¹ Hasa Shab bada nengneng an mashakil tomon wa Yahwa bi asuma. Yahwa asuma le shab wa biga zalan. Nar min Yahwa wala kidam tomon wa haragu taraf ta kem. ² shab kore le Musa , yala Musa seli le Yahwa, wa nar de batulu ³ Makan daak kutu isim tou “Taberah”, leanu nar ta Yahwa wala kidam tomon. ⁴ Baad min nas al ajanib bada limu ma selil ta Israel. Umon azu akil al kwes. Baad dak Shab ta Isreal kore wa kelim, “munu yau bi wodi le nina laham ashan Nina be akulu? ⁵ Nina zekiru samaka al kan nina be akulu majani fi Masir , Ajuur, Batiick , wa krath, basala,wa basal tum. ⁶ hasa niya ta akil biga mafi , leanu kulu yom bes manna.” ⁷ mana de ze mojmu min buzur. Huwo ze buharat ta akil. ⁸ shab ruwa wa lemu Manna. Wa istamilu hajiir ashan atanu huwo wa rakabu be gurumat, amulu ze kak. taam tou hilu ze zeet ta zetun. ⁹ Zaman nada nezil bilel fi ras kem, Manna kaman bi nezil. ¹⁰ Musa asuma shab fi kulu usura gi kore, wa ai rajil fi bab ta kem tou, Yahwa zalan shedid, wa fi uyun Musa nengneng tomon kan batal. ¹¹ Musa kelim le Yahwa: malu inta amulu kadam taki batal zede? malu inta ma moksut ashan ana? inta sibu ana arfa tegila ta nas de kulu. ¹² hal ana yau hamil ma nas de kulu? Wele ana yau weledu umon ashan inta bi kelimu le ana, arfa umon gerib ma dush taki ze abuhat gi arfau iyal tomon fi duus? kede ana arfau umon le ard al inta waad le judud tomon ashan bi wodi le umon? ¹³ Ana bi ligo laham wen ashan wodi le sahab de kulu ? Leanu umon be kore le ana gali: Wodi le Nina laham ashan akulu. ¹⁴ Ana ma be agder barau ashan shilu tegila ta shab de kulu leano tigil le ana. ¹⁵ Ze inta be amulu ana be teriga de. katulu ana hasa- Iza ana ligo rahma fi ena taki- Mata sibu ana aiynu azab tai. ¹⁶ Yahwa Kelimu le Musa: Jibu le ana sibein min shiyuk ta Israel. kun mutakit inu umon shiyuk wa dubad ta shab .Jibu umon fi kem ta ijtima ashan bi wogif hinak ma inta. ¹⁷ Ana bi ja ashan wonusu ma intum hinak, Ana bi shilu Roho tani min inta ashan bi wodi le umon. Umon bi arfa tegila ta shab de ma inta. inta ma bi arfa barau. ¹⁸ Kelimu le shab, kadisu nefsa takum, leanu hagiga bukura intum bi akulu laham, ashan intum kore wa Yahwa asuma. intum kelimu, "munu yau bi wodi le nina laham ashan bi akulu? huwo kan kwes le nina fi masir. ashan kida Yahwa be wodi le intum laham wa intum bi akulu. ¹⁹ intum ma bi akulu laham le yom wahid bes, wele itniin yom, wele khamsa ayam ,wele ashara ayam, wele ishirin yom, ²⁰ lakin intum bi akulu le muda ta sahar lahadi bi tala bara min anafa takum, wa intum be akrah leanu intum aba Yahwa, munu fi nus takum. intum kore gidam ta tou. intum kelimu, "Malu nina sibu Masir""'? ²¹ Baad dak Musa kelimu : "Shab al ma ana 600,000 rijal, wa inta kelimu, Ana bi wodi laham le ashan bi akulu le muda ta shar.' ²² kede nina katulu bahaim wa bagarat ashan umon bi sabanin? Kede nina sherigu samagat al fii bahar kulu ashan sabanu umon?" ²³ Yahwa kelimu le Musa: :hal ida tai guser? hasa intum bi aiynu kan kalam tai bikun hagiga wele la?. ²⁴ Musa tala wa kelim le shab kalam ta Yahwa, Huwo limu sebein rijal al min shiyuk wa wogifu umon hawil kem. ²⁵ Yahwa ja fi sihab wa kelimu wa wonusu le Musa. Yahwa wa shilu Roho tanin min Musa wa wodi le sebein shiyuk de. Zaman roho de nezil le umon, umon bada itnaba, lakin le fetera ta munasaba dak wa bes ²⁶ Itniin rijal fadulu fi kem, Eldad wa Medad. Roho kaman kan nezil fi ras tomon. Isim tomon musejel fi kisif. lakin umon ma tala bara min kem. Ragam zalik, umon itnaba fi dakil kem. ²⁷ fi weled fi dakil kem jere le Musa, "Eldad wa Medad be itnaba fi kem. ²⁸ Joshua weled ta Nun, Naib ta Musa, wahid min nas tou al iktaru, kelimu le Musa, wogifu umon. ²⁹ Musa kelimu le huwo, Hal inta endu gira le ana? Ana bi itmana kan kulu shab ta Yahwa bikun Anbiya wa inu huwo bi wodi Roho le umon!" ³⁰ Baad dak Musa wa shiuyk ta Israel rija le kem. ³¹ Baad dak hawa ja min Yahwa wa jibu ter al samani min bahar. Umon waga gerib ma kem, de safar ta wahid yom fi tijah whaid wa Kaman safar ta wahid yom fi tijah tani. Teyur de kan hawuli kem ze itnin metir. fok turab ³² Shab kan moskulin fii limu teyur nahar kuku, wa belil kulu, wa yom tani de kulu. mafi zol al limu besit min ashara hawamir, Umon shariku teyur de ma baad fii kem. ^{35 33} Zaman laham lisa fi nus ta shunun tomon, zaman umon lisa gi akulu, zalan ta Yahwa waga fi ras tomon, Huwo hajimu nas del be ayan al kaab, ³⁴ Kutu isim ta mahal dak Kibroth Hattaavah”, leanu umon dofunu nas al endu neya le laham min kibroth hattaavah shab del safir le Hazeroth, mahal al umon geni fogo.