ganun le intum wa fi wasat ta jil ta nas takum. ⁹ Kan intum gi ruwa fi harib fi ardi takum did adunal gi azibu intum, intum kede afuku buruji ashan bi wodi kabara. Ana Yahwa Allah takum bi zekiru intum wa bi kalisu intum min adu takum. ¹⁰ Bardu, fi zaman ta iktifal, et al bi amulu daiman, wa fi bidaya ta shuhur, intum lazim bi afuku buruji fogo tegdim al gi haragu wa fogo tegdim ta isterekia. De bi geni ze zekira takum le ana Allah takum. Ana Yahwa Illah takum. ¹¹ “Fi sena nimira itnin, shahar itnin, fi yom ishirin fi shahar, shihab kan arfa nefsu fog makan ta salawat ta tifagia ta kararat. ¹² Shab ta Israel bada mashi fi musuwar tomon min sahara ta Sinai. shihab kan wogif fi sahara ta Paran. ¹³ Umon bada safar al awel, gi tabi karar al Yahwa wodi le Musa. ¹⁴ Kema al tehet yafta ta selil ta Yahuza yau bada ruwa awel, hariku jesh tomon. Nahshon weled ta Amminadab yau gedimu jesh ta Yahuza. ¹⁵ Nethanel weled ta Zuar gedimu jesh ta usura ta gebila ta Issachar. ¹⁶ Wa Eliab weled ta Helon yau kan gedimu jesh ta selil ta geliba ta Zebulun. ¹⁷ Asira ta Geshon wa Merari, al mosuul an kema ta salawat, umon nezilu kema ta salawat wa baad dak umon bada momoria. ¹⁸ Bad de, Jesh al tehet yafta ta kem ta Reuben bada momoria. Elizur weled ta Shedeur yau kan zol kebir. ¹⁹ Shelumiel weled ta Zurishaddai kan gedimu jesh asira ta geliba ta Simeon. ²⁰ Wa Eliasaph weled ta Deuel yau kan gedimu jesh ta selil ta gebila ta Gad. ²¹ Wa nas ta Kohath bada momoria, umon arfa ma umon hajat al kudusin. Lazim bi asisu kema ta salawat gubal umon ma wosulu. ²² Jesh al tehet yafta ta selil ta Ephraim bada momoria wara umon. Elishama weled bita Ammihud yau gedimu jesh ta Ephraim. ²³ Gamaliel weled ta Pedahzur gedimu jesh ta asira ta geliba ta Manasseh. ²⁴ Wa abidan weled bita Gideoni kan gedimu jesh ta selil ta gebila ta Benjamin. ²⁵ Jesh al muaskar tehet yafta ta selil ta ta Daan fi momoria al akir. Ahiezer weled ta Ammishaddai yau gedimu jesh ta Dan. ²⁶ Pagiel weled ta Okran yau kan gedimu jesh ta gebila ta selil ta Asher. ²⁷ Wa Ahira weled ta Enan yau gedimu jesh ta selil ta geliba ta Naphtali. ²⁸ De yau kan nizam ta jesh ta shab ta Israel gi ruwa le momoria. ²⁹ Musa kelim le Hobab weled ta Reuel min Midia. al huwo bardu nesib le Musa,”Nina mashin fi mahal al Rabuna kelim anu gal,” Ana bi wodi inta tal ma nina sawa wa nina bi amulu le inta kulu hajat al kwes, le’anu Allah kalas wahadu hajat al kwes le Israel.” ³⁰ Lakin Hobab kelim le Musa,” Ana ma bi ruwa ma intum.Ana bi ruwa fi ardi tai wa ahal tai.” ³¹ Baad dak Musa juwabu, "Malish keli inta ma sibu nina. Inta yau arufu teriga ta amulu muaskar fi Sahara. Lazim inta bi aiynu wara bitana. ³² Izakan inta masi ma nina, nina Kaman bi amulu le inta nebsu hajat al kwes al Yahwa gi amulu le nina.” ³³ Umon douru bara min jebel ta Yahwa le muda ta talata yom. Sonduk ta ahad ta Yahwa kan arfau gidam tomon le muda talata yom ashan biligo mahal le raha. ³⁴ Shihab ta Yahwa kan fi fok ras tomon be nahar kulu-ma umon bi douru. ³⁵ Kulu ma kan Sonduk bada hariku, Moses bi kelim, "Gum fog, Yahwa. Shetetu adu taki. Kutu nas al bi karahu keli jere min inta.” ³⁶ Kulu ma kan Sonduk bi wogifu, Musa bigul, “Rija Yahwa, le shab ta Israel al ketir ta asharat al halaf.